Last updated on August 9th, 2023 at 07:03 pm
ಗೃಹಜ್ಯೋತಿ ಯೋಜನೆದ ಅಡಿಟ್ ಮಾತೆರೆಗ್ಲಾ “ಉಚಿತ” ಕರೆಂಟ್ ಕೊರ್ಪ ಪಂದ್ ಸರಕಾರ ಪಂಡ್‌ದಿತ್ತ್ಂಡಲಾ ಕೆಲ ಜನಕ್ ದುಂಬುದ ಲೆಕಾನೆ ಕರೆಂಟ್ ಬಿಲ್ ಬತ್ತ್‌ದ್ಂಡ್.
ಉಬಾರ್‌ದ ಒಂಜಿ ಇಲ್ಲದಕುಲು ಕರಿನ ತಿಂಗೊಲು 200 ಯುನಿಟ್‌ರ್ದ್ ಕಮ್ಮಿ ಕರೆಂಟ್ ಗಲಸ್ಂಡಲಾ ಅಕಲೆಗ್ ಕಾಸ್ ಕಟ್ಟೆರೆ ಬಿಲ್ ಬತ್ತ್‌ದ್ಂಡ್. ಉ್ಂದೆನ್ ಕೇನ್ನಗ, ಕರಿನ ವರ್ಸ ಸರಾಸರಿ 200 ಯುನಿಟ್‌ರ್ದ್ ಎಚ್ಚ್ ಗಲಸ್‌ದರ್ ಪನ್ಪಿ ನೆನವ ಕೊರ್ತೆರ್.
ಈ ಬಗ್ಗೆ ಪಾತೆರಿನ ಇಲ್ಲದಕುಲು “ಉ್ಂದೆಕ್ ದುಂಬು 200 ಯುನಿಟ್‌ರ್ದ್ ಮಿತ್ತ್ ಗಲಸೊಂದಿತ್ತ್ಂಡಲಾ ಸರಕಾರೊದ ಗೃಹಜ್ಯೋತಿ ಯೋಜನೆದ ಫ‌ಲಾನುಭವಿ ಆವರೆ ಬೋಡಾದ್ ಕಮ್ಮಿ ಕರೆಂಟ್ ಗಲಸ್‌ದ್ ಜುಲೈ ತಿಂಗೊಲ್ದ ಗಲಕೆನ್ 191 ಯುನಿಟ್‌ಗ್ ಜಪ್ಪುಡಾದಿತ್ತ. ಸರಕಾರೊದ ಯೋಜನೆದ ಲಾಭ ತಿಕ್ಕು ಪಂದ್ ಎನ್ನ್‌ದಿತ್ತ. ಆಂಡ ಮೆಸ್ಕಾಂದ ಬಿಲ್ ತಿಕ್ಕ್‌ನಗ ಫುಲ್ ಬಿಲ್ದ ಕಟ್ಟೊಡೂಂದ್ ತೆರಿದ್ ನಿರಾಸೆ ಆತ್ಂಡ್” ಪಂದ್ ಪನ್ತೆರ್. 200 ಯುನಿಟ್ ಕರೀಂಡ ಗೃಹಜ್ಯೋತಿ ಸೌಲಭ್ಯ ಇಜ್ಜಿ ಪನ್ಪುನೆನ್ ಒತ್ತೊನೊಲಿ. ಆಂಡ 200 ಯುನಿಟ್‌ರ್ದ್ ಕಮ್ಮಿ ಗಲಸ್ಂಡಲಾ ಕರಿನ ವರ್ಸೊದ ಸರಾಸರಿನ್ ತೋಜಾದ್ ಸೌಲಭ್ಯೊನು ನಿರಾಕರಿಪುನ ಸಮ ಅತ್ತ್ ಪಂದ್ ಅಕಲೆನ ಅಭಿಪ್ರಾಯ.
ಉ್ಂದೆತ ಬಗ್ಗೆ ಪಾತೆರಿನ ಕುಡ್ಲದ ಮೆಸ್ಕಾಂ ಅಧಿಕಾರಿಲು, “ಕರಿನ ವರ್ಸೊದ 12 ತಿಂಗೊಲ್ದ ಸರಾಸರಿ 200 ಯುನಿಟ್‌ರ್ದ್ ಕಮ್ಮಿ ಇತ್ತಿನಕಲೆಗ್ ಮಾತ್ರ ಈ ಯೋಜನೆ. ಕರಿನ ವರ್ಸೊದ ಸರಾಸರಿ 200 ಯುನಿಟ್‌ರ್ದ್ ಎಚ್ಚ ಗಲಸಿನಕುಲು ಇತ್ತೆ ಕಮ್ಮಿ ಯುನಿಟ್ ಗಲಸ್ಯೆರ್ನ್ಡಲಾ ಇತ್ತೆ ಗೃಹಜ್ಯೋತಿ ಯೋಜನೆದ ಅಡಿಕ್ ಬರ್ಪುಜೆರ್. ಕರಿನ ಎಪ್ರಿಲ್‌ರ್ದ್ ಈ ವರ್ಸೊದ ಮಾರ್ಚ್‌ ಮುಟ್ಟದ ಪ್ರತೀ ತಿಂಗೊಲ್ದ ಬಿಲ್ದ ಯುನಿಟ್‌ನ್ ಗೋಡ್ಯಾದ್ ಬತ್ತಿನ ಸಂಖ್ಯೆನ್ 12ರ್ದ್ ಭಾಗ ಮಲ್ತ್ಂಡ ಬರ್ಪಿನ ಒಟ್ಟು ಯುನಿಟ್‌‌ದ ಮಿತ್ತ್ ಗೃಹಜ್ಯೋತಿ ಯೋಜನೆ ನಿರ್ಧಾರ ಆಪುಂಡು. ಈ ಭಾಗ ಮಲ್ತಿನ ಯುನಿಟ್ 200 ಯುನಿಟ್‌ರ್ದ್ ಕಮ್ಮಿ ಇತ್ತ್ಂಡ ಮಾತ್ರ ಅಂಚಿನ ಇಲ್ಲಗ್ ಉಚಿತ ಯೋಜನೆ ತಿಕ್ಕುಂಡು” ಪಂದ್ ಪನ್ತೆರ್.