Last updated on August 3rd, 2023 at 08:17 pm
ಕರ್ನಾಟಕ ಸಂಘ ಅಂಧೇರಿ, ಕರ್ನಾಟಕ ಗಡಿ ಪ್ರದೇಶ ಅಭಿವೃದ್ಧಿ ಪ್ರಾಧಿಕಾರ ಕರ್ನಾಟಕ ಸರ್ಕಾರ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಅಂಚೆನೇ ಮುಂಬೈದ ಬೇತೆ ಬೇತೆ ಕನ್ನಡ ಪರ ಸಂಘಟನೆಲೆನ ಒಟ್ಟುಸೇರಿಗೆಡ್ ಜುಲೈ 29ದಾನಿ ಮುಂಬಯಿ ಕುರ್ಲಾ ಬಂಟೆರೆ ಭವನೊಡು ‘ಹೊರನಾಡು ಕನ್ನಡ ಸಂಸ್ಕೃತಿ ಸಂಭ್ರಮ’ ಬೊಕ್ಕ ‘ಭಾರತ ಸ್ವಾತಂತ್ರ್ಯ ಅಮೃತ ಮಹೋತ್ಸವದ ಸವಿನೆನಪು’ ಕಾರ್ಯಕ್ರಮ ಅಟ್ಟನೆ ಆದಿತ್ತ್ಂಡ್.
ಈ ಕಾರ್ಯಕ್ರಮೊಡು ಪಾಲ್‌ಗೆತೊಂದಿತ್ತಿನ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರ್ ಶಿವರಾಜ್ ತಂಗಡಗಿ, ತನ್ನ ಸಮಾರೋಪ ಭಾಷಣೊಡು ‘ಮುಲ್ಪ ಮಸ್ತ್ ಜನ ತುಳುಭಾಷೆದ ಬಗ್ಗೆ ಪಂಡರ್, ನಿಕ್ಲೆನ ಆಸೆದ ಲೆಕಾನೆ ಕರ್ನಾಟಕ ಸರ್ಕಾರ ಆಯಿನಾತ್ ಬೇಗೊಡು ತುಳುಭಾಷೆಗ್ ಮಾನಾದಿಗೆ ಕೊರ್ಪುಂಡು. ಈ ಬಗೆಟ್ ಯಾನ್ ಇಸೇಸ ಉಮೇದ್ ದೀದ್ ಮುಖ್ಯಮಂತಿರ್ಲೆಡ ಪಾತೆರ್ದೆ. ಮೋಹನ್ ಆಳ್ವೆರೆನ ಸಮಿತಿದ ವರದಿಲಾ ಬೈದ್ಂಡ್. ನನ ರಡ್ಡ್ ಮೂಜಿ ಇಲಾಖೆಲೆನ ಅನುವು ಬೋಡಾತ್ಂಡ್ ಪಂದ್ ಪಂಡೆರ್.
ಇಂಚಿಪ್ಪೊಗು ಅಧಿವೇಶನೊಡು ಶಾಸಕೆರ್ ಅಶೋಕ್ ರೈಕುಲು ಬೊಕ್ಕ ಸ್ಪೀಕರ್ ಯು ಟಿ ಖಾದರ್ ತುಳುಟೇ ಪಾತೆರೊಂಡಿನೆನ್ ನನೆತೊಂದು, ಎಂಕೊರಿ ಶಾಸಕೆರ್ ಕೇನ್ಪು ಕೇನ್ನಗ ತುಳುಟೇ ಕೇಂಡೆರ್, ಅವೆಕ್ ಎಂಕ್ಲೆನ ಗುರ್ಕಾರ್ಲುಲಾ ತುಳುಟೇ ಸದು ಕೊರ್ಯೆರ್. ನಡುಟು ಕುಡೊರಿ ಶಾಸಕೆರ್ ಉಂತುದು ತುಳುಟೇ ಪಾತೆರ್ರೆ ಪತ್ಯೆರ್. ಎಂಕ್ ಉ್ಂದು ಅರ್ಥ ಆವೊಡೇ? ಯಾನ್ ಲಕ್ಕ್‌ದುಂತುದು ಪುಣ್ಯಾತ್ಮೆರೇ, ನಿಕ್ಲೆಗ್ ತುಳು ಬರ್ಪುಂಡು, ನಿಕುಲು ತುಳುಟು ಪಾತೆರುವರ್. ಎನನ್ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆ ಮಲ್ಧೆರ್, ಎಂಕ್ ತುಳು ಬರ್ಪುಜಿ. ದಯಮಲ್ತ್ ಕನ್ನಡೊಡು ಪಾತೆರ್ಲೆಂದ್ ಪಂಡೆ’ ಪಂದ್ ತೆಲ್ತೊಂದು ಪಂಡೆರ್.
ತುಳುಭಾಷೆ ಬಾರಿ ಮೃದು ಭಾಷೆ, ಉಡಲ್‌ಗ್ ಮುಟ್ಟುನ ಭಾಷೆ ಪಂದ್ ಎಂಕ್ ತೆರಿದ್ಂಡ್. ಈ ಭಾಷೆಗ್ ಮಾನಾದಿಗೆ ಕೊರ್ಯೆರ ಒವ್ವೇ ಚರ್ಚೆದ ಬೋಡೂಂದಿಜ್ಜಿ. ಬೇತೆಬೇತೆ ರಾಜ್ಯೊಲೆಡ್, ಬೇತೆಬೇತೆ ದೇಶೊಲೆಡ್ ಪೋದು ಕನ್ನಡ ಸಂಘಟನೆ ಕಟ್ಟ್‌ದಿತ್ತೆರ್ನ್ಡ ಅವ್ವು ತುಳುವೆರೇ ಕಟ್ಟ್‌ದಿನ. ಜಗತ್ತ್‌ದ ಪ್ರತೀ ದೇಶೊಡ್ಲಾ ತುಳುವೆರ್ ತೂಯೆರ ತಿಕ್ಕುವೆರ್ ಪಂದ್ ಪಂಡೆರ್.
ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರೆನ ಉಮೇದ್‌ದಿಂಜಿ ಪಾತೆರೊಲೆನ್ ಕೇನ್ನಗ ಈ ಸರ್ತಿ ಆಂಡಲಾ ತುಳುಭಾಷೆಗ್ ತಿಕ್ಕೊಡಾಯಿನ ಮಾನಾದಿಗೆ ತಿಕ್ಕು ಪಂದ್ ತೋಜೊಂದುಂಡು.