Last updated on August 5th, 2023 at 07:16 pm
ಇತಿಹಾಸ ಪನ್ಪಿನವು ಕಾಲಿ ಆಡೊಳ್ತ ವರ್ಗೊದ, ಮೇಲ್ವರ್ಗದ ಕತೆ ಅತ್ತ್, ಸಮಾಜೊದ ಕಡೇತ ಮುನೆಟ್ ಉಪ್ಪುನ ದುರ್ಬಲೆರೆರ್ದ್ ಪತ್ತಿನ ಮಾತಾ ಸ್ಥರದಕಲೆಗ್ಲಾ ಇತಿಹಾಸ ಉಂಡು. ಅವ್ ನಮ್ಮ ಬದ್ಕ್‌ದ್, ನಮ ಗಲಸುನ ವಸ್ತುಲೆಡ್, ನಮ್ಮ ಪೆರಿಯಾಕ್ಲೆನ ಜೀವನ ಶೈಲಿಡ್ ನಮಕ್ ತೆರಿದ್ ಬರ್ಪುಂಡು. ಇಂಚಿನ ಒಂಜಿ ತುಳು ಸಾಂಸ್ಕೃತಿಕ ವಸ್ತುದ ವಿಶ್ವಕೋಶ ಲೆಕ್ಕ ನಮಕ್ ತೋಜುನವೇ ಬಂಟ್ವಾಳದ ತುಳು ಬದುಕು ವಸ್ತು ಸಂಗ್ರಹಾಲಯ ಬೊಕ್ಕ ರಾಣಿ ಅಬ್ಬಕ್ಕ ಅಧ್ಯಯನ ಕೇಂದ್ರ.
ಡಾ.ತುಕಾರಾಮ ಪೂಜಾರಿ ಪನ್ಪಿನಾರ್ 1995ನೇ ಇಸವಿಡ್ ಎಲ್ಯ ಮಟ್ಟ್ ಡ್ ತನ್ನ ಅಭಿರುಚಿಟ್ ಒಟ್ಟು ಮಲ್ದಿನ ವಸ್ತುಲೆನ್ ದೀದ್ ಕಟ್ಟಿನವು ಇನಿಕ್ ಇಡೀ ತುಳುನಾಡ ಸಂಸ್ಕೃತಿದ ಒಂಜಿ ಮಾಮಲ್ಲ ಸಂಗ್ರಹಾಲಯ ಆದ್ ಬುಲೆಡ್ಂಡ್. ಕಾಲಿ ತುಳುನಾಡ್‌ದಕುಲು ಮಾತ್ರ ಅತ್ತಂದೆ ಪರರಾಜ್ಯ, ಪರದೇಶೊರ್ದುಲಾ ಜನಕುಲು ಅಧ್ಯಯನದ ಉದ್ದೇಶೊಡು ಇಡೆಗ್ ಬರ್ಪೆರ್. ವಸ್ತು ಸಂಗ್ರಹಾಲಯೊಡು ಅಪರೂಪೊರ್ದು ಅಪರೂಪ ಪನ್ಪಿಲೆಕ್ಕ ತುಳುನಾಡ್‌ದ ಪಿರಾಕ್‌ದ ಗಲಕೆದ ಸೊತ್ತುಲೆನ್ ಅಜತ್ ಅಜತ್ ಕನತ್ ದೀತೆರ್.
ಅಬ್ಬಕ್ಕನ ಜೀವನದ ಪತ್ತ ಕತೆನ್ ದೇಶ ವಿದೇಶದ ಪುಗಾರ್ತೆದ ಚಿತ್ರಗಾರೆರೆನ್ ಕನತ್ ಬುಡ್ಪಾದ್, ಅಬ್ಬಕ್ಕಗಾದೇ ಒಂಜಿ ಆರ್ಟ್ ಗ್ಯಾಲರಿ ಉಂಡು. ಒಂಜೊಂಜಿ ಚಿತ್ರಪಟೊತ ಪಿರವುಡ್ದ್‌ಲಾ ಒಂಜೊಂಜಿ ಕತೆ ಉಂಡು. ಅಬ್ಬಕ್ಕನಂಚಿನ ಒಂಜಿ ಮಹಾನ್ ಶಕ್ತಿಗ್ ಕೊರಿನ ಮಾಮಲ್ಲ ಗೌರವ ಉಂದು ಪಂಡಲಾ ಪೊಯಿಯತ್ತ್.
ತನ್ನ ಸ್ವಂತ ಉಮೇದ್‌ಡ್ ಆತ್ ಮಲ್ಲ ಒಂಜಿ ಸಂಸ್ಥೆನ್ ಕಟ್ಟ್ ದ್ ಬುಲೆಪಾದ್, ನಡಪಾವುನವು ಕುಸಲ್‌ದ ಬೇಲೆ ಅತ್ತ್. ಉಂದೆಕಾದ್ ಮಸ್ತ್ ತ್ಯಾಗೊ ಮಲ್ಪೊಡಾಪುಂಡು. ಡಾ.ತುಕಾರಾಮ ಪೂಜಾರಿ ಬೊಕ್ಕ ಆರೆನ ಬೊಡೆದಿ ಡಾ.ಆಶಾಲತಾ ಸುವರ್ಣ ಮೊಕುಲು ಬದ್ದತೆ ಇತ್ತಿನ ಜನಕುಲು. ಪತ್ತಿ ಬೇಲೆನ್ ಕೊಡಿ ಎತ್ತಾದ್, ಇನಿ ಇಡೀ ತುಳುನಾಡ್‌ಗೇ ಒಂಜಿ ಉಡಿಗಿರ ಲೆಕ್ಕ ಆ ಸಂಸ್ಥೆನ್ ಮಲ್ದೆರ್. ಮಸ್ತ್ ಜನಕ್, ನನಲ ನಮ್ಮ ನಡುಟೇ ಇಂಚಿನ ಒಂಜಿ ವಸ್ತು ಸಂಗ್ರಹಾಲಯ ಪನ್ಪಿನ ಉಂಡು ಪನ್ದೇ ತೆರಿದಿಜ್ಜಿ. ಜನಕುಲೆಡ ಅಧ್ಯಯನದ ಉಮೇದ್‌ಗ್ ದಿನೊರ್ದು ದಿನ ಕುಂದೆಲ್ ಬರೊಂದುಂಡು. ತುಳುವೆರ್ ಒರ ಈ ಕೇಂದ್ರೊಗು ಪೋದು ನಮ್ಮ ಪಿರಾಕ್‌ದ ಬದ್ಕ್‌ದ ಅಂಶ, ಇತ್ತೆ ಆದುನೀಕತೆಡಾ ಅತ್ತಾಂದೆ ತೆರಿದೊ ತೆರಿಯಂದೆನಾ ನಮ ಎಂಚ ಮಾತೆನ್ಲಾ ಬುಡ್ತ ಪನ್ದ್ ತೆರಿಯು.