Last updated on August 31st, 2023 at 09:21 pm
ಇಂಚಪ್ಪೊಗು ಒಂತೆ ತಿಂಗೊಲುರ್ದು ದುಂಬು ಎಂಕ್ಲೆನ ಬರಿಮೂಲದ ನಾಗಬನತದ ವರ್ಸಾವದಿದ ಲೇಸ್ ಇತ್ತ್ಂಡ್. ಅಲ್ಪ ಪೂಜೆ ಪೂರಾ ಆದ್ ನಾಗದರ್ಸನ ಇತ್ತ್ಂಡ್. ನಾಗಗ್ ದರ್ಸನೊಗು ಉಂತುನಗ ಮದು ಪನ್ಪಿನಾರ್ ತುಳುಟು ಪನ್ಡೆರ್ ಆಂಡ ನಾಗದರ್ಸನೊಗು ಉಂತಿನ ಜನ ಕನ್ನಡೊಡು ನುಡಿ ಕೊರಿಯೆರ್.
ಇಂಚೊಗು ಒಂಜಿ ತುಳು ಆಟ ತೂವೊಂದಿತ್ತೆ, ಆಟ ಬಾರೀ ಎಡ್ಡೆ ಆದಿತ್ತ್ಂಡ್ ಬತ್ತಿನ ಮಾತಾ ಪಾತ್ರೊಲುಲಾ ತುಳುಟೇ ಪಾತೆರಿಯೆರ್. ಆಂಡ ಅವೆಟ್ ಬತ್ತಿನ ಅಪ್ಪೆ ಉಲ್ಲಾಲ್ದಿನ ಪಾತ್ರಧಾರಿ ಮಾತ್ರ ಕನ್ನಡೊಡು ಪಾತೆರಿಯೆರ್.
ಒಂತೆ ದಿನ ದುಂಬು ತುಳುನಾಡ್‌ದ ಒಂಜಿ ಮಲ್ಲ ಬಹುಸಂಖ್ಯಾತ ಜಾತಿದ ಲೇಸ್ ನಡತೊಂದಿತ್ತ್ಂಡ್. ಆ ಲೇಸ್ದ ಮಿತ್ತ ಚಾವಡಿದ್ ಕುಲ್ದಿನಕುಲು ತುಳುವೆರ್, ತಿರ್ತ್ ಸಭೆಟ್ ಕುಲ್ದಿನಕುಲು ತುಳುವೆರ್. ಆಂಡ ಮಾತೆರ್ಲಾ ಭಾಷಣ ಮಲ್ತಿನಿ ಮಾತ್ರ ಕನ್ನಡೊಡು.
ತುಳುನಾಡ್‌ದ ನಾಗೆ, ತುಳುನಾಡ್‌ದ ದೇವೆರ್ನಕಲೆಗ್, ತುಳುನಾಡ ಮಲ್ಲ ಮಲ್ಲ ರಾಜಕಾರಣಿಲೆಗ್, ಸಾಹಿತಿಲೆಗ್, ಚಿಂತಕೆರೆಗ್, ಸಾಮಾಜಿಕ ಪೊರುಂಬಾಟಗಾರೆರೆಗ್ ದಾನೆ ತುಳು ಬರ್ಪುಜಿ? ನಂಬೊಲಿಗೆನೇ ಧರ್ಮ, ಧರ್ಮ ಬರ್ಪಿನಿ ಸಂಸ್ಕೃತಿರ್ದ್, ಸಂಸ್ಕೃತಿ ಉಂಡಾಪಿನಿ ಭಾಷೆರ್ದ್ ಭಾಷೆ ಬೊಡ್ಚಿ ಸಂಸ್ಕೃತಿ ಬೋಡು ಪನ್ಡ ಎನ್ಚ?
ಮಿತ್ತ್ ಕೊರ್ತಿನ ರಡ್ಡ್ ಮೂಜಿ ಉದಾರ್ಮೆಲು ಸಾರೊಡು ನಾಲ್ ರುಯಿ ಇತ್ತಿಲೆಕ್ಕೊ. ಇಂಚಿನ ಸಾರ ಸಾರ ಉದಾರ್ಮೆ ಕೊರೊಲಿ. ತುಳುವೆರ್ ಮದಿಪುನ ಮದು ಅರ್ತ ಆಪುಂಡುಡ ತುಳುಟು ನುಡಿ ಕೊರುಂಡ ದಾನೆ ಆವು? ಮಾತಲಾ ತುಳುಟೇ ಉಪ್ಪುನ ಆಟೊಡು ದೇವೆರ್ ತುಳುಟು ಪಾತೆರ್ಂಡ ದೇವೆರೆಗ್ ಮೈಲಿಗೆ ಆವಾ?
ಪುಟ್ಟಿನ ಭಾಷೆದ ಮಿತ್ತ್ ಅಭಿಮಾನ ಇಜ್ಜಿಡ ಅಂಚಿನ ಬಾಳ್ ಬದ್ಕ್ ದ್ ಪೆರಜನ ಇಜ್ಜಿ. ಬೇತೆ ಬಾಸೆ ಪಾತೆರ್ಂಡ ನಿಕುಲು ಮಲ್ಲಕುಲಾಪರ್ ತುಳು ಪಾತೆರ್ಂಡ ಎಲ್ಯಕುಲಾಪರ್ ಪನ್ದ್ ಎನ್ನಡೆ. ಬರಿತಿಲ್ಲದ ಬಾಸೆ ಒರಿಪಾವರೆ ಕೋಟಿ ಕೋಟಿ ಜನ ಉಲ್ಲೆರ್, ತುಳುಕು ಉಪ್ಪುನು ಒಂತೆ ಲಕ್ಷ ಜನ, ಅವೆಟ್ಲಾ ಇಂಚಿನ ಬೆರಕೆಲು ಆಂಡ ತುಳು ಒರಿವಾ?ಅಪ್ಪೆನಾತೇ ಮೋಕೆ ಅಪ್ಪೆಬಾಸೆದ ಮಿತ್ತ್ ಇತ್ತ್ಂಡ ಇನಿ ತುಳುಕು ಮಾನಾದಿಗೆ ಕೊರ್ಲೆ ಪನ್ದ್ ನಟ್ಟುನ ಪರಿಸ್ಥಿತಿಗ್ ನಮ ಎತ್ತ್‌ದಯ. ಏರೆನೋ ಮೆಚ್ಚಾವರೆ, ಒವ್ವಾ ಪ್ರಶಸ್ತಿದ ಆಸೆಗ್, ಪನವುದ ಆಸೆಗ್ ಬರಿತಿಲ್ಲದ ಬಾಸೆನ್ ಮಂಡೆಡ್ ತುಂಬೊನುನ ಏತ್ ಸಮ? ಒರಿಯಗ್ ಒಂಜೇ ಪೆದ್ದಿನ ಅಪ್ಪೆ ಅಂಚೆನೆ ಒಂಜೇ ಅಪ್ಪೆ ಬಾಸೆಲಾ ಉಪ್ಪೊಡು. ಅವ್ ಉಂದು ರಡ್ಡ್ ಕಣ್ಣ್ ಪನ್ಪಿನಕಲು ಕುಡೊಂಜಿ ಕಣ್ಣ್ ಡ್ ನೀರ್ ಜತ್ತೊಂದಿಪ್ಪುನ ಒರ ಕನ್ನಡಿಡ್ ತೂಲೆ!
ಅಪ್ಪೆನಾತೇ ಮೋಕೆ ಅಪ್ಪೆಬಾಸೆದ ಮಿತ್ತ್ ಇತ್ತ್ಂಡ ಇನಿ ತುಳುಕು ಮಾನಾದಿಗೆ ಕೊರ್ಲೆ ಪನ್ದ್ ನಟ್ಟುನ ಪರಿಸ್ಥಿತಿಗ್ ನಮ ಎತ್ತ್‌ದಯ. ಏರೆನೋ ಮೆಚ್ಚಾವರೆ, ಒವ್ವಾ ಪ್ರಶಸ್ತಿದ ಆಸೆಗ್, ಪನವುದ ಆಸೆಗ್ ಬರಿತಿಲ್ಲದ ಬಾಸೆನ್ ಮಂಡೆಡ್ ತುಂಬೊನುನ ಏತ್ ಸಮ? ಒರಿಯಗ್ ಒಂಜೇ ಪೆದ್ದಿನ ಅಪ್ಪೆ ಅಂಚೆನೆ ಒಂಜೇ ಅಪ್ಪೆ ಬಾಸೆಲಾ ಉಪ್ಪೊಡು. ಅವ್ ಉಂದು ರಡ್ಡ್ ಕಣ್ಣ್ ಪನ್ಪಿನಕಲು ಕುಡೊಂಜಿ ಕಣ್ಣ್ ಡ್ ನೀರ್ ಜತ್ತೊಂದಿಪ್ಪುನ ಒರ ಕನ್ನಡಿಡ್ ತೂಲೆ!