ದೇವರಾಜ ಅರಸುನ ಕಾರ್‌ಡ್ ಕುಲ್ಲುಂಡ ದೇವರಾಜ ಅರಸು ಆಪುಜೆರ್,ವೇಸ್ಟಿ, ವಾಚ್ ಕಟ್ಟೊಂದು ಖಾಕಿ ಚಡ್ಡಿ ಪಾಡ್ಂಡ ಸಮಾಜವಾದಿ ಆಪುಜೆರ್: ಕುಡೊರ ಸಿಎಂನ ಮಿತ್ತ್ ಪಿಸ್‌ರ್ ತೋಜಾಯಿನ ಬಿ ಕೆ ಹರಿಪ್ರಸಾದ್

Last updated on September 10th, 2023 at 07:19 am

ಕಾಂಗ್ರೆಸ್‌ದ ಪೆರಿಯ ನಾಯಕೆ, ವಿಧಾನ ಪರಿಷತ್ ಪದುಕೆ ಬಿ ಕೆ ಹರಿಪ್ರಸಾದ್ ಕುಡೊರ ಸಿಎಂ ಸಿದ್ದರಾಮಯ್ಯೆರೆನ ಮಿತ್ತ್ ಮಾತೆರ್ನ ಎದುರೇ ತನ್ನ ಪಿಸ್‌ರ್ ತೋಜಾದೆರ್. ಸಂಪುಟೊಡು ಸಚಿವ ಸ್ಥಾನ ತಿಕ್ಕಂದಿನ ಆರೆನ ಬೆಚ್ಚೊಗು ನೆವನ ಕಾರಣ.

ತನ್ನ ಶಕ್ತಿ ಪ್ರದರ್ಶನೊಗು ಜತ್ತಿನ ಬಿ ಕೆ ಹರಿಪ್ರಸಾದ್ ಕೋಡೆ ಬೆಂಗ್ಳೂರ್‌ದ ಅರಮನೆ ಮೈದಾನೊಡು ಈಡಿಗ, ಬಿಲ್ಲವ, ನಾಮಧಾರಿ, ದೀವೆರ್ ಬೊಕ್ಕ ಬಜೀ ಪಿರ ಒರಿದಿನ ವರ್ಗೊಲೆನ ನೇಲ್ಯ ಸಮಾವೇಶ ಅಟ್ಟನೆ ಮಲ್ದಿತ್ತೆರ್. ಅಲ್ಪ ಪಾತೆರ್ದ್, ಎನನ್ ಮಂತ್ರಿ ಮಲ್ಪಂದಿನೆಕ್ ರಾಜ್ಯೊದ ಮುಖ್ಯಮಂತಿರ್ಲೆಗ್ ಸೊಲ್ಮೆ ಸಂದಾವೆ ಪಂದ್ ಕುಟ್ಟುದ್ ಪಾತೆರ್ದ್ ತನ್ನ ಅಸಮಾಧಾನ, ಬೆಸರ್, ಪಿಸ್‌ರ್‌ನ್ ಪಿದಯಿ ಪಾಡ್ಯೆರ್.

ದುಂಬುದ ಒವ್ವೇ ಮುಖ್ಯಮಂತಿರ್ಲುಲಾ ಜಾತಿ ರಾಜಕಾರಣ ಮಲ್ದಿಜೆರ್. ಕಾಗೋಡು ತಿಮ್ಮಪ್ಪೆರ್, ಬಂಗಾರಪ್ಪೆರ್ ಜಾತಿ ರಾಜಕಾರಣ ಮಲ್ದಿಜೆರ್. ವೇಸ್ಟಿ ತುತ್ತೊಂದು, ವಾಚ್ ಕಟ್ಟೊಂದು ಖಾಕಿ ಚಡ್ಡಿ ಪಾಡೊಂದು, ಸಮಾಜವಾದಿ ಪಂದ್ ಪಂಡ ಆಪುಜಿ. ಯಾನ್ ಮೂಜಿ ಸರ್ತಿ ಸೋತ್‌ದಿಪ್ಪೆ, ಆಂಡ ನನಲಾ ಸೈದಿಜಿ. ಸೈಟ್ ಕಂಡ್‌ದ್ ಮಾರುನಾಯೆ ಎನ್ನ ಬಗೆಟ್ ಪಾತೆರ್ವೆ. ಆಂಡ ಸ್ವಾಭಿಮಾನ ಬೂಡ್ತಿನಾಯೆ ಯಾನತ್ತ್. ದೇವರಾಜ ಅರಸುನ ಕಾರ್‌ಡ್ ಕುಲ್ಲುಂಡ ದೇವರಾಜ ಅರಸು ಆಪುಜೆರ್. ದೇವರಾಜ ಅರಸುನ ಚಿಂತನೆ ಬೋಡು ಪಂದ್ ಸಿಎಂ ಸಿದ್ದರಾಮಯ್ಯೆರೆನ ವಿರುದ್ಧ ವಾಗ್ದಾಳಿ ಮಲ್ತೆರ್.

ಯಾನ್ ಮಂತ್ರಿ ಆತುವೆಂಡ ಸಮುದಾಯೊದ ಝನೊಕ್ಲೆನೊಟ್ಟುಗು ಇಪ್ಪೆರೆ ಆತುವಂದ್. ಯಾನ್ ಮುಖ್ಯಮಂತ್ರಿ ಅತ್ತ್ಂಡ ಮಂತ್ರಿ ಆಪೆ ಪಂದ್ ಸಮುದಾಯೊದ ಏರ್ಲಾ ಕನ ಕಟ್ಟೊರ್ಚಿ ಈಡಿಗ, ಬಿಲ್ಲವ, ನಾಮಧಾರಿ ಸಮುದಾಯೊದಕುಲು ಕಾಲಿ ಕರ್ನಾಟಕೊಡು ಮಾತ್ರ ಅತ್ತ್, ಮಾತಾ ರಾಜ್ಯೊಲೆಡ್ಲಾ ಉಲ್ಲೆರ್. ದೇವರಾಜ ಅರಸುನ ಬಗೆಟ್ ಭಾಷಣೊಡು ಉದ್ದ ಉದ್ದ ಪಾತೆರುನ ನಮ ಆರೆನ ಪುಲ್ಲಿಗ್ ಒವ್ವೇ ಅಧಿಕಾರೊನು ಕೊರ್ತುಜ ಪಂದ್ ಅವಮಾನ ಆವೊಂದುಂಡು ಪಂದ್ ಪಂಡೆರ್.