Last updated on September 8th, 2023 at 05:40 pm
ಬರ್ಪಿನ ಲೋಕಸಭೆತ ವೋಟುಡು ಜೆಡಿಎಸ್ ಬೊಕ್ಕ ಬಿಜೆಪಿ ಒಟ್ಟುಗು ಕಲೊಕು ಜಪ್ಪುನೆತ ಬಗೆಟ್ ದುಂಬುದ ಮುಖ್ಯಮಂತಿರ್ಲಾಯಿನ ಬಿ.ಎಸ್. ಯಡಿಯೂರಪ್ಪೆರ್ ಬೊಕ್ಕ ಬಸವರಾಜ ಬೊಮ್ಮಾಯೆರ್ ಪತ್ತ ಸುದ್ದಿ ಕೊರ್ತೆರ್.
ಕರ್ನಾಟಕ ವಿಧಾನಸಭೆ ವೋಟು ಆಯಿಬೊಕ್ಕ ಜೆಡಿಎಸ್ ಬೊಕ್ಕ ಬಿಜೆಪಿ ಒಂಜಾಪಿನ ಬಗ್ಗೆ ರಾಜ್ಯ ರಾಜಕಾರಣೊಡು ಬಾರೀ ಕೇಂದ್ ಬರೊಂದಿತ್ತ್ಂಡ್. ಆಂಡ, ಅಪಗ ಕೆಲ ನೆವನೊರ್ದಾವರ ಜೆಡಿಎಸ್ ಪಿರ ಜಾರ್ದಿತ್ತ್ಂಡ್. ಇತ್ತೆ ಪಿರ ಬಿಜೆಪಿ- ಜೆಡಿಎಸ್ (BJP-JDS) ಮೈತ್ರಿದ ಸುದ್ದಿ ಅಡಿಲಕ್ಕೊಂದಿತ್ತ್‌ದ್, ರಡ್ಡ್ ಪಕ್ಷೊಲುಲಾ ಮೈತ್ರಿ ಮಲ್ತೊನೆರ ಒತ್ತೊಂದ. ಜೆಡಿಎಸ್ ಬೊಕ್ಕ ಬಿಜೆಪಿ ಒಟ್ಟುಗು ಲೋಕಸಭೆ ವೋಟುದ (Loksabha Elections 2024) ಕಲೊಕು ಜಪ್ಪುನ ಪಂದ್ ನಿಗಂಟ್ ಆತ್ಂಡ್.
ಬೆಂಗ್ಳೂರ್‌ಡ್ ಈ ಬಗ್ಗೆ ಇನಿ (ಸೆಪ್ಟೆಂಬರ್ 08) ನಡತಿನ ಸುದ್ದಿಗೋಷ್ಠಿಡ್ ಪಾತೆರ್ನ ಯಡಿಯೂರಪ್ಪೆರ್, ಜೆಡಿಎಸ್‌ದ ಒಟ್ಟುಗು ಮೈತ್ರಿಗ್ ಹೈಕಮಾಂಡ್, ಕೇಂದ್ರ ಗೃಹ ಸಚಿವೆ ಅಮಿತ್ ಶಾ ಒತ್ತೊಂದೆರ್. JDSದ ಒಟ್ಟುದ ಈ ಮೈತ್ರಿ ಪಕ್ಷೊಗು ಸಕಾಯ ಆವರೆ ಉಂಡು ಪಂದ್ ಪಂಡೆರ್.
ಹಾಸನ, ಮಂಡ್ಯ, ಚಿಕ್ಕಬಳ್ಳಾಪುರ, ಬೆಂಗಳೂರು ಗ್ರಾಮಾಂತರ ಬೊಕ್ಕ ಕೋಲಾರ ಲೋಕಸಭಾ ಕ್ಷೇತ್ರೊಲು ಎಂಕ್ಲೆಗ್ ಬೋಡು ಪಂಡ್‌ದ್ ದೇವೇಗೌಡೆರ್ ಕೇಂದಿತ್ತೆರ್ ಪಂದ್ ತೆರಿದ್‌ಬೈದ್ಂಡ್. ಆಂಡ ಅಮಿತ್ ಶಾ ಇತ್ತೆಗ್ ನಾಲ್ ಲೋಕಸಭಾ ಕ್ಷೇತ್ರೊಲೆನ್ ಜೆಡಿಎಸ್‌ಗ್ ಬುಡ್ದ್ ಕೊರ್ಯೆರ ಒತ್ತೊಂದೆರ್. ಮಂಡ್ಯನ್ ಬುಡ್ದ್ ಒರಿನ ನಾಲ್ ಕ್ಷೇತ್ರೊಲೆಗ್ ಶಾ ಗ್ರೀನ್ ಸಿಗ್ನಲ್ ಕೊರ್ತೆರ್.
ಅಂಚಾದ್ 24 ಕ್ಷೇತ್ರೊಲೆಡ್ ಬಿಜೆಪಿ, 4 ಕ್ಷೇತ್ರೊಲೆಡ್ ಜೆಡಿಎಸ್ ಕಲೊಕು ಜಪ್ಪೆರಗುಂಡು