Last updated on September 23rd, 2023 at 01:15 pm
ಕುಡ್ಲಡ್ ಸಾರ್ವಜನಿಕೆರೆಗ್ ಅಂಚೆನೇ ವಿದ್ಯಾರ್ಥಿಲೆಗ್ ಮಾದಕ ಸೊತ್ತು ಎಂಡಿಎಂಎ ಮಾರೊಂದಿತ್ತಿನ ಇರ್ವೆರೆನ್ ಸಿಸಿಬಿ ಪೊಲೀಸೆರ್ ಕೈದ್ ಮಲ್ದೆರ್. ಉಳ್ಳಾಲ ಸುಭಾಷ್ ನಗರೊದ ಜಾಕೀರ್ (29) ಬೊಕ್ಕ ಬಂಟ್ವಾಳ ಅರ್ಕುಳ ಗ್ರಾಮೊದ ವಳಚ್ಚಿಲ್ ಪದವುದ ಕಾರ್ತಿಕ್ ಸುವರ್ಣ (27) ಕೈದಾತಿನ ಆರೋಪಿಲು.
ಉಳ್ಳಾಲಬೈಲ್‌ದಲ್ಪ ಇರ್ವೆರ್ ಅಕ್ರಮವಾದ್ ಎಂಡಿಎಂಎ ಮಾದಕ ಸೊತ್ತುಲೆನ್ ಸಾರ್ವಜನಿಕೆರೆಗ್ ಅಂಚೆನೇ ವಿದ್ಯಾರ್ಥಿಲೆಗ್ ಮಾರೊಂದಿತ್ತಿನ ಬಗೆಟ್ ಪತ್ತ ಒಲವು ಇತ್ತಿನ ಕುಡ್ಲ ಸಿಸಿಬಿ ಪೊಲೀಸೆರ್ ದಾಳಿ ಮಲ್ತ್‌ದ್ ಆರೋಪಿಲೆನ್ ಕೈದ್ ಮಲ್ದೆರ್. ಮೊಕಲೆರ್ದ್ 20 ಗ್ರಾಂ ತೂಕೊದ 1 ಲಕ್ಷ ರೂ. ಮೌಲ್ಯೊದ ಎಂಡಿಎಂಎ, ಹೋಂಡಾ ಆಕ್ಟಿವಾ ಸ್ಕೂಟರ್, 2 ಮೊಬೈಲ್ ಫೋನ್, 3,300 ರೂ. ಕಾಸ್, ಡಿಜಿಟಲ್ ಸ್ಕೇಲ್‌ನ್ ವಶೊಕು ಗೆತೊಂದೆರ್.
ವಶ ಮಲ್ತೊಂದಿನ ಸೊತ್ತುಲೆನ ಒಟ್ಟು ಮೌಲ್ಯ 2,15,000 ರೂ. ಪಂದ್ ಅಂದಾಜಿ ಮಲ್ದೆರ್. ಆರೋಪಿಲೆನ ವಿರುದ್ಧ ಉಳ್ಳಾಲ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್. ಈ ಮಾದಕ ಸೊತ್ತು ಮಾರಾಟ ಪ್ರಕರಣೋಡು ನನಲಾತ್ ಜನ ಇಪ್ಪುನ ಸಂಶಯ ಇತ್ತ್‌ದ್, ಪತ್ತೆಬೇಲೆ ದುಂಬರಿದ್ಂಡ್. ಆರೋಪಿಲೆಡ್ ಜಾಕೀರ್ ಪನ್ಪಿನಾಯನ ಮಿತ್ತ್ ದುಂಬೊರ ಉಳ್ಳಾಲ ಪೊಲೀಸ್ ಸ್ಟೇಶನ್‌ಡ್ ಬೇಲೆ ಮಲ್ತೊಂದಿತ್ತಿನ ಸರ್ಕಾರಿ ನೌಕರೆರೆನ ಬೇಲೆಗ್ ಅಡ್ಡಬತ್ತಿನ, ಕೆರ್ಯೆರ ಪುನೆತಿನ ಆರೋಪಡ್ ಪ್ರಕರಣ ದಾಕಲಾದಿತ್ತ್ಂಡ್. ಕುಡೊರಿ ಆರೋಪಿ ಕಾರ್ತಿಕ್‌ನ ಮಿತ್ತ್ ಬಡೆಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್‌ಡ್ ದ್ವಿಚಕ್ರ ಗಾಡಿನ್ ಕಂಡಿನ ಪ್ರಕರಣ ದಾಕಲಾದಿತ್ತ್ಂಡ್.