Last updated on September 25th, 2023 at 05:42 pm
ಕರ್ನಾಟಕ ಬೊಕ್ಕ ತಮಿಳುನಾಡ್‌ದ ನಡುತ ಕಾವೇರಿ ಲಡಯಿ ಕುಡ ಅಡಿಲಕ್ಕ್‌ದ್ಂಡ್. ಕರ್ನಾಟಕೊಡು ನೀರ್‌ಗ್ ಕುಂದೆಲ್ ಇತ್ತ್ಂಡಲಾ ತಮಿಳುನಾಡ್‌ಗ್ ನೀರ್ ಬುಡರೆ ಆದೇಶ ಇತ್ತಿನವು ಇತ್ತೆ ರಾಜ್ಯಸರಕಾರದ ವಿರುದ್ದ ಜನಕುಲು ತಿರ್ಗ್‌ದ್ ಬೂರುಲೆಕ್ಕ ಆತ್ಂಡ್. ಮಾಜಿ ಪ್ರಧಾನಿ ದೇವೇಗೌಡೆರ್ ಪ್ರಧಾನಿ ಮೋದಿಯೆರೆಗ್ ಓಲೆ ಬರೆದ್ ರಡ್ಡ್ ರಾಜ್ಯೊಲೆನ ನಡುಟು ಮಧ್ಯಸ್ಥಿಕೆ ಮಲ್ಪೊಡು ಪನ್ದ್ ಕೇನೊಂದೆರ್.
ಈ ದಿಸೆಟ್ ಸೆಪ್ಟೆಂಬರ್ 26ಕ್ಕ್ ಬೆಂಗಳೂರು ಬಂದ್ ಆವರೆ ಉಂಡು. ಅಂಚೆನೆ ಕನ್ನಡಪರ ಸಂಘಟನೆಲು ಸಪ್ಟೆಂಬರ್ 29ಗು ಕರ್ನಾಟಕ ಬಂದ್‌ಗ್ ಲೆಪ್ಪು ಕೊರ್ತೆರ್. ಈ ಬಗೆಟ್ ತುಳು ಸಮಾಚಾರದಕುಲು ತುಳು ಸಂಘಟನೆಲೆನ ಗುರ್ಕಾರ್ಲೆಡ ಪಾತೆರ್ನಗ, ಎಚ್ಚಿನ ತುಳು ಸಂಘಟನೆಲು ಈ ಬಂದ್‌ಗ್ ಎಂಕ್ಲೆನ ಬೆರಿಬಲ ಇಜ್ಜಿ ಪನ್ಡೆರ್. ತುಳುನಾಡ್‌ದ ಜೀವದ ತುದೆ ನೇತ್ರಾವತಿದ ಮೂಲೊಗೇ ಕೊಡರಿ ಪಾಡ್ದ್ ಎತ್ತಿನಹೊಳೆ ಯೋಜನೆ ಮಲ್ಪುನಗ ಒವ್ವೇ ಕನ್ನಡ ಸಂಘಟನೆಲು ತುಳುವೆರೆಗ್ ಬಾಹ್ಯ ಬೆರಿಬಲ ಕೊರ್ತುಜೆರ್. ಆತೇ ಅತ್ತಂದೆ ತುಳುನು ರಾಜ್ಯ ಬಾಸೆ ಮಲ್ಪುನವು ಆವಡ್ ತುಳುನು 8ನೇ ಪರಿಚ್ಚೇದೊಗು ಗೋಡ್ಯಾವುನ ವಿಸಯ ಆವಡ್ ಉಂದೆಟ್ ಮಾತೆರ್ ಕನ್ನಡಿಗೆರ್ ಅವ್ ಕಾಲಿ ತುಳುವೆರೆಗ್ ಬುಡ್ತಿನ ವಿಸಯ ಪನ್ತಿಲೆಕ್ಕ ಇತ್ತೆರ್. ಒರಿಯೇ ಒರಿ ಕನ್ನಡದ ಶಾಸಕೆ ಈ ಇಸಯೊಡು ಪಾತೆರ್ದಿಜೆರ್. ಅಂಚಾದ್ ತುಳುವೆರೆನ ಬೆರಿಬಲ ಇಜ್ಜಿ ಪನ್ದ್ ಪನ್ಡೆರ್. ಕಾವೇರಿಗ್‌ ತುಳುನಾಡ್‌ಗ್ ನಿಡ್ಪ ಸಂಬಂದೊ ಇಜ್ಜಿ, ಎಂಕ್ಲೆಗ್ ಎಂಕ್ಲೆನವೇ ಆಯಿನ ಸಮಸ್ಯೆಲು ಉಲ್ಲ, ಎಂಕ್ಲೆನ ಸಮಸ್ಯೆಲೆಗ್ ಅಕುಲು ಬೆರಿಬಲ ಕೊರಂದಿನಪಗ ನಮ ದಾಯೆಗ್ ಕೊರೊಡು ಪನ್ದ್ ಒರಿ ಕೇಂಡೆರ್.