Last updated on September 24th, 2023 at 08:39 am
ಕಾರ್ಲದ ಪರಶುರಾಮ ಥೀಮ್ ಪಾರ್ಕ್ ಮಲ್ಪುನಗ ಅವ್ಯವಹಾರ ಆತ್ಂಡ್ ಪನ್ಪಿನ ಆರೋಪ ಇತ್ತಿನೆರ್ದಾವರ ಸಚಿವೆದಿ ಲಕ್ಷ್ಮೀ ಹೆಬ್ಬಾಳ್ಕರ್ ಶನಿವಾರ ಉಮಿಕಲ್ ಗುಡ್ಡೆಗ್ ಪೋದು ತೂಯೆರ್. ಈ ಪೊರ್ತುಡು ಈ ಯೋಜನೆದ ಗುತ್ತಿಗೆದಾರೆರ್ ಸಚಿವೆದಿಗ್ ಸಮಗಟ್ಟ್ ಉತ್ತರ ಕೊರಿಯರೆ ದುಂಬು ಪಿರ ತೂಯೆರ್ ಪನ್ದ್ ತೆರಿದ್ ಬೈದ್ಂಡ್.
ಕರಿನ ಸರಕಾರದ ಪೊರ್ತುಡು ಕಾರ್ಲದ ಬೈಲೂರುದ ಉಮಿಕಲ್ ಗುಡ್ಡೆಡ್ ಮಲ್ದಿನ 15 ಕೋಟಿದ ಪರಶುರಾಮ ಥೀಮ್ ಪಾರ್ಕ್ ಕಟ್ಟುನಗ ಮಲ್ಲ ಅವ್ಯವಹಾರ ನಡದ್ಂಡ್. ಉಂದು ಮಲ್ದಿನಕಲೆನ ಮಿತ್ತ್ ಕಾನೂನು ಕ್ರಮ ದೆತೊನುವ ಪನ್ದ್ ಒಡಿಪು ಜಿಲ್ಲಾ ಉಸ್ತುವಾರಿ ಸಚಿವೆದಿ ಲಕ್ಷ್ಮೀ ಹೆಬ್ಬಾಳ್ಕರ್ ಪನ್ತೆರ್.
ಮೂಲು ಉಪ್ಪುನ 33 ಅಡಿತ ಪರಶುರಾಮನ ಮೂರ್ತಿ ಕಂಚಿದ ಅತ್ತ್, ಇತ್ತೆ ಉಪ್ಪುನವು ತಾತ್ಕಾಲಿಕ ಮೂರ್ತಿ. ಅವೆನ್ ದೆತ್ತ್ ನೈಜ ಮೂರ್ತಿ ದೀಪುಂಡು ಪನ್ದ್ ಅದಿಕಾರಿಲು ಒಪ್ಪಸಲೆ ಪಾಡರೆ ತೂಯೆರ್. ಕಾರ್ಲದ ಶಾಸಕೆ ಸುನೀಲ್ ಕುಮಾರೆರ್ನ ಮಹಾತ್ವಾಕಾಂಕ್ಷೆದ ಯೋಜನೆ ಉಂದಾದುಂಡು, ವಿಧಾನಸಭಾ ಚುನಾವಣೆ ಇತ್ತಿನೆರ್ದಾವರ ಅಮಸರೊಡು ಅಪಗದ ಮುಖ್ಯಮಂತ್ರಿ ಬೊಮ್ಮಾಯಿಡ ಥೀಮ್ ಪಾರ್ಕ್ ಉದಿಪನ ಮಲ್ಪಾಂಡ್. ಅಪಗ ಪೊರ್ತು ಉಪ್ಪಂದಿನೆರ್ದಾವರ ಅಮಸರೊಡು ಇತ್ತೆದ ಮೂರ್ತಿ ಮಲ್ದಿನಿ ಪನ್ದ್ ಅಧಿಕಾರಿಲು ಸಚಿವೆದಿಗ್ ಪನ್ಡೆರ್. ಆಂಡ ಆರ್ ಅವ್ ಸದುಕು ಸಮಾದಾನ ಆತಿಲೆಕ್ಕ ತೋಜಿಜಿ.
ಮೂಲು ಉಪ್ಪುನ ಮೂರ್ತಿ ಅಸಲಿಯಾ ನಕಲಿಯಾ ಪನ್ದ್ ಪತ್ರಕರ್ತೆರ್ ಕೇನ್ಡಿನೆಕ್ಕ್, ನಿರ್ಮಿತಿ ಕೇಂದ್ರದಕುಲು ಅವೆತ ಮಂಡೆ ಬದಲ್ಪೊಡು, ಕೈ ಪಗಪೊಡು, ಕಾರ್ ಪಗಪೊಡು ಪನ್ಪೆರ್ ಅವೆಟೇ ನಿಕ್ಲೆಗ್ ತೆರಿಯುಂಡು ಪನ್ದ್ ಪನ್ಡೆರ್.