Last updated on September 22nd, 2023 at 07:28 pm
ಕುಡ್ಲ ಪೇಂಟೆದ ನಂತೂರು ಜಂಕ್ಷನ್‌ಡ್ ಗಾಡಿಲು ಪೋಯೆರೆ ಬರ್ಯೆರೆ ಬಾರಿ ಉಪದ್ರ ಕೊರೊಂದಿತ್ತಿನ ಗುರಿಕ್ಲೆನ್ ಕುಡ್ಲ ನಗರ ಪೊಲೀಸ್ ಅಧಿಕಾರಿಲು ಅಕುಲಾದೇ ಮುಚ್ಚಿದೆರ್. ಈ ಎಡ್ಡೆ ಬೇಲೆನ್ ಸಾರ್ವಜನಿಕೆರ್ ಪುಗರೊಂದುಲ್ಲೆರ್.
ತೆನ್ಕಾಯಿ ಕುಡ್ಲ ವಿಭಾಗೊದ ಸಂಚಾರಿ ಸ್ಟೇಶನ್‌ದ ಸಬ್‌ ಇನ್ಸ್‌ಪೆಕ್ಟರ್ ಈಶ್ವರ ಸ್ವಾಮಿ, ಎಎಸ್‌ಐ ವಿಶ್ವನಾಥ ರೈ ಮೊಕುಲು ಕೊಟ್ಟು, ಪಿಕ್ಕಾಸ್ ಪತ್‌ದ್ ಈ ರಿಪೇರಿ ಬೇಲೆ ಮಲ್ದೆರ್.
ಎಚ್ಚಿನ ಅಪಘಾತೊಲು ಆವೊಂದಿತ್ತಿನ ಈ ಜಾಗೆ ರಾಷ್ಟ್ರೀಯ ಪೆರ್ಸಾದಿ ಪ್ರಾಧಿಕಾರ ಬೊಕ್ಕ ಕುಡ್ಲ ಮಹಾನಗರ ಪಾಲಿಕೆದ ಸೀಮೆಗ್ ಬರ್ಪುಂಡು. ಮುಲ್ಪದ ತಿರ್ಗೆಲ್‌ದ ಸಾದಿಡ್ ಕರಿನ ಒಂತೆ ತಿಂಗೊಲುರ್ದಿಂಚಿ ಗುಂಡಿ ಗುರ್ಂಪುಲು ಬೂರ್ದ್ ಅಲಕ್ಕ ತೆಟ್ಟ್‌ದಿತ್ತ್ಂಡ್.
ಒಂಜಿ ರಡ್ಡ್ ಸರ್ತಿ ಮುಲ್ಪ ತೇಪೆ ಪಾಡುನ ಬೇಲೆ ನಡತ್ಂಡಲಾ ಮತ್ತೆ ಕುಡ ಕುಡ ದುಂಬುದ ಲೆಕಾನೆ ಆವೊಂದಿತ್ತಿನೆರ್ದಾವರ ಗಾಡಿದಕುಲು ಐಟ್‌ಲಾ ಬೈಕ್ ಸ್ಕೂಟರ್ ಬುಡ್ಪಿನಕುಲು ಜೂವ ಕೈಟ್ ಪತೊಂದೇ ಗಾಡಿ ಬುಡೊಡಿತ್ತ್ಂಡ್.
ಪೇಂಟೆದ ಸಾದಿಲೆನೊಟ್ಟುಗು 2 ಪ್ರಮುಖ ರಾಷ್ಟ್ರೀಯ ಪೆರ್ಸಾದಿಲುಲಾ ನೆಟೆ ಪೋಪುನೆರ್ದಾವರ ಸಂಚಾರ ವ್ಯವಸ್ಥೆಗ್ಲಾ ಬಾರಿ ಬಂಙ ಆವೊಂದಿತ್ತ್ಂಡ್. ಒಟ್ಟುಗು ಪೊಲೀಸ್ ಸಿಬ್ಬಂದಿಲಾ ಕೈಟ್ ಜೂವ ಪತೊಂದೇ ಬೇಲೆ ಮನ್ಪೊಡಿತ್ತ್ಂಡ್.
ಗುಂಡಿ ಗುರ್ಮ್ಪುಲೆರ್ದಾವರ ಸಮ ಗಾಡಿ ಬುಡೆರಾವಂದೆ ದಿನೊಲಾ ಟ್ರಾಫಿಕ್ ಬ್ಲಾಕ್‌ಲಾ ಆವೊಂದಿತ್ತ್ಂಡ್.
ಸಂಬಂಧಿತಿನ ಅಧಿಕಾರಿಲೆನ ಗೇನೊಗು ಕನತ್ಂಡಲಾ ಪ್ರಯೋಜನ ಆವಂದಿನೆರ್ದಾವರ ಪೊಲೀಸೆರ್ ಅಕುಲಾದೇ ಕೊಟ್ಟು ಪಿಕ್ಕಾಸ್ ಪತ್ತ್‌ದ್, ಕಾಂಕ್ರೀಟ್ ತರ್ಪಾದ್ ಗುರಿಕ್ಲೆನ್ ಮುಚ್ಚುನ ಬೇಲೆ ಮಲ್ದೆರ್.
