Last updated on September 22nd, 2023 at 07:02 am
ಬಂಟ್ವಾಳ: ಉಸಾರಿಜ್ಜಿ ಪಂದ್ ಆಸ್ಪತ್ರೆಡ್ ಮರ್ದ್ ಮಲ್ತೊಂದಿತ್ತಿನ ಪೋಲಿಸ್ ಸಿಬ್ಬಂದಿ ಒರ್ಯನ ರಡ್ಡ್ ಮೊಬೈಲ್ ಫೋನ್ ಕಂಡ್‌ದ್ ಪೋತಿನ ನಡಕೆ ಬಂಟ್ವಾಳ ತಾಲೂಕ್ ಸಾರ್ವಜನಿಕ ಆಸ್ಪತ್ರೆಡ್ ನಡತ್‌ದ್ಂಡ್.
ಮೆಲ್ಕಾರ್ ಟ್ರಾಫಿಕ್ ಎಚ್.ಸಿ.ದೇವರಾಜ್ ಪನ್ಪಿನಾರ್ ಉಸಾರಿಜ್ಜಂದಿನೆರ್ದಾವರ ಸೆಪ್ಟೆಂಬರ್ 17 ದಾನಿ ಬಂಟ್ವಾಳ ಸಾರ್ವಜನಿಕ ಆಸ್ಪತ್ರೆಗ್ ದಾಕಲಾದ್ ಐಸಿಯು ಘಟಕೊಡು ಮರ್ದ್ ಗೆತೊನೊಂದಿತ್ತೆರ್.
ಬೊಕ್ಕ ಆರ್ ಸೆಪ್ಟೆಂಬರ್ 19 ಗ್ ಜನರಲ್ ವಾರ್ಡ್‌ಗ್ ಶಿಫ್ಟ್ ಆದಿತ್ತೆರ್. ಆರ್ ಬೆಡ್‌ಡ್ ಜೆತ್ತ್‌ದಿಪ್ಪುನಗ ಬೆಡ್‌ದ ಬರಿತ ಟೇಬಲ್‌‌ಡ್ ದೀದಿತ್ತಿನ ಒಂಜಿ ಮಲ್ಲ ಸ್ಮಾರ್ಟ್ ಫೋನ್ ಬೊಕ್ಕ ಕೀ ಪ್ಯಾಡ್ ಮೊಬೈಲ್ ಫೋನ್ ರಡ್ಡೆನ್ಲಾ ಕಲ್ವೆ ಕಂಡ್‌ದ್ ಕೊನೊತಿನ ಬಗ್ಗೆ ವರದಿ ಆತ್ಂಡ್.
ಕಲ್ವೆ ಮೊಬೈಲ್ ಕಂಡಿನ ಅಂಚೆನೇ ಆಯೆ ಆಸ್ಪತ್ರೆಗ್ ಬತ್ತ್ ಪೋಪುನ ಫೂಟೇಜ್ ಸಿ.ಸಿ.ಕ್ಯಾಮರಾಡ್ ಕೈದಾತ್ಂಡ್.
ಆಯೆನೇ ಕರಿನ ವಾರೊಡು ಐಸಿಯು ಘಟಕೊಗು ಪೊಗ್ಗುದು ಅಲ್ಪ ಮರ್ದ್ ಗೆತೊನೊಂದಿತ್ತಿನ ಅಜ್ಜಿ ಒರ್ತಿಡ ಒರ ಪೋನ್ ಕೊರ್ಲೆ ಅರ್ಜೆಂಟ್ ಪೋನ್ ಮನ್ಪೆರ ಉಂಡು ಪಂಡ್‌ದ್ ಮೊಬೈಲ್ ಸೀದ ಪತೊಂದು ಪೋದಿತ್ತೆ.
ಇತ್ತೆ ಆಯೆನೇ ಪೋಲೀಸ್ ಸಿಬ್ಬಂದಿನ ಪೋನ್ ಕಂಡ್‌ದೆ. ಅವ್ವು ಸಿ.ಸಿ.ಕ್ಯಾಮರಾ‌ಡ್ಲಾ ರೆಕಾರ್ಡ್ ಆತ್ಂಡ್.
ಇತ್ತೆ ಆಸ್ಪತ್ರೆಡ್ ಕಲ್ವನ ಪೋಟೋ ಅಂಟಾದ್, ಈ ಮೊಬೈಲ್ ಕಲ್ವನ್ ತೂಯಿನಕುಲು ಅಪಗನೇ ಪೋಲಿಸೆರೆಗ್ ತೆರಿಪಾಲೆ ಪಂದ್ ಸೂಚನೆ ಪಾಡ್ದೆರ್.