Last updated on October 1st, 2023 at 07:23 am
ಮುಲ್ಕಿದ ಕೊಳ್ನಾಡ್‌ಡ್ ಜವನೆ ಒರಿ ಮೊಬೈಲ್ ಟವರ್ ಬರ್ತ್‌ದ್ ಜನೊಕ್ಲೆನ ಮಂಡೆಬೆಚ್ಚಗ್ ನೆವನ ಆತಿನ ನಡಕೆ ನಡತ್‌ದ್ಂಡ್.
ಬಿಜಾಪುರೊದ 32 ವರ್ಸೊದ ಸತೀಶ್ ಪನ್ಪಿನಾಯೆ ಮೊಬೈಲ್ ಟವರ್ ಬರ್ತ್‌ದಿನ ಜನ. ಉ್ಂಬ್ಯೆ ಇನಿ ಕಾಂಡೆ ಕೊಳ್ನಾಡ್‌ಡ್ ಮೊಬೈಲ್ ಟವರ್ ಬರ್ತ್‌ದೆ. ಕಾಂಡೆ 10ಗಂಟೆದ ಅಂದಾಜಿಗ್ ಟವರ್‌ದ ಕೊಡಿಟಿತ್ತಿನಾಯನ್ ತೂದು ಜನೊಕ್ಲೆಗ್ ಮಂಡೆಬೆಚ್ಚ ಆತ್ಂಡ್. ಅಪಗನೇ ಅಲ್ಪದಕುಲು ಮುಲ್ಕಿ ಪೊಲೀಸೆರೆಗ್, ಅಗ್ನಿಶಾಮಕ ದಳೊಕು ಒಲವು ಕೊರ್ತೆರ್. ಮುಲ್ಕಿ ಪೊಲೀಸೆರ್ ಅಂಚೆನೇ ಅಗ್ನಿಶಾಮಕ ದಳೊತಕುಲು ಅಡೆಗ್ ಬತ್ತ್‌ದ್ ಸಾಮಾಜಿಕ ಕಾರ್ಯಕರ್ತೆ ಭೀಮಾಶಂಕರ್‌ರೆನ ಮುಕೇನ ಮೈಕ್‌ಡ್ ಆಯಡ ಪಾತೆರ್ಪಾದ್ ತಿರ್ತ್ ಬರ್ಯೆರ ಪಂತೆರ್. ಆಂಡ ಏರ್ನ ಪಾತೆರಲಾ ಕೇನಂದಿನ ಸತೀಶ್ ಕುಡ ಟವರ್ ಬರ್ತ್‌ದ್ ಹೈಡ್ರಾಮಾ ಉಂಡು ಮಲ್ತ್‌ದೆ.
ಮೂಲತಃ ವಿಜಯಪುರ ಜಿಲ್ಲೆದಾಯೆ ಆಯಿನ ಸತೀಶೆ ಬೆಳಗಾಂ ಸೇರ್ದ್ ಬೇತೆ ನಾಲ್ ಕಡೆಟ್ ಇಂಚೆನೇ ಮೊಬೈಲ್ ಟವರ್ ಬರ್ತ್‌ದ್ ಹೈಡ್ರಾಮಾ ಮಲ್ದೆ ಪಂದ್ ತೆರಿದ್‌ಬೈದ್ಂಡ್. ಆಯೆ ತನ್ನ ಊರ್‌ಗ್ ಮೂಲಭೂತ ಸೌಕರ್ಯೊಲೆನ್ ಕೊರ್ಪಾವೊಡು ಪಂದ್ ಈ ಬೇಲೆ ಮಲ್ತೊಂದುಲ್ಲೆ ಪಂದ್ ಪನೊಂದೆ. ಮೊಬೈಲ್ ಟವರ್‌ಗ್ ಒವ್ವೇ ಬೇಲಿದಾಂತಿನವೇ ಈ ಉಂಬರಗ್ ನೆವನ ಆತ್ಂಡ್ ಪಂದ್ ಅಲ್ಪದಕುಲು ಆಕ್ರೋಶ ತೂಪಾದೆರ್.
ಸುಮಾರ್ 1.15ತ ಅಂದಾಜಿಗ್ ಉ್ಂಬ್ಯೆ ಮೊಬೈಲ್ ಟವರ್‌ರ್ದ್ ಜತ್ತ್‌ದೆ. ಈ ಪೊರ್ತುಡು ಪೊಲೀಸೆರ್, ಅಗ್ನಿಶಾಮಕ ದಳೊತ ಸಿಬ್ಬಂದಿಲು ಅಡೆಗ್ ಬತ್ತಿತ್ತೆರ್. ಆಯೆ ಒವ್ವೇ ಕಲು ಉದ್ದೇಶದಾಂತೆ, ಮಾನಸಿಕ ಅಸ್ವಸ್ಥತೆರ್ದಾವರ ಇಂಚ ಮಲ್ದೆ ಪಂದ್ ಪೊಲೀಸೆರ್ ತೆರಿಪಾದೆರ್.