Last updated on October 1st, 2023 at 05:52 pm
ತುಳುಟು ಸುಮಾರ್ ಪಿಚ್ಚರುಲು ಬರ್ಪ, ಪೋಪ ಆಂಡ ಇಂಚೊಗು ತುಳುಟು ಪ್ರಯೋಗಾತ್ಮಕವಾದ್ ಕೆಲವು ಪಿಚ್ಚರ್ಲು ಬರೊಂದುಲ್ಲ. ಕಾಮಿಡಿ ಮಾತ್ರ ಅತ್ತಂದೆ, ಪತ್ತ ಕತೆ ಉಪ್ಪುನ ಕಮರ್ಷಿಯಲ್ ಪಿಚ್ಚರ್ಲೆನ್ ತುಳುಟು ಎಂಚ ದೆಪ್ಪೊಲಿ ಪನ್ಪಿನೆಕ್ಕ್ ‘ಯಾನ್ ಸೂಪರ್ ಸ್ಟಾರ್’ ಒಂಜಿ ಮಲ್ಲ ಉದಾರ್ಮೆ.
ಒಂಜಿ ಎಡ್ಡೆ ಕತೆನ್ ದೀವೊಂದು, ಒಂಚೂರ್ಲಾ ಬೋರ್ ಆವಂದಿಲೆಕ್ಕ ಸಸ್ಪೆನ್ಸ್, ಕತೆ, ಥ್ರಿಲ್ಲರ್ ದೀವೊಂದು ಮಲ್ದಿನ ಸಂಪೂರ್ಣ ಪಿಚ್ಚರ್ ಉಂಡು. ಸಮ ಆಯಿನ ಪ್ರಮೋಶನ್ ದಾಂತೆನಾ ಅತ್ತ್ ಥಿಯೇಟರ್ ತಿಕ್ಕಂದೆನಾ ದಾನಿಯಾ ಈ ಪಿಚ್ಚರ್ ಇತ್ತಿ ಇಡೀಕ ತುಳುನಾಡ್ಡ್ ಪಡ್ಡೆದ್ರಡ್ ಒಂಜಿ ಶೋ ಅತ್ತಂದೆ ಕುಡ್ಲಡ್ ಒಂಜಿ ಶೋ ಬುಡುಂಡ ಬೇತೆ ಒಲ್ಪಲಾ ತಿಕ್ಕುಜಿ.
ತುಳುಟು ಇತೋರ್ತು ತೊಜಪಾವಂದಿನ ಕತೆನ್ ತೂಪಾವುನ ಮಲ್ಲ ಪುನೆಪುನು ಈ ಪಿಚ್ಚರ್ದಕುಲು ಮಲ್ದೆರ್. ಆಂಡ ಮಲ್ಲ ಬೆಸರ್ದ ಸಂಗತಿ ಪನ್ಡ ಪ್ರತೀ ಸಲ ಪ್ರೊಡ್ಯೂಸರ್ ನಕುಲು ತುಳುಟು ಇಂಚಿನ ಒಂಜಿ ಪುನೆಪು ಮಲ್ಪುನಗ ತುಳುವೆರ್ ಅವೆಕ್ ಸಪೋರ್ಟು ಮಲ್ಪಂದೆ ನನ ದುಂಬುಗ್ ಏರ್ಲಾ ಎಡ್ಡೆ ಪಿಚ್ಚರ್ ಮಲ್ಪರೆ ತುಳುಕು ಕಾಸ್ ಕೊರಿಯರೆ ದುಂಬು ಪಿರ ತೂಪಿಲೆಕ್ಕ ನಮ ಮಲ್ದ. ಉಪ್ಪುನ ರಡ್ಡ್ ಥಿಯೇಟರ್ ಡ್ ಐತಾರದಾನಿಲಾ ಅರ್ದೊಗು ಅರ್ದ ದಿಂಜುಜಿ ಪನ್ಡ ತುಳುವೆರೆಗ್ ಎಡ್ಡೆ ಪಿಚ್ಚರ್ಲು ಬೊಡ್ಚಿ ಪನ್ದ್ ತೋಜುಂಡು.
ದಯಾನಂದ ಶೆಟ್ರೆನ್ ತೂಪಿನನೇ ಪೊರ್ಲು. ಆರ್ ತೆಲ್ಪುನಗ ನಮಲಾ ತೆಲ್ಪುವ, ಆರ್ ಬುಲ್ಪುವಗ ನಮಲಾ ಬುಲ್ಪುವ! ನನ ಸಾಯಿ ಬಲ್ಲಾಳೆರ್ ಭಯಂಕರ ನಟೆ, ಆರ್ ಫ್ರೇಮ್ ಡ್ ಇತ್ತೆರ್ಡ ಬೊಕ್ಕ ಅಲ್ಪ ಏರ್ಲಾ ಬೊಡ್ಚಿ! ಹರೀಶ್ ವಾಸು ಶೆಟ್ಟಿ ಬೊಕ್ಕ ಮಾನಸಿ ಸುಧೀರ್ರೆನ ಬಗೆಟ್ ದಾಲಾ ಪನ್ಪಿನಿ ಬೊಡ್ಚಿ, ಅಕಲೆನ್ ಒರ ನಿಕುಲು ಥಿಯೇಟರ್ಡ್ ಪೋದು ತೂವೊಡು. ನವೀನ್ ಡಿ ಪಡೀಲೆರ್ ಆವಡ್ ಭೋಜರಾಜ್ ವಾಮಂಜೂರ್ ಆವಡ್ ಕಾಲಿ ಕಾಮಿಡಿಗ್ ಮಾತ್ರ ಸೀಮಿತ ಅತ್ತ್ ಅಕಲೆನ ಉಲಯಿದ ಒರಿ ಕಲಾವಿದನ್ ಪಿದಯಿ ಕನರೆ ಈ ಪಿಚ್ಚರ್ಡ್ ಪುನೆಪು ಬೈದೆರ್.
ತುಳುಟು ಮಲಯಾಳಂದಂಚಿನ ಪಿಚ್ಚರ್ ಮಲ್ಪೊಲಿ ಪನ್ದ್ ಪನ್ಪಿನಕುಲು ಈ ಪಿಚ್ಚರ್ ತೂದು ಮಲಯಾಳಂ ಪಿಚ್ಚರ್ಲೆಕ್ಕ ನ್ಯಾಚುರಲ್ ಆದ್ ಉಂಡು ಪನ್ದ್ ಪನ್ಪಿನವು ಮಾತ್ರ ಸತ್ಯ. ಪಡ್ಡೆದ್ರದ, ಮಟ್ಟ್ ದ ಪೊರ್ಲುನು ಅಲ್ಪಲ್ಪ ತೂಪಾವೊಂದು ಪಕ್ಕಾ ಕತೆ ಇತ್ತಿನ ಕಮರ್ಷಿಯಲ್ ಪಿಚ್ಚರ್. ಬೇತೆ ಬಾಸೆದ ಪಿಚ್ಚರ್ಲೆಗ್ ಆತೊಂಜಿ ಪ್ರಮೋಷನ್ ಕೊರ್ಪಿನ ತುಳುವೆರ್ ಈ ಪಿಚ್ಚರ್ ತೂವಂದಿನವು ಬಾರೀ ಬೆಸರ್ದ ಸಂಗತಿ.
ಎಂಕುಲು ತುಳುಸಮಾಚಾರದಕುಲು ಏರೆನ್ಲಾ ಪ್ರಮೋಟ್ ಮಲ್ಪುಜ ಅತ್ತಂದೆ ಕಾಸ್ ದೆತೊಂದು ಎರೆನ ಬಗೆಟ್ಲಾ ಬರೆಪುಜ, ಆಂಡ ಈತ್ ಪೂರಾ ಬರೆಯೊಡಾಂಡ ಉಂದು ಎಂಕುಲು ನಿಜವಾದ್ ಈ ಪಿಚ್ಚರ್ನ್ ಮೆಚ್ಚಿದ್ ಬರೆತಿನಿ. ಅಂಚಾದ್ ತುಳುವೆರೆಡ ಮಾತೆರೆಡ ಕೇನೊನು ಪೋಲೆ, ಈ ಪಿಚ್ಚರ್ ತೂಲೆ, ಒಂಜಿ ವೇಳೆ ಹೌಸ್ ಫುಲ್ ಬಲ್ತ್ಂಡ ತನ್ನಾತೆಗೇ ಬೇತೆ ಬೇತೆ ಥಿಯೇಟರ್ಡ್ಲಾ ಬರ್ಪುಂಡು. ಎಡ್ಡೆ ತುಳು ಪಿಚ್ಚರ್ನ್ ಬುಲೆಪಾಲೆ, ತುಳುನು ಒರಿಪಾಲೆ.