Last updated on October 14th, 2023 at 06:12 pm
ಕರಿನ ವರ್ಸ ತುಳುನಾಡೊರ್ಮೆ ‘ಪಿಲಿ’ ಕುಲೆನ ಅರಬಟ ಜೋರು ಇತ್ತ್ಂಡ್, ಮಾತಾ ಕಡೆಟ್ ಪಿಲಿ ಪನ್ದೇ ಬ್ಯಾನರ್‌ಲೆಡ್ ಇತ್ತ್ಂಡ್ ಮಾತ್ರ ಅತ್ತಂದೆ ತುಳುಲಿಪಿ ಮಾತಾ ಕಡೆಟ್ ಮೆನ್ಕೊಂದಿತ್ತ್ಂಡ್. ಆಂಡ ಈ ಸಲ ಒರಾನೆ ಪಿಲಿ ಪೂರಾ ‘ಹುಲಿ’ ಆತ್ಂಡ್, ಪೇಂಟೆ ನಿಲ್ಕೆ ‘ಹುಲಿ ವೇಷ’, ‘ಹುಲಿ ಕುಣಿತ’ದ ಬ್ಯಾನರ್‌ಲು ತೋಜೊಂದುಲ್ಲ, ಪಿಲಿಏಸ, ಪಿಲಿನಿಲ್ಕೆ ಪೆಜ್ಜಿಂಡ ಪುಂಡಿದಾತ್ ಕಡೆಟ್ ಮಾತ್ರ ಉಂಡು. ಅವ್ಲಾ ಅತ್ತಂದೆ ಕರಿನ ಸಲ ಮಾತಾ ಕಡೆಟ್ ದೆರ್ತ್ ತೋಜೊಂದಿತ್ತಿನ ತುಳು ಲಿಪಿ ಇತ್ತೆ ಮಾಯ ಆತ್ಂಡ್.
ಬಾಸೆ ಬೊಡ್ಚಿ ಸಂಸ್ಕೃತಿ ಬೋಡು ಪನ್ಡ ಅಂಚಿನ ಅಂಗಲಾಪುಗು ಬಿಲೆ ಇಜ್ಜಿ. ತುಳುತ ಪುದರ್ ‘ಪಿಲಿ ಏಸ’, ‘ಪಿಲಿ ನಲಿಕೆ’ನ್ ಬುಡ್ದ್ ಬೇತೆ ಪುದರ್ ದಾಯೆಗ್ ಬೋಡು? ಮಾತೆನ್ಲಾ ಕನ್ನಡೀಕರಣ ಮಲ್ಪುನ ಮರ್ಲ್ ತುಳುವೆರೆನ ಮಂಡೆರ್ದ್ ಯಾಪ ಅಡರುಂಡು? ಅಪಂಡ ನನ ನಿಕ್ಲೆನ ಅಮ್ಮೆರ್, ಅಜ್ಜೆರ್ನ ಪುದರ್ ಪೂವಯ್ಯೆ ಇತ್ತ್ಂಡ ನನ ಹೂವಪ್ಪ ಪನ್ದ್ ಲೆಪ್ಪುವರಾ? ಅಂಗರನ್ ಮಂಗಳ ಪನ್ದ್ ಲೆಪ್ಪುವರಾ? ಏರೆನಾಂಡಲ ಪುದರ್ ‘ನವೀನ್’ ಪನ್ದ್ ಇತ್ತ್ಂಡ ನನ ‘ಹೊಸತು’ ಪನ್ದ್ ಲೆಪ್ಪುವರಾ? ಇಜ್ಜಿ ಪನಿಬೊಕ್ಕ ತುಳುನಾಡ ಸಂಸ್ಕೃತಿ ಪಿಲಿಏಸದ ಪುದರ್ ದಾಯೆಗ್ ಪಗಪುವರ್?
ಒವ್ ಒವ್ ಎಂಚ ಇತ್ತ್ಂಡ ಅಂಚ ಇತ್ತ್ಂಡನೇ ಎಡ್ಡೆ. ಕಾಲ ಬದಲಾಯಿಬೊಕ್ಕ ಆಧುನಿಕತೆಗ್ ಈ ಆಚರಣೊಲು ಒತ್ತೊಂದು ಬೈದ, ಮಲ್ಲೆಜ್ಜಿ ಅಂಚ ಪನ್ದ್ ಆಚರಣೆಲೆನ ಪುದರ್ ಪಗಪುನವು ಏತ್ ಸಮ? ಪಿಲಿ ಏಸೋನು ಪಿಲಿಏಸಂದೇ ಪನೊಡು, ಹುಲಿಕುಣಿತ, Tiger dance ಪನ್ದ್ ಪನ್ಪಿನಕುಲು ನನ ನಿಕಲೆನ ಪುದರ್ ಸಂತೋಷ್ ಆಂಡ Happiness ಪನ್ದ್ ಪನ್ಲೆ, ಪೃಥ್ವಿ ಆಂಡ Earth ಪನ್ದ್ ಪನ್ಲೆ, ವರುಣ್ ಆಂಡ Rain ಪನ್ದ್ ಪನ್ಲೆ!
ಇಂಚೆನೇ ಆಂಡ ಇನಿ ತುಳು ಬಾಸೆ ಬೊಡ್ಚಿ ಪನ್ದ್ ಬೇತೆ ಬಾಸೆ ಪಾಡಿನಕುಲು ಎಲ್ಲೆ ತುಳುವ ಕೊಡಿ ಬೊಡ್ಚಿ ಪನ್ದ್ ಬೇತೆ ಬೆರಕೆ ನಿರೆತ ಕೊಡಿಲಾ ಪತ್ತೆರ್! ನನಾಂಡಲ ಒಂತೆ ತೆರಿದಿನ ತುಳುವೆರ್, ಜವನೆರ್ ಜೆತ್ತಿನಲ್ತ್ ಲಕ್ಕಿಯೆರ್ಡ ಎಡ್ಡೆ.
ಉಂದೆತ ನಡುಟು ಕೆಲವು ಕೂಪೆದ ಪಿಲಿಕುಲು ತುಳು ಮದಪಂದೆ ತುಳು ಲಿಪಿ ಅಂಚೆನೆ ತುಳುನಾಡ ಕೊಡಿನ್ ಪತೊಂದು ಪೆರ್ಮೆಡ್ ರಾಪಾವೊಂದಿಪ್ಪುನವು ನುಂಗೆಲ್ ನೆಲಕ್ ಪನಿ ಬರ್ಸ ಬೂರಿಲೆಕ್ಕ ಒಂತೆ ಸಂಪು ಕೊರ್ಪುಂಡು. ಮೊಕಲೆನ್ ತೂದು ಬಾಕಿದಕುಲುಲಾ ಅಂಚೆನೆ ನಲಿಕೆ ಆಯೋಜನೆ ಮಲ್ಪುನಕುಲು ತುಳುಕು ಸುರುತ ಮಾನಾದಿಗೆ ಕೊರೊಡು, ಕಾಲಿ ಬಾಯಿಡ್ ಅತ್ತ್, ಮಾತಾ ಕಡೆಟ್ಲಾ ತುಳುವೇ ಕೊಡಿ-ಮುನೆ ಆವೊಡು.