Last updated on November 13th, 2023 at 08:56 am
ತುಳುವೆರಾದ್ ನಮ ಪುಟ್ಟಿಯಡಲ ನಮಕ್ ನಮ್ಮ ಅಸ್ಥಿತ್ವದ ಬಗೆಟ್ ಪೊಲಬು ಇಜ್ಜಿ. ಉಂದೆಕ್ ಏರೆನ್ಲಾ ದೂರುದು ದುರ್ಜನೊಗು ಪಾಡ್ದ್ ಪೆರಜನ ಇಜ್ಜಿ. ನಮ ಪುಟ್ಟೊಡ್ಡನೇ ನಮ್ಮ ಅಸ್ಥಿತ್ವೊನು ಪುರುಂಚುನ ಬೇಲೆ ಆತ್ಂಡ್.
ತುಳುವ ಬಾಲೆ ಪುಟ್ಟುದು ನಾಲಯಿ ಮಗ್‌ರಿನೇ ತುಳು ಪಾತೆರುಂಡು ಆಂಡ ಶಾಲೆಗ್ ಪೋಯಿನೇ ಆ ಬಾಲೆ ತುಳು ಪಾತೆರುನನೇ ತಪ್ಪು ಪನಿಲೆಕ್ಕ ಆಪುಂಡು. ತುಳು ಪನ್ಪಿನ ಒಂಜಿ ಬಾಸೆ ವಿದ್ಯೆ ಕಲ್ಪರೆ ಅರ್ಹ ಇತ್ತಿನ ಬಾಸೆ ಅತ್ತ್ ಪನ್ಪಿಲೆಕ್ಕ ತುಳುನು ಕೋಂಟುಗು ನೂಕುದೆರ್. ಉಂದೇ ತುಳುವ ಟೀಚರ್‌ನಕುಲು ಸ್ವಾಭಿಮಾನ ದಾಂತಿಲೆಕ್ಕ ತುಳು ಪಾತೆರಿನ ಜೋಕುಲೆಗ್ ಅಪ್ಪೆ ಬಾಸೆ ಪಾತೆರಿನೆಕ್ಕ್ ಪೆಟ್ಟ್ ಪಾಡಿನಲಾ ಉಂಡು. ಈ ಪೆಟ್ಟ್ ಜೋಕುಲೆಗ್ ದೈಹಿಕೊರ್ದು ಜಾಸ್ತಿ ಮಾನಸಿಕವಾದ್ ಬೇನೆ ಕೊರ್ಪುಂಡು. ಎಲ್ಯಿಡ್ ತುಳು ಪಾತೆರಿನೆಕ್ಕ್ ಬೂರಿನ ಪೆಟ್ಟ್ ತುಳು ಪನ್ಡ ಎಲ್ಯ, ಶಾಲೆಡ್ ಕಲ್ತಿನ ಬಾಸೆ ಮಲ್ಲ ಪನ್ದ್ ಎನ್ನಾವುಂಡು. ಅಂಚಾದ್ ಇತ್ತೆಲಾ ತುಳುವೆರ್ ಒವ್ವೇ ಮಲ್ಲ ಸಭೆ ಸಮಾರಂಬ ಆವಡ್, ಒವ್ವೇ ಪರ್ಬ ಎಡ್ಡೆಮಿಲ್ಲಿಗ್ ಎಡ್ಡೆಪ್ಪು ಆವಡ್, ಒವ್ವೇ ಲೆಪ್ಪೋಲೆಲು ಆವಡ್ ಅವೆನ್ ತುಳುಟು ಮಲ್ಪರೆ ಪಿರ ತೂಪೆರ್, ತುಳುಕು ಅವ್ ಸಾಮರ್ಥ್ಯ ಇಜ್ಜಿ ಅವೆಕ್ ಪೂರಾ ಕನ್ನಡನೇ ಮಲ್ಲ ಪನ್ದ್ ಕನ್ನಡೊಡೇ ಮಲ್ಪುವೆರ್.
ಈತ್ ಮಾತ್ರ ಅತ್ತಂದೆ ಎಲ್ಯ ಬಾಲೆ ಶಾಲೆಗ್ ಪೋನಗ ಶಾಲೆದ ಪಾಟ ಪುಸ್ತಕೊಲೆಡ್, ನಮ್ಮ ನಾಡು ಕನ್ನಡ ನಮ್ಮ ಭಾಷೆ ಕನ್ನಡ ನಮ್ಮ ಉಸಿರು ಕನ್ನಡ ಪನ್ದ್ ಕಲ್ಪಾವೆರ್. ಮಾತೃಬಾಸೆದ ಕಲ್ಪನೆ ದಾಂತಿನ ಬಾಲೆದ ಪಜ್ಜಿ ಮನಸ್‌ಗ್ ಉಂದೆನ್ ಪೂರಾ ದಿಂಜಾದ್ ಮಾನಸಿಕವಾದ್ ಅಕಲೆನ್ ಅಪ್ಪೆ ಬಾಸೆ ತುಳು, ಅಪ್ಪೆ ನಾಡ್ ತುಳುತ ಅಸ್ತಿತ್ವ ಮದಪುಲೆಕ್ಕ ಮಲ್ಪುವೆರ್. ಇಂಚಿನ ಜೋಕುಲೆಗ್ ತುಳು ಬಾಸೆಗ್ ಆತಿನ ಅನ್ಯಾಯದ ಪೊಲಬು ಉಪ್ಪಾ? ತುಳು ಪನ್ಪಿನ ಬಾಸೆಗ್ ಒವ್ವೇ ಸ್ಥಾನಮಾನದ ಅಗತ್ಯ ಇಜ್ಜಿ, ತುಳು ಆಡಳಿತೊದ, ಸಾಹಿತ್ಯದ, ಶಿಕ್ಷಣದ ಬಾಸೆನೇ ಅತ್ತ್ ಅವ್ ಕಾಲಿ ಇಲ್ಲಡ್ ಪಾತೆರುನ ಬಾಸೆ ಪನ್ದ್ ಜೋಕುಲೆಗ್ ಎಲ್ಲಿಡೇ ಮಂಡೆಗ್ ದಿಂಜಾದ್ ಅಕಲೆನ ಉಡಲ್‌ಡ್ ಮಾನಸಿಕವಾದ್ ತುಳುರ್ದು ದೂರ ಮಲ್ತಿನವು ಸುಳ್ಳಾ?
ಮಲ್ಲ ಮಲ್ಲ ಧರ್ಮ ಸಂರಕ್ಷಣೆ ಮಲ್ಪರೆ ಪಿದಡುನ ತುಳುವೆರೆಗ್ ದಾಯೆಗ್ ಅರ್ಥ ಆಪುಜಿ ತುಳುರ್ದು ಮಲ್ಲ ಧರ್ಮ ಇಜ್ಜಿ ಪನ್ದ್? ಪಿದಯಿದಕಲೆನ ಆಕ್ರಮಣದ ಮಿತ್ತ್‌ಲಾ ಇನಿ ತುಳುನಾಡ್‌ನ್ ರಕ್ಷಣೆ ಮಲ್ದಿನ ದೈವೊಲೆನ ಧರ್ಮ ತುಳು, ಇನಿ ತುಳು ಅಪ್ಪೆನ ಸಿರಿ ತುಪ್ಪೆಡ್ ಬಗೆತಿನಾತ್ ಪೊಲಿ ತಿಕ್ಕುನಗ ಪೆದ್ದ್ಂಡ ಅಪ್ಪೆ ಆದ್ ತಾಂಕ್‌ಡ ತಮ್ಮಲೆ ಆದ್ ತುಳುನಾಡೊರ್ಮೆ ಉಪ್ಪುನ ಧರ್ಮ ತುಳು. ನಮಕ್ ಉಪ್ಪುನ ಅಸ್ಥಿತ್ವ ತುಳು ಮಾತ್ರ, ಯಾಪ ತುಳು ಪೋಪುಂಡಾ ಆನಿ ತುಳುನಾಡ್‌ರ್ದ್ ದೈವೊಲು ಪೋಪ, ಧರ್ಮ ಪೋಪುಂಡು, ಸಂಸ್ಕೃತಿ ಪೋಪುಂಡು. ತುಳುವ ಧರ್ಮ ಒರಿಯೊಡಾಂಡ ತುಳು ಒರಿಯೊಡು. ಇನಿ ತುಳುತ ಮುದೆಲ್‌ಗೇ ತೂ ತಾಗೊಂದುಂಡು, ಅಕುಲು ಮೊಕುಲು ನಿಕಲೆನ ಬಾಸೆಗ್ ಮಾನಾದಿಗೆ ಕೊರ್ಪಾವ ಪನ್ದ್ ತುಳುವೆರೆನ್ ಮಂಗಕೋಲ ಕಟ್ಟಾವೊಂದುಲ್ಲೆರ್. ಏರಾ ಒರಿ ದಾದನಾ ಸ್ಟೇಟ್ಮೆಂಟ್ ಕೊರಿನೇನೇ ಬಂಜರ ಆಯಿಲೆಕ್ಕ ತುಳುವೆರ್ ಪಟ್ಟೊಂದುಲ್ಲೆರ್, ಆಂಡ ತುಳುತ ಫೈಲ್ ಮಾತ್ರ ಅಲ್ಪ ಒಲ್ಪನಾ ವಿಧಾನಸಭೆಟ್ ದೂಳು ಪತ್ತೊಂದುಂಡು. ರಾಜಕೀಯದಕಲೆಗ್ ದಗಲ್ಬಾಜಿಯೇ ಧರ್ಮ ಆಂಡ ತುಳುವೆರ್ ಮಾತ್ರ ಆ ದಗಲ್ಬಾಜಿದ ಬಲೆಟ್ ಬೂರ್ದ್ ಎಡ್ಡೆ ಗೊಬ್ಬೊಂದುಲ್ಲೆರ್. ಇನಿ ಪತ್ತ್ ಪದಿನೈನ್ ಜವನೆರ್ ತುಳುಕು ಪೊರುಂಬುವ ಪನ್ದ್ ಬನ್ನಗ ಅಕಲೆಗೇ ಮಕ್ಕರ್ ಮಲ್ಪುನಡೆ ಮುಟ್ಟ ತುಳುವೆರ್ ಎತ್ತ್‌ದೆರ್, ಉಂದು ಗುಲಾಮಿತನ ಅತ್ತಂದೆ ಬೊಕ್ಕ ದಾದ? ಸರಿ ತಪ್ಪು ತೆರಿಯಂದೆ ತುಳುವೆರ್ ಇನಿ ಅಪ್ಪೆ ಬಾಸೆನ್ ಮದತೊಂದು ಕುಡೊಂಜಿ ಬಾಸೆದ ಕೊಡಿ ಪತ್ತೊಂದು ಲೇಲೆ ಪಾಡ್ನಗ ತುಳುವಪ್ಪೆ ಇಂಚ್ನ ಜೋಕುಲೆನ್ ಪೆದ್ದಂದೆ ಗೊಡ್ಡು ಆದ್ ಇತ್ತ್ಂಡನೇ ಏತೋ ಎಡ್ಡೆ ಇತ್ತ್ಂಡ್ ಪನ್ದ್ ಆಪುಂಡು.