Last updated on November 14th, 2023 at 07:04 pm
ತಿರ್ಬಂಜಿದ ಸ್ನಾಯುಲೆನ ಸಮಸ್ಯೆರ್ದ್ ಜೀವದ ಉಲಯಿದ ಬಾಗೊ ಪಿದಯಿ ನೂಕಿಲೆಕ್ಕ ಆಂಡ ಹರ್ನಿಯಾದ ಸಮಸ್ಯೆ ಉಂಡು ಪನ್ದ್ ಪನ್ಪೆರ್. ಸಾಮಾನ್ಯವಾದ್ ಉಂದು ಒವ್ವೇ ಸೀಕ್‌ದ ಲಚ್ಚನ ತೂಪಾವುಜಿ. ಒಂಜಿ ಗೆಡ್ಡೆಲೆಕ್ಕ ಉಪ್ಪುಂಡು. ಜೆಪ್ಪುನಗ ಈ ಗೆಡ್ಡೆ ಪಿರ ಪೋಯಿಲೆಕ್ಕ ಅತ್ತಂದೆ ಗೆಡ್ಡೆನೇ ಉಪ್ಪಂದಿಲೆಕ್ಕ ಅನುಭವೊಗು ಬರ್ಪುಂಡು.
ಪೊಟ್ಟೆದ ಹರ್ನಿಯಾ :
ಪೊಟ್ಟೆಡ್ ಚರ್ಬಿದ ಮಾಸ ಇಜಿಂಡ ಕರ್ಲ್‌ದ ಒಂಜಿ ಬಾಗೊರ್ದು ಈ ಹರ್ನಿಯಾ ತೋಜುಂಡು. ಉಂದು ಒಂಜಿ ಪೊಟ್ಟೆ ಇಜಿಂಡ ರಡ್ಡೆಟ್ಲಾ ತೋಜು. ಉಂದು ಎಚ್ಚಾದ್ ಅಂಜೊವುಲೆಗ್ ಬರ್ಪುಂಡು, ಬೊಕ್ಕ ಮಾತಾ ಪ್ರಾಯದಕಲೆಗ್ಲಾ ಬರು.
ಪೊಟ್ಟೆದೆಲುತ ಹರ್ನಿಯಾ :
ಉಂದು ಎಚ್ಚಾದ್ ಪೊಂಜೊವುಲೆಡ್ ತೋಜಿಗ್ ಬರ್ಪುಂಡು ಆಂಡ ಪೊಟ್ಟೆದ ಹರ್ನಿಯಾದಾತ್ ಉಂದು ಬರ್ಪುಜಿ. ಉಂದುಲಾ ಪೊಟ್ಟೆದ ಚರ್ಬಿ ಅಂಚೆನೆ ಪೊಟ್ಟೆದ ಉಲಯಿದ ಮಿತ್ತ್‌ದ ಜಾಗೆ ಕರ್ಲ್ ಗ್ ಕಂತೊಂದಿಪ್ಪುನಗ ಆಪುಂಡು.
ಪೂವೊಲುದ ಹರ್ನಿಯಾ :
ಕರ್ಲ್‌ದ ಭಾಗ ಇಜಿಂಡ ಚರ್ಬಿದ ಅಂಗಾಂಶ ಪೂವೊಲುರ್ದು ಪಿದಯಿ ತೋಜಿನಗ ಪೂವೊಲುದ ಹರ್ನಿಯಾ ಆಪುಂಡು. ಬಾಲೆ ಪುಟ್ಟುನಗ ಪೂವೊಲಬೂರು ಬಂಜಿನ್ ಸಮಗಟ್ಟ್ ಮುಚ್ಚಿಜಿಡ ಉಂದು ಬರ್ಪುಂಡು. ಪ್ರಾಯದಕಲೆಗ್ ಬಂಜಿದ ಮಿತ್ತ್ ಒತ್ತಡ ಬೂರ್ನಗ ಇಜಿಂಡ ಗರ್ಭಧಾರಣೆ, ತೋರ ಜೀವೊಗು ಬರ್ಪುನ ಸಾಧ್ಯತೆ ಉಂಡು.
ಈತೇ ಅತ್ತಂದೆ ದುಂಬು ಆಪರೇಶನ್ ಆದಿತ್ತ್ಂಡ ಆ ಪೊರ್ತುದ ಗಡಿರ್ದ್ ಬಂಜಿದ ಮಿತ್ತ್ ಹರ್ನಿಯಾ ತೋಜಿದ್ ಬರು.
ಸಮಸ್ಯೆ ತೋಜಿನ ಜಾಗೊಡು ಡಾಕ್ಟರ್ ಪರೀಕ್ಷೆ ಮಲ್ತ್ ಅವ್ ಹರ್ನಿಯಾನ ಅತ್ತಾ ಪನ್ದ್ ತೂಪೆರ್. ಕುಡ ಸ್ಕ್ಯಾನ್ ಮಲ್ತ್ ಹರ್ನಿಯಾ ಉಂಡಾ ಪನ್ದ್ ತೂವೊಡಾಪುಂಡು. ಹರ್ನಿಯಾ ದೃಢ ಆಯಿಬೊಕ್ಕ ಅಪರೇಶನ್ ಬೋಡಾ ಬೊಡ್ಚಾ ಪನ್ದ್ ಸರ್ಜನ್ ತೂಪೆರ್. ಹರ್ನಿಯಾನ್ ದೆಪ್ಪೊಡಾಂಡ ಆಪರೇಶನ್ ಮಲ್ತ್ ಮಾತ್ರ ದೆಪ್ಪರೆ ಆಪಿನಿ. ಉಂದೆನ್ ಡೇ ಕೇರ್ ವಿಧಾನೊಡು ಮಲ್ಪೊಲಿ. ಕೆಲವು ಹರ್ನಿಯೊಲು ಕರ್ಲ್ ಪುರುಂಚುನ ಇಜಿಂಡ ಕರ್ಲ್ ಗ್ ಪೆಟ್ಟ್ ಮಲ್ಪುನ ಸಾಧ್ಯತೆ ಉಪ್ಪುನೆರ್ದ್ ಆಪರೇಶನ್ ಮಲ್ಪುನ ಅಗತ್ಯ ಉಪ್ಪುಂಡು.
ಬಂಜಿ ಬೇನೆ ಇಜಿಂಡ ಹರ್ನಿಯಾ ಇತ್ತಿನ ಜಾಗೊಡು ಒರಾನೆ ಬೇನೆ ಲಕ್ಕುನು, ಉರ್ಚರೆ ಬಂಗ ಆಪಿನಿ, ಬುಡಂದೆ ಕಕ್ಕರೆ ಬರ್ಪಿನಿ ಉಂದೆಟ್ ಪೂರಾ ಹರ್ನಿಯಾ ಉಂಡಾ ಇಜ್ಜಾ ಪನ್ದ್ ದೃಢ ಮಲ್ಪೊಲಿ. ಪೊಂಜೊವುಲೆರ್ದ್ ಜಾಸ್ತಿ ಅಂಜೊವುಲೆಗ್ ಹರ್ನಿಯಾ ಸಮಸ್ಯೆ ತೋಜಿದ್ ಬರ್ಪುಂಡು. ಅಂಜೊವುಲೆಗ್ ಎಚ್ಚಾದ್ ಪೊಟ್ಟೆದ ಸಂದ್ ಲೆಡ್ ಬೇನೆ ಲಕ್ಕುಂಡು. ದಾದಾಂಡಲ ದುನ್ನ ದೆರ್ಪುನಗ ಬೇನೆ ಆಪುಂಡು. ಹರ್ನಿಯಾ ಇತ್ತಿನಲ್ಪದ ಗಂಟ್ ಇಜಿಂಡ ಮಾಸದ ಮುದ್ದೆ ದಿನ ಪೋಯಿಲೆಕ್ಕ ಮಲ್ಲ ಆಯಿಲೆಕ್ಕ ಆಪುಂಡು. ಇಂಚಿನ ಸಮಸ್ಯೆ ಬತ್ತಿನಪಗನೇ ಡಾಕ್ಟರೆಗ್ ತೂಪಾವೊಡು. ಉಂದೆನ್ ಅಂಚೆನೇ ದೀನ್ಡ ಜೀವೊಗು ಪೆಟ್ಟ್.