Last updated on November 21st, 2023 at 12:48 pm
ಕುಂದಾಪುರ: ಕುಂದಾಪುರ ಸಾರ್ವಜನಿಕ ಆಸ್ಪತ್ರೆಡ್ ಪೆದ್ದುನ ಪೊರ್ತುಡು ಬೈದ್ಯೆರೆ ನಾಮಾಸ್‌ರ್ದಾವರ ಬಾಲೆ ತೀರ್ದ್ಂಡ್ ಪಂದ್ ಆರೋಪಿತ್‌ದ್ ಆಸ್ಪತ್ರೆದ ಎದುರು ಬಾಲೆನ್ ಕಲೆವೊಂಡಿನ ಪೋಷಕೆರೆ ಒಟ್ಟುಗು ಸಾರ್ವಜನಿಕೆರ್ ಪ್ರತಿಭಟನೆ ಮಲ್ತಿನ ನಡಕೆ ಸೋಮಾರ ಕುಂದಾಪುರೊದ ತಾಲೂಕು ಆಸ್ಪತ್ರೆಡ್ ನಡತ್‌ದ್ಂಡ್.
ಗಂಗೊಳ್ಳಿದ ಶ್ರೀನಿವಾಸ ಖಾರ್ವಿ ಬೊಕ್ಕ ಜ್ಯೋತಿ ಖಾರ್ವಿ ಪನ್ಪಿನ ದಂಪತಿಲು ಬಾಲೆನ್ ಕಲೆವೊಂಡಿನಕುಲು. ಎಣ್ಮರೆ ತಿಂಗೊಲ್ದ ದಿಂಜಿ ಬಂಜಿನಾಲಾದಿತ್ತಿನ ಜ್ಯೋತಿ ಖಾರ್ವಿ ಮೇರ್ ನವೆಂಬರ್ 16ತಾನಿ ಚೆಕಪ್ ಮನ್ಪಾಯೆರ ಕುಂದಾಪುರ ತಾಲೂಕು ಆಸ್ಪತ್ರೆಗ್ ಬತ್ತಿತ್ತೆರ್. ಆ ಪೊರ್ತುಡು ಎಣ್ಮರೆ ತಿಂಗೊಲ್ದ ಸ್ಕ್ಯಾನಿಂಗ್ ಮನ್ಪಾವೊನುನೆತ ಬಗೆಟ್ ಬೈದ್ಯೆರೆಡ ಪನ್ನಗ ಅವು ದಾಲ ಬೊರ್ಚಿ ಪಂದ್ ಪಂತೆರ್‌ಗೆ. ಮನದಾನಿ ಇಲ್ಲಡ್ ಬಂಜಿ ಬೇನೆ ತೋಜಿದ್ ಬತ್ತ್‌ದ್, ಅಪಗನೇ ಕಂಡನೆ ಶ್ರೀನಿವಾಸ ಖಾರ್ವಿ ಬೊಡೆದಿನ್ ಕುಂದಾಪುರ ಸರ್ಕಾರೀ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಂಡ ಅಲ್ಪ ಸಮ ಡ್ಯೂಟಿ ಡಾಕ್ಟರ್‌ಲಾ ದಾಂತೆ ಅಡ್ಮಿಷನ್ ಮಲ್ತೊಂದಿಜೆರ್‌ಗೆ. ನವೆಂಬರ್ 20ದಾನಿ ಕಾಂಡೆ ನಾರ್ಮಲ್ ಡೆಲಿವರಿ ಆತ್ಂಡ್. ಆಂಡ ಪೆದ್ದ್‌ದ್ ಆಯಿನೇ ಬಾಲೆ ತೀರ್ದ್ಂಡ್ ಪಂದ್ ಬೈದ್ಯೆರ್ ಶ್ರೀನಿವಾಸ ಖಾರ್ವಿಡ ತೆರಿಪಾದೆರ್. ದಾನೆ ತೀರ್ಂಡ್ ಪಂದ್ ಕೇನ್ನಗ ಬಾಲೆದ ನಾಲಿಗ್ ಕರ್ಲ್ ತಿಕಲೊಂದಿತ್ತ್ಂಡ್ ಪಂದ್ ಪಂತೆರ್. ಉ್ಂದೆರ್ದಾವರ ಪಿಸಿರಾಯಿನ ಸಾರ್ವಜನಿಕೆರ್ ಮಾತಾ ಸಮ ಇತ್ತಿ ಬೊಕ್ಕ ಬೈದ್ಯೆರೆ ನಾಮಾಸ್‌ರ್ದಿವರನೇ ಬಾಲೆ ತೀರ್ದ್ಂಡ್ ಪಂದ್ ಆರೋಪಿತ್‌ದ್ ಕಾಂಡೆರ್ದ್ ಪ್ರತಿಭಟನೆ ಮಲ್ದೆರ್.
ಸೋಮಾರ ಬಯ್ಯಡ್ ಜಾಗೆಗ್ ಕುಂದಾಪುರ ತಹಶೀಲ್ದಾರ್ ಶೋಭಾಲಕ್ಷ್ಮಿ ಬತ್ತ್‌ದ್ ಸಂತ್ರಸ್ತೆರೆನ ಅಹವಾಲು ಕೇಂದ್ ಕ್ರಮ ಗೆತೊನುನ ಪಾತೆರ ಕೊರ್ಯೆರ್ನ್ಡಲಾ ಸಮಾಧಾನ ಆವಂದಿನ ಪ್ರತಿಭಟನಾಕಾರೆರ್ ಜಿಲ್ಲಾ ಆರೋಗ್ಯ ಅಧಿಕಾರಿ ಡಿ ಎಚ್ ಓ ಅಡೆ ಬತ್ತ್‌ದ್ ನಾಮಾಸ್ ಮಲ್ದಿನ ಬೈದ್ಯನ ಮಿತ್ತ್ ಕ್ರಮ ಗೆತೊನೆರ ಪಟ್ಟ್ ಪತ್ಯೆರ್. ಡಿ ಹೆಚ್ ಒ ಬಯ್ಯನಗ ಬತ್ತೆರ್ನ್ಡಲಾ ಬೈದ್ಯನ ಬೇಲೆರ್ದ್ ದೆಪ್ಪಂದೆ ಪ್ರತಿಭಟನೆ ಪಿರಗೆತೊನುಜ ಪಂದ್ ಕುಲ್ಲುದಿತ್ತೆರ್.
ಬೊಕ್ಕ ರಾತ್ರೆ ಜಾಗೆಗ್ ಬತ್ತಿನ ಬೈಂದೂರು ಶಾಸಕೆ ಗುರುರಾಜ್ ಗಂಟಿಹೊಳೆ ಪ್ರತಿಭಟನಾಕಾರೆರೆಗ್ ಬೆರಿತಾಂಗ್ ಕೊರ್ಯೆರ್. ಈ ಪೊರ್ತುಡು ಕುಂದಾಪುರೊದ ನಾಗರೀಕೆರ್ಲಾ ಆಸ್ಪತ್ರೆದ ಎದುರು ಪ್ರತಿಭಟನಾಕಾರೆರೆನ ಬೆರಿಬಲೊಕು ಉಂತಿನತ್ತಂದೆ, ಅಂಗಾರೆ ಬೈದ್ಯನ್ ಬೇಲೆರ್ದ್ ದಿತ್ತಿಜಿಂಡ ಕುಂದಾಪುರ ಬೊಕ್ಕ ಗಂಗೊಳ್ಳಿ ಬಂದ್‌ಗ್ ಲೆಪ್ಪು ಕೊರ್ಪಿನ ಎಚ್ಚರ್ಗೆನ್ಲಾ ಶಾಸಕೆ ಗುರುರಾಜ್ ಗಂಟಿಹೊಳೆ ಕೊರ್ಯೆರ್.