Last updated on November 19th, 2023 at 09:54 pm
ಒಂಜಿ ಕಾಲೊಡು ಕನ್ನಡ ಚಿತ್ರರಂಗೊಡು ಮೆನ್ಕ್‌ದಿನ ನಮ್ಮ ತುಳುವೆದಿ ಲೀಲಾವತಿ ಮೇರ್, ಪಿರಯದ ವಿಧಿಟ್ ಪಜೆ ಪತ್ತ್‌ದೆರ್. 50 ವರ್ಸ ನಟನೆ ಮಲ್ದಿನ ಮೇರ್ ಕನ್ನಡ, ತಮಿಳ್, ತುಳು, ತೆಲುಗು ಬಾಸೆಲೆಡ್ ಸುಮಾರ್ 600 ದಾತ್ ಪಿಚ್ಚರ್‌ಡ್ ಮಲ್ದೆರ್.
ಮೇರ್ ನಮ್ಮ ತುಳುನಾಡ್‌ದ ಬೊಲ್ತೇರ್‌ದಾರ್, ಮೇರ್ ಎಲ್ಯ ಉಪ್ಪುನಗನೇ ಮೆರೆನ ಅಪ್ಪೆ ಅಮ್ಮೆ ತೀರ್ದಿತ್ತೆರ್. ಮೇರ್ 1937ನೇ ಇಸವಿಡ್ ಪುಟ್ಟಿನಾರ್, ಮೆರೆಗ್ ಪುಟ್ಟುನಗ ದೀತಿನ ಪುದರ್ ಲೀಲಾ ಕಿರಣ್ ಪನ್ದ್, ಮೇರ್ ಪಿಚ್ಚರ್ ಲೆಡ್ ಪಾತ್ರ ಮಲ್ಪರೆ ಸುರು ಮಲ್ತಿಬೊಕ್ಕ ಲೀಲಾವತಿ ಪನ್ದ್ ಪುದರ್ ಆಂಡ್. ಮೆರೆಗ್ ಇತ್ತೆ 87 ವರ್ಸ ಆತ್ಂಡ್. ಮೇರ್ 6 ವರ್ಸ ಉಪ್ಪುನಗ ಅಪ್ಪೆ ಅಮ್ಮೆ ದಾಂತಿಲೆಕ್ಕ ಆದಿತ್ತ್ಂಡ್, ಅವೆರ್ದ್ ಬೊಕ್ಕ ಮೆರೆನ ತಿದ್ಯಪ್ಪೆನ ಇಲ್ಲಡ್ ಬುಲೆಯೆರ್. ಸೈಂಟ್ ಜೋಸೆಫ್ ಶಾಲೆಗ್ ಸೇರ್ಂಡಲ ಬಡಪತ್ತ್‌ಡ್ ವಿದ್ಯೆ ಕಲ್ಪರೆ ಆಯಿಜಿ. ಪನವುಗಾದ್, ತನ್ನ ಕುಟುಮದಕಲೆನ್ ತಾಂಕರೆಗಾದ್ ಆ ಎಲ್ಯ ಬಾಲೆ ಅಲ್ಪ ಮುಲ್ಪ ಬೇಲೆಗ್ ಜತ್ತ್ಂಡ್. ಅಕಲೆನ ಮೊಕಲೆನ ಇಲ್ಲಡ್ ಬಾಜನ ದೆಕ್ಕರೆ ಪೋಯಿನ ಅವ್ವೇ ಪೊಣ್ಣು ಬೊಕ್ಕ ಇಡೀ ದಕ್ಷಿಣ ಭಾರತ ಒರ ತಿರ್ಗ್‌ದ್ ತೂಪಿಲೆಕ್ಕ ಮಲ್ಲ ಮಲ್ಲ ನಟೆರಾಯಿನ ರಾಜ್ ಕುಮಾರ್, ಎಂಜಿಆರ್, ಎನ್‌ಟಿಆರ್, ಶಿವಾಜಿ ಗಣೇಶನ್, ಜೆಮಿನಿ ಗಣೇಶನ್‌ನಕಲೆಗ್ ನಾಯಕಿ ಆದ್ ಪಾತ್ರ ಮಲ್ತಿನವು ಎಲ್ಯ ಸಾಧನೆ ಅತ್ತ್.
ಎಲ್ಯ ಪ್ರಾಯೊಡೇ ನಾಟಕೊಲೆಡ್ ಪಾತ್ರ ಮಲ್ಪರೆ ಸುರು ಮಲ್ತ್ ಬೊಕ್ಕ ಪಿಚ್ಚರ್‌ಲೆಡ್ ನಟನೆ ಮಲ್ಪರೆ ಸುರು ಮಲ್ತಿನ ಲೀಲಾವತಿ 1958ನೇ ಇಸವಿಡ್ ಮಾಂಗಲ್ಯ ಯೋಗ ಪನ್ಪಿನ ಪಿಚ್ಚರ್‌ಡ್ ಸುರುತ ಸಲ ನಾಯಕಿ ಆದ್ ಮಲ್ತೆರ್, 1960ಡು ಸುರುತ ಸಲ ರಾಜ್ ಕುಮಾರ್‌ನೊಟ್ಟುಗು ರಣಧೀರ ಕಂಠೀರವ ಪನ್ಪಿನ ಪಿಚ್ಚರ್‌ಡ್ ಮಲ್ತೆರ್. ಅವೆರ್ದ್ ಬೊಕ್ಕ ಲೀಲಾವತಿ ಬೊಕ್ಕ ರಾಜ್ ಕುಮಾರ್‌ನ ಜೋಡಿ ಬಾರೀ ಪುಗಾರ್ತೆ ಪಡೆಯಿಂಡ್. ರಾಣಿ ಹೊನ್ನಮ್ಮ, ಸಂತ ತುಕಾರಾಮ, ವೀರ ಕೇಸರಿ, ಮನ ಮೆಚ್ಚಿದ ಮಡದಿ, ಕುಲವಧು, ಗೆಜ್ಜೆ ಪೂಜೆ, ಡಾಕ್ಟರ್ ಕೃಷ್ಣದಂಚಿನ ಪಿಚ್ಚರ್‌ಲು ಎಡ್ಡೆ ಪುದರ್ ಕನದ್ಂಡ್.
ತುಳುವೆದಿ ಆದ್ ತುಳುತ ಮಿತ್ತ್ ಮೋಕೆಗ್ ತುಳು ಪಿಚ್ಚರ್‌ಲೆಡ್ಲಾ ಪಾತ್ರ ಮಲ್ದಿನ ಲೀಲಾವತಿ ಮೇರ್ ತುಳು ಬಾಸೆದ ರಡ್ಡನೇ ಪಿಚ್ಚರ್ ದಾರೆದ ಬೊಡೆದಿಡ್ ಪಾತ್ರ ಮಲ್ದೆರ್. ಬಿಸತಿ ಬಾಬು, ಸಾವಿರೊಡೊರ್ತಿ ಸಾವಿತ್ರಿ ಇಂಚಿನ ತುಳು ಪಿಚ್ಚರ್‌ಲೆಡ್ ಪಾತ್ರ ಮಲ್ದೆರ್.
ಇತ್ತೆ ಪಜೆ ಪತ್ತ್‌ದಿನ ಲೀಲಾವತಿ ಮೇರ್, ಪಾತೆರ್ರೆಲಾ ಆವಂದಿನಾತ್ ಸೊರಗ್‌ದೆರ್. ಜೀನವ ಇಡೀ ಸೊಂದುದು ಮಲ್ತಿನ ತನ್ನ ಬೆಂಗಳೂರುದ ಕೈತಲ್‌ದ ನೆಲಮಂದಲೊಡುಪ್ಪುನ ಫಾರ್ಮ್ ಹೌಸುಡು ತನ್ನ ಮಗನೊಟ್ಟುಗು ಉಲ್ಲೆರ್. ಮೆರೆನ ಮಗೆ ವಿನೋದ್ ರಾಜ್ ಮೆರೆನ್ ಎಡ್ಡೆಡ್ ತೂವೊಂದುಲ್ಲೆ.