Last updated on December 31st, 2023 at 10:58 am
26 ಜುಲೈ 2022ತ್ತಾನಿ ಆಟಿ ಅಮಾಸೆದಾನಿ ತುಳುವಾಣಿ ಪನ್ಪಿನ ತುಳುತ ವೆಬ್ ನ್ಯೂಸ್ ಎಂಕುಲು ಸುರು ಮಲ್ದಿತ್ತ. ತುಳುವಾಣಿ ತುಳುನಾಡೊರ್ಮೆ ಪಸೆರ್ದ್ ಬಾರೀ ಪುಗಾರ್ತೆ ಪಡೆಯೊಂದಿತ್ತ್ಂಡ್. ಒವ್ವೇ ಪನವುದ ಅಂಗಲಪ್ಪು ದಾಂತೆ ಒವ್ವೇ ಪ್ರಚಾರ ದಾಂತೆ ಅತ್ತಂದೆ ಏರೆನ್ಲಾ ಮೆಚ್ಚಾವೊಡು ಪನ್ಪಿನ ಉದ್ದೇಶ ದಾಂತೆ ಎಂಕುಲು ಜವನೆರ್, ಬೆನ್‌ದ್ ತಿನ್ಪಿನ ಒಟ್ಟುಗು ತುಳುವಪ್ಪೆಗ್ ಒಂತಿ ಚಾಕಿರಿ ಮಲ್ಪೊಡು ಪನ್ಪಿನ ಉಮೇದ್‌ಡ್ ಇತ್ತ.
ಆಂಡ ಒಂಜಿ ವರ್ಸ ಕರಿನೇ ಒರಾನೆ ತುಳುವಾಣಿ ಪನ್ದ್ ಇತ್ತಿನವು ‘ತುಳು ಸಮಾಚಾರ’ ಎಂಚ ಆಂಡ್ ಪನ್ದ್ ನಿಕಲೆಗ್ ಮಾತೆರೆಗ್ ಸೋಜಿಗ ಆದಿಪ್ಪು. ಅವೆತ ಪಿರವುಡು ಮಾಮಲ್ಲ ಕಥೆ ಒಂಜಿ ಉಂಡು. ಎಂಕುಲು ಮೋಕೆಡ್ ಒಂಜೊಂಜೇ ಕಲ್ಲ್ ದೆರ್ತ್ ಮಣ್ಣ್‌ಡ್ ಪೊರುಂಬೊಂದು ಪೊರೆಲೊಂದು ಕಟ್ಟಿನ ಇಲ್ಲಗ್ ಮಡುತ ಪೆಟ್ಟ್ ಗದ್ದಾಯಿನಲೆಕ್ಕ ಎಂಕಲೆಗ್ ಒಂಜಿ ಲಾಯರ್ ನೋಟೀಸ್ ಬತ್ತ್ಂಡ್. ಅವೆಟ್ ತುಳುವಾಣಿ ಪನ್ಪಿನ ಪುದರ್ ಬೇತೆ ರಿಜಿಸ್ಟ್ರೇಷನ್ ಆತ್ಂಡ್ ನಿಕುಲು ಅವೆನ್ ಒಲ್ಪಲಾ ಗಲಸರೆ ಬಲ್ಲಿ ಒಂಜಿ ವೇಳೆ ಗಲಸಿಯರ್ಡ ಕಾನೂನು ಕ್ರಮ ದೆತೊನುವ ಪನ್ದ್ ಒಂಜಿ ತುಳುವೆ ಕಡಪುಡ್ದಿತ್ತೆರ್.
ಎಂಕುಲು ಲತ್ತ್ ಜವನೆರ್, ಎಂಕಲೆನ ಪಿರವುಡು ಮಲ್ಲ ಕೈ ಇಜ್ಜಿ, ಎಂಕಲೆನ ದುಂಬುಡು ಮಲ್ಲ ಮಲ್ಲ ಜಾತಿ ನೀತಿದ ಸರ್‌ನೇಮ್ ಇಜ್ಜಿ. ಎಂಕಲೆಡ ಇತ್ತಿನಿ ಎಂಕುಲು ಒಂಜಿ ವರ್ಸೊಡು ತುಳುಟು ಬರೆತಿನ ರಡ್ಡ್ ಸಾರದಾತ್ ನ್ಯೂಸ್, ಅಂಚೆನೆ ದಾದ ಬತ್ತ್ಂಡಲ ತುಳುನು ಬುಡ್ಪುಜ ಪನ್ದ್ ಪನ್ಪಿನ ಜವನೆರ್. ಅಂಚ ಎಂಕ್ಲೆನ ಟೀಮ್‌ದಕುಲು ಮಾತಾ ಸೇರ್ದ್ ಬಾರೀ ಬೆಸರ್‌ಡ್ ತುಳುವಾಣಿನೇ ಪಗಪುನ ನಿರ್ಧಾರೊಗು ಬತ್ತ.
ಒಂಜಿ ವಾರ ಪೂರಾ ಕಂಕನೆ ಕಬ್ಬೆ ಆಂಡ್, ಎಂಕಲೆನ ವೆಬ್ಲೈಟ್ ಹಾಲಾಂಡ್, ಆಂಡ ಎಂಕಲೆನ ಗ್ರೂಪುಲೆಡ್ ಇತ್ತಿನ ತುಳುವೆರ್ ಕೈ ಬುಡ್ಜೆರ್. ಎಂಕುಲು ಪೊಸ ವೆಬ್ಸೈಟ್ ಕಟ್ಟ್‌ದ್ ಬನ್ನಮುಟ್ಟಲಾ ಜನಕುಲು ಎಂಕಲೆನ್ ಬುಡ್ದ್ ಪೋಯಿಜೆರ್. ಅಂಚ ಆಗಸ್ಟ್ 3, 2023ಕ್ಕ್ ತುಳುವಾಣಿ ತುಳು ಸಮಾಚಾರ ಆಂಡ್. ಉಂದು ಎಂಕ್ಲೆನ ಕಥೆ, ವ್ಯಥೆ.
ಎಂಚಿನನೇ ಆವಡ್ ತುಳುಟು ಉಪ್ಪುನ ರಡ್ಡ್ ಬೊಕ್ಕ ಕುಡೊಂಜಿ ತುಳು ನ್ಯೂಸ್ ವೆಬ್ಸೈಟ್‌ಲೆನ್ ಕಂಕನೆ ಕಬ್ಬೆ ಪಾಡೆರೆ ತೂಂಡಲ ತುಳುನು ಮೋಕೆ ಮಲ್ಪುನಕುಲು ಯಾಪಲಾ ತುಳುವೆರೆನ್ ಬೂರರೆ ಬುಡ್ಪುಜೆರ್. ಎಂಕುಲು ಪೊತ್ಕಿನ ಬೊಞ್ಞೊಡು ಕುಡ ಕುಡ್ತ್ ಲಕ್ಕಿನಕುಲು, ಎಲ್ಲೆ ತುಳು ಸಮಾಚಾರ ಮಲ್ತರ್ ಪನ್ದ್ ಕೇಸ್ ಪಾಡಿಯೆರ್ಡ ಕುಡೊಂಜಿ ವೆಬ್ಸೈಟ್ ಮಲ್ತ್ ಬರುವ, ಎಂಕುಲು ತುಳುವೆರ್ ಎಂಕಲೆನ ಉಡಲ್ ಗುಂಡೊಡು ಪರಪುನು ತುಳುತ ನೆತ್ತೆರ್. ನಮ ಇನಿ ಉಪ್ಪ ಎಲ್ಲೆ ಪೋವ, ತುಳು ಒರಿಯೊಡು, ತುಳು ಒರಿಯುಂಡು.