Last updated on December 3rd, 2023 at 07:26 am
ನಾಲರೆ ತಿಂಗೊಲ್ದ ಬಾಲೆನ್ ಕೆರ್ದ್ ಅಪ್ಪೆ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಕುಡ್ಲದ ಗುಜ್ಜರಕೆರೆಟ್ ನಡತ್‌ದ್ಂಡ್.
ಫಾತಿಮಾ ರುಕಿಯಾ(23) ಆತ್ಮಹತ್ಯೆ ಮಲ್ತೊಂದಿನಾರ್. ಫಾತಿಮಾ ಮೆರೆಗ್ ಒಂಜರೆ ವರ್ಸೊಗು ದುಂಬು ಮದಿಮೆ ಆದಿತ್ತ್ಂಡ್. ಕರಿನ ಜು.7ತಾನಿ ಪೆದ್ದಿನ ಮೆರೆಗ್ ಅಬ್ದುಲ್ಲಾ ಹೂದ್‌ ಪುದರ್‌ದ ನಾಲರೆ ತಿಂಗೊಲ್ದ ಬಾಲೆ ಇತ್ತ್ಂಡ್.
ಪೆದ್ದಿನ ಬೊಕ್ಕ ಫಾತಿಮಾ ಮಾನಸಿಕ ಖಿನ್ನತೆಡ್ ಇತ್ತೆರ್. ಈ ಬಗೆಟ್ ತನ್ನ ಅಮ್ಮೆರೆಡ ಪನೊಂದಿತ್ತೆರ್. ಜೂವ ದೆತ್ತೊನುವೆ ಪಂದ್‌ಲಾ ಪನೊಂದಿತ್ತೆರ್. ಆಂಚಾದ್ ಆರೆಗ್ ಮಾನಸಿಕ ಬೈದ್ಯೆದಿನ ಕೈಟ್ ಮರ್ದ್‌ಲಾ ಮಲ್ತಿತ್ತೆರ್.
ಸನಿಯಾರ ಕಾಂಡೆ 11 ಗಂಟೆರ್ದ್ 1.30ತ ನಡುಟು ಇಲ್ಲಡ್ ಏರ್ಲಾ ಇಜ್ಜಂದಿನ ಪೊರ್ತುಡು ಫಾತಿಮಾ ಆರ್ ಇತ್ತಿನ ಗುಜ್ಜರಕೆರೆತ ಅಪಾರ್ಟ್‌ಮೆಂಟ್‌ದ ಬೆಡ್‌ರೂಮ್‌ದ ಗ್ಯಾಲರಿಡ್ ಪ್ಲಾಸ್ಟಿಕ್‌ ಟಬ್‌ಡ್ ನೀರು ದಿಂಜದ್ ಬಾಲೆನ್ ಅವೆಟ್ ಮುರ್ಕದ್ ದಮ್ಮು ಕಟ್ಟದ್ ಕೆರ್ದ್ ತಾನ್‌ಲಾ ಕಂಡಿದ ಕರ್ಬದ ಸರಲ್‌ಗ್ ಸೀರೆದ ಕಟ್ಟ್‌ದ್ ನಾಲಿಗ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ತೆರಿದ್ ಬೈದ್ಂಡ್. ಈ ಬಗೆಟ್ ತೆನ್ಕಾಯಿ ಕುಡ್ಲ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.