Last updated on December 23rd, 2023 at 11:48 am
ಇತಿಹಾಸ ಪ್ರಸಿದ್ದ ಮುಲ್ಕಿದ ಒಳಲಂಕೆದ ವೆಂಕಟರಮಣ ದೇವಲ್ಯದ ಪ್ರತಿಷ್ಟೆ ಪುಣ್ಣಮೆ ಡಿಸೆಂಬರ್ 26ಕ್ಕ್ ನಡಪರೆ ಉಂಡು. ಮುಲ್ಕಿ ಒಳಲಂಕೆಡ್ ಉಪ್ಪುನ ವೆಂಕಟರಮಣ ದೇವಲ್ಯೊಗು ಸುಮಾರ್ 800 ವರ್ಸದ ಭವ್ಯ ಇತಿಹಾಸ ಉಂಡು.
ಕೃ.ಶ 1260ಡು ಸೊಯಿರ ವಿಠಲ ಭಟ್ಟ ಪನ್ಪಿನಾರ್ ಮುಲ್ಕಿ ಸೀಮೆಗ್ ಬತ್ತ್ ನಿಲೆ ಆನಗ, ಮೆರೆಗ್ ಅಪಗದ ಸಾಮಂತರಸೆರ್ ಒಳಲಂಕೆದ ಭೂಮಿ ಕೊರ್ದು ಆರೆನ ಇಲ್ಲದ ದೇವೆರಾಯಿನ ವಿಠಲ ದೇವೆರೆಗ್ ಒಂಜಿ ಗುಂಡ ಕಟ್ಟಾದ್ ಕೊರ್ಪೆರ್. ಉಂದು ‘ವಿಠಲ ಮಠ’ ಅತ್ತಂದೆ ‘ಮುಲ್ಕಿ ಮಠ’ ಪನ್ಪಿನ ಪುಗಾರ್ತೆನ್ ಪಡೆಯೊನುಂಡು.
ಇಂಚ ವರ್ಸ ಶತಮಾನೊಲು ಕರಿನೇ ಗೋವೆಡ್ ಪೋರ್ಚುಗೀಸೆರೆ ಉಪದ್ರ ತಡೆವರೆ ಆವಂದೆ ಅವೇತೋ ಗೌಡ ಸಾರಸ್ವತ ಬೆರಣೆರ್ ತುಳುನಾಡ್‌ಗ್ ವಲಸೆ ಬರ್ಪೆರ್. ಇಂಚ ಬತ್ತಿನಕುಲು ಕಾರ್ಲಡ್ಲಾ ಉಪ್ಪುವೆರ್. ಆಂಡ ಕಾರ್ಲಡ್ಲಾ ಪರಕೀಯೆರೆನ ಉಪದ್ರ ಸುರು ಆನಗ ಅಕುಲು ಆರಾಧನೆ ಮಲ್ತೊಂದಿತ್ತಿನ ವೆಂಕಟರಮಣನ ಮೂರ್ತಿದೊಟ್ಟುಗು ಮೂಲ್ಕಿದ ಒಳಲಂಕೆಗ್ ಬರ್ಪೆರ್. ವೆಂಕಟರಮಣನ್ ಒಂಜಿ ಪೆಟ್ಟಿಗೆಡ್ ದೀದ್ ಅವೆನ್ ವಿಠಲ ಮಠತ ಗುವೆಲ್‌ಗ್ ಜಪುಡಾವೆರ್. ಕಾರ್ಲಡ್ ಪರಕೀಯೆರೆನ ಉಪದ್ರ ಕಮ್ಮಿ ಆಯಿನೇ ಕುಡ ಪಿರ ಕಾರ್ಲಗ್ ಪೋಯಿ ಪನ್ದ್, ಪೋನಗ ದೇವೆರೆನ್ ಕೊನೊವರೆ ಕಾರ್ಲದಕುಲು ಗುವೆಲ್‌ಗ್ ಜತ್ತ್ ತೂನಗ ದೇವೆರೆನ್ ದೀತಿನ ಪೆಟ್ಟಿಗೆ ತಿಕ್ಕುಜಿಗೆ. ಆತ್ ಪೊರ್ತುಗು ಮುಲ್ಕಿದ ಜನಕುಲು ಗುವೆಲ್‌ಗ್ ಜತ್ತ್ ನಾಡ್‌ನಗ ಅಕಲೆಗ್ ಅವ್ ಪೆಟ್ಟಿಗೆ ತಿಕ್ಕುಂಡು. ಅಂಚಾದ್ ಮುಲ್ಕಿದಕುಲು ಈ ದೇವೆರೆನ್ ಮುಲ್ಪನೇ ಪ್ರತಿಷ್ಟೆ ಮಲ್ಪೊಡು ಪನ್ದ್ ಗೆರೆತೊನುವೆರ್, ಕಾರ್ಲದಕಲೆಗ್ಲಾ ಕನೊಟು ಬತ್ತಿನ ದೇವೆರ್ ತಾನ್ ಮುಲ್ಕಿಡ್ ನಿಲೆ ಆಪೆ ಪನ್ದ್ ತೆರಿಪಾವೆರ್. ಅಂಚ ಮುಲ್ಕಿಡ್ ವೆಂಕಟರಮಣನ ಪ್ರತಿಷ್ಟೆ ಆಪುಂಡು.
ದುಂಬಗ್ ಕಾಶೀಮಠ ಸಂಸ್ಥಾನದ ಪೂಜ್ಯ ವಿಜಯೇಂದ್ರ ತೀರ್ಥೆರ್ ಮುಲ್ಕಿದ ವೆಂಕಟರಮಣ ದೇವಲ್ಯೊಗು ಬನ್ನಗ ಮಾರ್ಗಶಿರಾ ಪುಣ್ಣಮೆದಾನಿ ಉಗ್ರ ನರಸಿಂಹ ದೇವೆರೆನ್ ಮುಲ್ಪ ಪ್ರತಿಷ್ಟೆ ಮಲ್ಪುವೆರ್. ಕೃ.ಶ 1569, ನವೆಂಬರ್ 16ಕ್ಕ್ ಈ ಪ್ರತಿಷ್ಟೆ ನಡಪುಂಡು. ಆನಿರ್ದ್ ಬೊಕ್ಕ ಮಾರ್ಗಶಿರಾ ಪುಣ್ಣಮೆದಾನಿ ಪ್ರತಿಷ್ಟೆ ಪುಣ್ಣಮೆ ಪನ್ದ್ ಗೌಜಿದ ಜಾತ್ರೆ ಮುಲ್ಕಿದ ವೆಂಕಟರಮಣ ದೇವಲ್ಯೊಡು ನಡಪುಂಡು.