Last updated on January 18th, 2024 at 09:31 am
ಬೆಂಗ್ಳೂರ್: ಬೆಂಗ್ಳೂರ್‌ದ ಚಿನ್ನಸ್ವಾಮಿ ಕ್ರೀಡಾಂಗಣೊಡು ನಡತಿನ ಭಾರತ- ಅಫ್ಘಾನಿಸ್ತಾನ ನಡುತ 3ನೇ ಟಿ20 ಗೊಬ್ಬುನು ಭಾರತ ಗೆಂದ್‌ದ್ಂಡ್. ಈ ಮುಕೇನ ಭಾರತ 3 ಗೊಬ್ಬುಲೆನ ಸರಣಿಡ್ ಮಾತಾ ಗೊಬ್ಬೂಲೆನ್ ಗೆಂದ್‌ದ್ ಸರಣಿ ಕೈವಶ ಮಲ್ತೊಂದುಂಡು.
ಟಾಸ್ ಗೆಂದ್‌ದ್ ಸುರುಕು ಬ್ಯಾಟಿಂಗ್ ಮಲ್ತಿನ ಭಾರತ 20 ಓವರ್‌ಡ್ 4 ವಿಕೆಟ್ ಕಲೆವೊಂದು 212 ರನ್ ಮಲ್ತ್‌ದ್ ಅಫ್ಘಾನಿಸ್ತಾನೊಗು 213 ರನ್‌ಲೆನ ಈಡ್ ಕೊರ್ದಿತ್ತ್ಂಡ್.
ಅಫ್ಘಾನಿಸ್ತಾನೊದ ಬ್ಯಾಟ್ಸ್‌ಮನ್‌ನಕುಲು ಭಾರತೊದ ಬೌಲರ್‌ನಕ್ಲೆಗ್ ಸಮರ್ಥವಾದ್ ಸದು ಕೊರ್ದ್ 20 ಓವರ್‌ಡ್ 6 ವಿಕೆಟ್ ಕಲೆವೊಂದು 212 ರನ್ ಮಲ್ತಿನೆರ್ದಾವರ ಗೊಬ್ಬು ಟೈ ಆಂಡ್. ಸೂಪರ್ ಓವರ್‌ಡ್ ಅಫ್ಘಾನಿಸ್ಥಾನ ಒಂಜಿ ವಿಕೆಟ್ ನಷ್ಟೊಗು16 ರನ್ ಮಲ್ತ್ಂಡ, ಭಾರತೊಲಾ ಒಂಜಿ ವಿಕೆಟ್ ನಷ್ಟೊಗು 16 ರನ್ ಮಲ್ತ್‌ದ್ ಸೂಪರ್ ಓವರ್‌ಡ್ಲಾ ಗೊಬ್ಬು ಟೈ ಆಂಡ್. ರಡ್ಡನೇ ಸೂಪರ್ ಓವರ್‌ಡ್ ಭಾರತ 2 ವಿಕೆಟ್ ನಷ್ಟೊಗು 11 ರನ್ ಮಲ್ತ್ಂಡ, ಅಫ್ಘಾನಿಸ್ಥಾನಗ್ 2 ವಿಕೆಟ್ ಕಲೆವೊಂದು ಕಾಲಿ 1 ರನ್ ಮಾತ್ರ ಮಲ್ಪೆರಾಂಡ್.
ಭಾರತೊದ ಪರ ರೋಹಿತ್ ಶರ್ಮಾ 69 ಬಾಲ್‌ಡ್ 121 ರನ್, ರಿಂಕು ಸಿಂಗ್ 39 ಬಾಲ್‌ಡ್ 69 ರನ್ ಒಟ್ಟು ಮಲ್ತ್‌ದ್ ಎಡ್ಡೆ ಬ್ಯಾಟಿಂಗ್ ಪ್ರದರ್ಶನ ಕೊರ್ಯೆರ್. ಬೌಲಿಂಗ್ ವಿಭಾಗೊಡು ವಾಷಿಂಗ್‌ಟನ್ ಸುಂದರ್ 18 ರನ್ ಕೊರ್ದು 3 ವಿಕೆಟ್ ಗೆತೊಂಡೆರ್ನ್ಡ, ಕುಲ್‌ದೀಪ್ ಯಾದವ್, ಅವೇಶ್ ಖಾನ್ ಒಂಜೊಂಜಿ ವಿಕೆಟ್ ಗೆತೊಂಡೆರ್.
ಈ ಥ್ರಿಲ್ಲರ್ ಗೊಬ್ಬುಡು ಒಂಜಾತ್ ಅಪರೂಪೊದ ದಾಖಲೆಲ್ಲಾ ಆತ. ಟಿ20 ಇಂಟರ್‌ನ್ಯಾಷನಲ್ ಗೊಬ್ಬುಲೆಗ್ ಮಾತೆರೆರ್ದ್ ಎಚ್ಚ ಶತಕ ಆಕಿನ ದಾಖಲೆ ಕ್ಯಾಪ್ಟನ್ ರೋಹಿತ್ ಶರ್ಮೆರೆನ (5 ಶತಕ) ಪುದರ್‌ಗ್ ಆಂಡ್. ಅಂಚೆನೇ 5ನೇ ವಿಕೆಟ್‌ಗ್ ಮಾತೆರೆರ್ದ್ ಎಚ್ಚಿನ ಪಾರ್ಟ್‌ನರ್‌ಶಿಪ್(190ರನ್) ಭಾರತೊದ ಇನ್ನಿಂಗ್ಸ್‌ಡ್ ಬತ್ತ್ಂಡ್