Last updated on January 14th, 2024 at 08:25 pm
ಕುಡ್ಲ: ತೆಂಕ ಯಡಪದವು ಗೋಪಾಲಕೃಷ್ಣ ದೇವಲ್ಯೊದಲ್ಪ ಸಾದಿ ಕಡತೊಂದಿತ್ತಿನ ಬಂಟ್ವಾಳ ಶಾಸಕ ಯು.ರಾಜೇಶ್ ನಾೖಕೆರೆಗ್ ಕಾರ್ ಎಡ್ತಿನ ನಡಕೆ ಇನಿ ಮಧ್ಯಾಹ್ನ ನಡತ್‌ದ್ಂಡ್.
ಮಧ್ಯಾಹ್ನ 1.30ತ ಅಂದಾಜಿಗ್ ರಾಜೇಶ್ ನಾೖಕೆರ್ ತೆಂಕ ಯಡಪದವು ಗೋಪಾಲ ಕೃಷ್ಣ ದೇವಲ್ಯೊದಲ್ತ ಕಜ್ಜೊಡೊಂಜೆಟ್ ಪಾಲ್‌ಗೆತೊಂದು ನಡತೊಂದು ಸಾದಿ ಕಡಪುನಗ ಈ ನಡಕೆ ನಡತ್‌ದ್ಂಡ್ ಪಂದ್ ಪೊಲೀಸೆರ್ ತೆರಿಪಾದೆರ್. ಶಾಸಕೆ ರಾಜೇಶ್ ನಾೖಕ್ ಮೆರೆನ ರಡ್ಡ್ ಮೊರಂಪುಗ್ಲಾ ಗಡಿಕುಲಾದ್, ಇತ್ತೆ ಮರ್ದ್ ಗೆತೊಂದೆರ್.
ಬೆದ್ರರ್ದ್ ಕುಡ್ಲದಂಚಿಗ್ ಪೋವೊಂದಿತ್ತಿನ ಸ್ವಿಫ್ಟ್ ಕಾರ್ ಶಾಸಕೆರೆಗ್ ಎಡ್ತಿ ಬೊಕ್ಕ ಉಂತಾವಂದೆ ಜಾಗೆರ್ದ್ ಪದ್ರಾಡಾದಿತ್ತ್‌ದ್, ಕಾರ್ಯಪ್ರವೃತ್ತೆರಾಯಿನ 112 ಹೊಯ್ಸಳ ಪೊಲೀಸ್ ಗುರುಪುರ ಜಂಕ್ಷನ್‌ಡ್ ಕಾರ್‌ನ್ ಉಂತಾದ್ ಸ್ಟೇಶನ್‌ಗ್ ಲೆತೊಂದು ಪೋತೆರ್.
ತೂಯಿನಾರ್ ಒರಿ ಕೊರ್ತಿನ ಒಯಿಲ್‌ದ ಆಧಾರೊಡು ಬಜ್ಪೆ ಪೊಲೀಸ್ ಸ್ಟೇಶನ್‌ಡ್ ಕಾರ್ ಡ್ರೈವರ್‌ನ ಮಿತ್ತ್ ಕಲಂ 279, 337 ಐಪಿಸಿ, 134(2)(3) ದ ಅಡಿಟ್ ಎಫ್ಐಆರ್ ದಾಕಲ್ತ್‌ದೆರ್.