Last updated on January 16th, 2024 at 12:32 pm
.webp)
ವಿಟ್ಲ: ಶ್ರೀರಾಮಲಲ್ಲಾ ಒರುನು ಕೆತ್ತಿನ ಮೈಸೂರ್‌ದ ಶಿಲ್ಪಿ ಅರುಣ್‌ ಯೋಗಿರಾಜ್ ಮೆರೆನ ಕೂಟೊಡು ವಿಟ್ಲ ಮುಟ್ಟದ ಉಕ್ಕುಡ ಕಲ್ಲುರ್ಟಿಯಡ್ಕದ ಚಿದಾನಂದ ಆಚಾರ್ಯ ಮೇರ್‌ಲಾ ಇತ್ತೆರ್. ಈ ಒರು ಗರ್ಭಗುಡಿಟ್ ಪ್ರತಿಷ್ಠಾಪನೆ ಆವರೆಗುಂಡು.
ಯೋಗಿರಾಜ್‌‌ರೆನ ಕೂಟೊಡು 12 ಜನ ಇತ್ತ್‌ದ್ 8 ಜನ ಮೈಸೂರ್‌ದಕುಲು. ನಾಲ್ವೆರ್ ಕುಡ್ಲ ಜಿಲ್ಲೆ ಬೊಕ್ಕ ಕೋಲಾರದಕುಲು.
4 ತಿಂಗೊಲು ದುಂಬು ಅರುಣ್‌ ಯೋಗಿರಾಜ್ ಅಯೋಧ್ಯೆದ ರಾಮಲಲ್ಲಾ ವಿಗ್ರಹೊದ ಬೇಲೆದ ಸಹಾಯಕ ಬೇಲೆಗ್ ಶಿಲ್ಪಿಲು ಬೋಡು ಎಂದು ಚಿದಾನಂದ ಆಚಾರ್ಯೆರೆಗ್ ತೆರಿಪಾದಿತ್ತೆರ್. ನನಲಾ ನಾಲ್ವೆರೆನ ಆವಶ್ಯಕತೆ ಇತ್ತ್‌ನೆರ್ದಾವರ ಚಿದಾನಂದೆರ್ ಪುತ್ತೂರ್‌ದ ಸುಮಂತ್ ಆಚಾರ್ಯ, ಕೋಲಾರದ ಉಮಾಮಹೇಶ್ವರೆ ಬೊಕ್ಕ ನಾರಾಯಣ ಆಚಾರ್ಯೆರೆನ ಅಟ್ಟುಗು ಅಯೋಧ್ಯೆಗ್ ಪೋದಿತ್ತೆರ್.
ಒರು ಕೆತ್ತುನ ಬೇಲೆಗ್ ಸಮಿತಿಯ 3 ಕೂಟೊಲೆನ್ ಗೊತ್ತು ಮಲ್ತ್‌ದ್ ಬೇತೆ ಬೇತೆ ಒರು ಉಂಡು ಮನ್ಪೆರ ಪಂದಿತ್ತ್ಂಡ್. ಅವೆಟ್ ಅತ್ಯುತ್ತಮ ಒರುನು ಅಜಪುವ ಪಂದ್‌ಲಾ ಪಂದಿತ್ತ್ಂಡ್. ಒಂಜಿ ಕೂಟ ಅಮೃತಶಿಲೆನ್ ಅಜತ್ಂಡ ಮೈಸೂರ್ ಬೊಕ್ಕ ಉತ್ತರ ಕನ್ನಡೊದ ಕೂಟೊಲು ಕೃಷ್ಣಶಿಲೆನ್ ಅಜತೊಂಡ. ಮೂಜಿ ಕೂಟೊಲ್ಲಾ ಬೇತೆ ಬೇತೆ ಆದೇ ಬೇಲೆ ಮಲ್ತಿತ್ತ್‌ದ್, ಒಂಜಿ ಕೂಟ ಬುಕೊಂಜಿ ಕೂಟ ಮಲ್ದಿನ ಒರುನು ತೂತಿಜ.
ಸೆಪ್ಟಂಬರ್‌ 11ಕ್ಕ್ ಪೋಯಿನ ಮೈಸೂರ್‌ದ ಕೂಟ 72 ದಿನೊಟು ತನ್ನ ಬೇಲೆ ಮಲ್ದ್ಂಡ್. ಆ ಪೊರ್ತುಡು ಎಂಕ್ಲೆನ ಭದ್ರತೆ, ಎಡ್ಡೆ ವನಸ್ ತೆನಸ್, ಉಂತುನ ವೆವಸ್ತೆನ್ ಮಲ್ದಿತ್ತೆರ್. ಒವ್ವೇ ತಲೆಪು, ಪೋಡಿಗೆದಾಂತೆ ಈ ಬೇಲೆ ಸಾಗ್ಂಡ್ ಪಂದ್ ಪನ್ಪೆರ್ ಚಿದಾನಂದೆರ್.
ಚಿದಾನಂದ ಆಚಾರ್ಯೆರ್ ಅಳಿಕೆ ಗ್ರಾಮೊದ ಮೂವಾಜೆದ ಗೋಪಾಲ ಆಚಾರ್ಯೆರ್ ಬೊಕ್ಕ ಪುಷ್ಪಾವತಿ ದಂಪತಿಲೆನ ಮಗೆ. ಸತ್ಯಸಾಯಿ ವಿದ್ಯಾಸಂಸ್ಥೆಡ್ ಪಿಯುಸಿ ಮುಟ್ಟ ಕಲ್ತ್‌ದ್, ಕಾರ್ಲದ ಕೆನರಾ ಬ್ಯಾಂಕ್‌ ಸಿ.ಇ. ಕಾಮತ್‌ ಇನ್‌ಸ್ಟಿಟ್ಯೂಟ್‌‌ಡ್ ಒಂಜರೆ ವರ್ಸ ಶಿಲ್ಪಕಲೆ ಕಲ್ತ್‌ದೆರ್. ಬೊಕ್ಕ ಕಿನ್ಯಬಲ್ಲಾಪುರೊತ ಡಾ| ಜಿ. ಜ್ಞಾನಾನಂದ ಮೆರೆನ ಬ್ರಹ್ಮಶ್ರೀ ಶಿಲ್ಪಗುರುಕುಲೊಟು ಸುಮಾರ್ 10 ವರ್ಸ ಮುಟ್ಟ ಶಿಲ್ಪಕಲಾ ಅಧ್ಯಯನ ಮಲ್ದೆರ್. ಬೊಕ್ಕ ಬೆಂಗಳೂರು ಮಲ್ಲತ್ತಹಳ್ಳಿದ ಸಾಂಪ್ರದಾಯಿಕ ಶಿಲ್ಪಗುರುಕುಲೊಡು 3 ವರ್ಷ ಪ್ರತಿಮಾ ಶಿಲ್ಪ ಬೊಕ್ಕ 4 ವರ್ಷ ದೇವಲ್ಯ ಶಿಲ್ಪೊನು ಕಲ್ತ್‌ದ್ 8 ವರ್ಸೊರ್ದು ಅವ್ವೇ ಗುರುಕುಲೊಡು ಗುರುಕುಲಾದ್ ಬೆನೊಂದುಲ್ಲೆರ್.