Last updated on February 28th, 2024 at 08:31 am
ತೊರತ್ತಲ್ : ತೊರತ್ತಲ್ ಪೊಲೀಸ್ ಸ್ಟೇಶನ್ ಸೀಮೆರ್ದ್ ಅಂಗಾರೆ ನಾಪತ್ತೆಯಾದಿತ್ತಿನ ತೊರತ್ತಲ್ ಖಾಸಗಿ ಶಾಲೆದ ನಾಲ್ ವಿದ್ಯಾರ್ಥಿಲು ಹಳೆಯಂಗಡಿದ ಕೊಪ್ಪಳ ಆಣೆಕಟ್ಟದ ರೈಲ್ವೆ ಸಂಕೊದ ತಿರ್ತ್ ಸೂದೆಟ್ ಪುನ ಆದ್ ತಿಕ್ಕ್‌ದೆರ್.
ತೊರತ್ತಲ್ ಅಗರಮೇಲ್ ನಿವಾಸಿ ಚಂದ್ರಕಾಂತೆ ಪನ್ಪಿನಿರೆನ ಮಗೆ ಯಶ್ಚಿತ್(15), ಹಳೆಯಂಗಡಿ ತೋಕೂರು ನಿವಾಸಿ ವಸಂತ ಪನ್ಪಿನಾರೆನ ಮಗೆ ರಾಘವೇಂದ್ರೆ (15), ಸುರತ್ಕಲ್ ಗುಡ್ಡೆಕೊಪ್ಪ ನಿವಾಸಿ ವಿಶ್ವನಾಥೆ ಪನ್ಪಿನಾರೆನ ಮಗೆ ನಿರೂಪ್ (15) ಬೊಕ್ಕ ಚಿತ್ರಾಪುರ ನಿವಾಸಿ ದೇವದಾಸ್ ಪನ್ಪಿನಾರೆನ ಮಗೆ ಅನ್ವಿತ್ (15) ಪಂದ್ ಗುರ್ತ ಪತ್ತ್‌ದೆರ್.
ತೀರ್ದಿನ ನಾಲ್ ಜನಲಾ ತೊರತ್ತಲ್ ವಿದ್ಯಾದಾಯಿನಿ ಶಾಲೆದ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಲಾದಿತ್ತ್‌ದ್, ಅಂಗಾರೆ ನಡತಿನ ಇಂಗ್ಲಿಷ್ ಪ್ರಿಪರೇಟರಿ ಪರೀಕ್ಷೆ ಬರೆದ್ ಇಲ್ಲಡೆ ಬರಂದೆ ಕಾಣೆಯಾದಿತ್ತೆರ್. ಈ ಬಗೆಟ್ ಜೋಕುಲೆನ ಅಪ್ಪೆಅಮ್ಮರ್ಲು ರಾತ್ರೆ ತೊರತ್ತಲ್ ಪೊಲೀಸ್ ಸ್ಟೇಶನ್‌ಡ್ ನಾಪತ್ತೆ ಪ್ರಕರಣ ದಾಕಲ್ತ್‌ದಿತ್ತೆರ್.
ನಾಪತ್ತೆ ಪ್ರಕರಣ ದಾಕಲಾವೊಂದಿತ್ತಿಲೆಕನೆ ಕಾರ್ಯಾಚರಣೆಗ್ ಜತ್ತಿನ ಪೊಲೀಸೆರ್, ಶಾಲೆ ಬೊಕ್ಕ ಬಸ್ ಉಂತಡೆದಲ್ಪದ ಸಿಸಿಟಿವಿ ಫೂಟೇಜ್‌ಲೆನ್ ತರ್ಪಾವೊಂದೆರ್. ವಿದ್ಯಾರ್ಥಿಲು ತೊರತ್ತಲ್ ಬಸ್ ಉಂತಡೆಡ್ ಬಸ್ ಬರ್ತ್‌ದ್ ಹಳೆಯಂಗಡಿ ಬಸ್ ಉಂತಡೆಡ್ ಬಸ್ ಜತ್ತ್‌ದ್‌ನ ತೆರಿದ್ಂಡ್. ಒಟ್ಟುಗು ವಿದ್ಯಾರ್ಥಿ ಒರ್ಯಡ ಇತ್ತಿನ ಮೊಬೈಲ್ ಟವ‌ರ್ ಲೊಕೇಶನ್ ಆಧರಿತ್‌ದ್ ವಿದ್ಯಾರ್ಥಿಲು ಸುದೆಬರಿಕ್ ಪೋತಿನೆನ್ ಕನ್ಫರ್ಮ್ ಮಲ್ತೊಂದು ಜಾಗೆಗ್ ಬತ್ತ್‌ದ್ ಪರಿಶೀಲಿಪುನಗ ಸುದೆಬರಿಟ್ ಜೋಕುಲೆನ ಶಾಲೆ ಚೀರವುಲು, ಜೋಡು, ಶಾಲೆದ ಯೂನಿಫಾರ್ಮ್ ತಿಕ್ಕ್‌ದ್ಂಡ್.
ಮಾತ ಪುನೊಕ್ಲೆನ್ ಮರಣೋತ್ತರ ಪರೀಕ್ಷೆಗ್ ವೆನ್‌ಲಾಕ್ ಆಸ್ಪತ್ರೆಗ್ ಕಡಪುಡ್ದೆರ್ ಪಂದ್ ತೆರಿದ್‌ಬೈದ್ಂಡ್. ನಡಕೆಗ್ ಸಂಬಂಧಿತ್‌ದ್ ತೊರತ್ತಲ್ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.