Last updated on February 10th, 2024 at 03:57 pm
ಬೊಲ್ಲುಲ್ಲಿಗ್ ಬಂಗಾರ್‌ದ ಬಿಲೆ ಆದಿತ್ತ್‌ದೊ ಗ್ರಾಹಕೆರೆಗ್ ಮಂಡೆಬೆಚ್ಚ್ ಸುರುವಾತ್ಂಡ್. ತರಕಾರಿ ಮಾರ್ಕೆಟ್‌ಲೆಡ್ ಬೊಲ್ಲುಲ್ಲಿ ಕೆಜಿಗ್ 400 ರ್ದ್ 500 ರೂಪಾಯಿಗ್ ಸೇಲ್ ಆವೊಂದುಂಡು. ದಿನೊರ್ದು ದಿನೊಕ್ಕು ಅವೆತ ಬಿಲೆ ಬಂಗಾರೊದ ಬಿಲೆತ ಲೆಕ ಜಾಸ್ತಿ ಆವೊಂದಿತ್ತ್‌ದ್ , ಜನಸಮಾನ್ಯೆರೆ ಕಿಸೆಕ್ ಪೆಟ್ಟ್ ಬೂರೊಂದುಂಡು.
ಇಂಚಿಪ್ಪೊಗು ಟೊಮೆಟೋ,ನೀರುಳ್ಳಿ ಗ್ರಾಹಕರೆಗ್ ಪೆಟ್ಟ್ ಕೊರ್ದಿತ್ತ, ಇತ್ತೆ ಬೊಲ್ಲುಲ್ಲಿ. ಕರಿನ ವಾರ ಕೆಜಿಗ್ 200 ರ್ದ್ 300 ರೂಪಾಯಿ ಇತ್ತಿನ ಬೊಲ್ಲುಲ್ಲಿ ಇತ್ತೆ ರಡ್ಡ್ ಪಟ್ಟಾಂತ್ಂಡ್. ಇತ್ತೆ ಇತ್ತೆ ಅಟಿಲ್‌ಗ್ ಬೋಡಾಪಿ ಟೊಮೆಟೊ, ನೀರುಳ್ಳಿ, ಅರಿ, ಬೊಲ್ಲುಲ್ಲಿಲೆನ ಬಿಲೆ ಜಾಸ್ತಿ ಆವೊಂದುಪ್ಪುನ, ಪಾಪದಕಲೆಗ್ ದಿನ್ನ ಆವೊಂದುಂಡು.
ಕರ್ನಾಟಕೊಡು ಬೊಲ್ಲುಲ್ಲಿ ಎಚ್ಚ ಬುಲೆಪುಜೆರ್. ಮಹಾರಾಷ್ಟ್ರ, ಮಧ್ಯಪ್ರದೇಶ, ರಾಜಸ್ಥಾನೊರ್ದು ಎಚ್ಚಾದ್ ತರ್ಪುಡುವೆರ್. ಆಂಡ ತರ್ಪುಡಾದೀನ ಪ್ರಮಾಣೊಲಾ ಪಾಕ ಕಮ್ಮಿ ಆತ್ಂಡ್. ವಿಶೇಷವಾದ್ ಡಿಸೆಂಬರ್‌ ಅಕೇರಿರ್ದ್ ಜನವರಿ ಮುಟ್ಪ ಬಿಲೆ ಎಚ್ಚ ಇಪ್ಪುಂಡು. ಆಂಡ ಈ ಸರ್ತಿ ಒಂಜೇ ತಿಂಗೊಲುಡು ಬೊಲ್ಲುಲ್ಲಿದ ಬಿಲೆ ಡಬಲ್ ಆತ್ಂಡ್, 200ರ್ದ್ 400 ರೂ.ಗ್ ಜಂಪ್‌ ಆತ್ಂಡ್.