“ಕಾವೇರಿ ಕನ್ನಡ ಮೀಡಿಯಂ” ಕನ್ನಡ ಸೀರಿಯಲ್‌ಡ್ ದೈವಾರಾಧನೆಗ್ ಅಪಚಾರ : ಪೋಲೀಸ್ ಕಂಪ್ಲೇಂಟ್ ಕೊರಿನ ದೈವಾರಾಧಕೆರ್

Last updated on February 11th, 2024 at 07:44 am

ಕನ್ನಡದ ಪಿಚ್ಚರ್, ಧಾರವಾಹಿದಕಲೆಗ್ ಇತ್ತೆ ತುಳುನಾಡ್‌ದ ದೈವಾರಾಧನೆನ್ ಒಟ್ಟಾರೆ ಗಲಸ್‌ದ್ ಕಾಸ್ ಮಲ್ಪಿನ ಮರ್ಲ್ ದಿನೊರ್ದು ದಿನ ಎಚ್ಚೊಂದುಂಡು. ದೈವಾರಾಧನೆ ಮನೋರಂಜನೆಗ್ ಗಲಸುನ ಸೊತ್ತು ಅತ್ತ್, ಅವ್ ತುಳುವೆರೆನ ಪರಪೋಕುದ ನೆಲಮೂಲದ ನಂಬೊಲಿಗೆ. “ಕಾವೇರಿ ಕನ್ನಡ ಮೀಡಿಯಂ” ಪನ್ಪಿನ ಧಾರವಾಹಿಡ್ ತುಳುನಾಡ್‌ದ ದೈವಾರಾಧನೆನ್ ಒಟ್ಟಾರೆ ಗಲಸ್‌ದೆರ್. ಉಂದೆತ ಪ್ರೊಮೋಲಾ ವೈರಲ್ ಆದಿತ್ತ್ಂಡ್. ಇತ್ತೆ ಉಂದೆತ ವಿರುದ್ದ ತುಳುನಾಡ್ ದೈವಾರಾಧನೆ ಸಂರಕ್ಷಣಾ ಸಮಿತಿ ಕುಡ್ಲದಕುಲು ನಗರ ಪೋಲೀಸ್ ಕಮಿಷನರ್ ಬೊಕ್ಕ ಪಾಂಡೇಶ್ವರ ಠಾಣೆಡ್ ಒಯಿಲ್ ಕೊರ್ತೆರ್. ದೈವದ ಏಸ ಪಾಡಿನ ಪ್ರಶಾಂತ್ ಸಿಕೆ ವಿರುದ್ದ ಕ್ರಮ ದೆತೊನೊಡು ಅಂಚೆನೆ ದೈವಾರಾಧನೆದ ಚಿತ್ರೀಕರಣ ಪ್ರಸಾರ ಮಲ್ಪರೆ ಬುಡ್ರೆ ಬಲ್ಲಿ ಪನ್ದ್ ದೈವಾರಾಧಕೆರ್ ಒಯಿಲ್ ಕೊರ್ತೆರ್. ಛದ್ಮವೇಶದಲೆಕ್ಕ ದೈವದ ಏಸ ಪಾಡೊಂದು ದೈವಾರಾಧನೆಗ್ ಅಪಚಾರ ಮಲ್ತೊಂದುಲ್ಲೆರ್. ಉಂದೆರ್ದ್ ದೈವಾರಾಧನೆ ಮಲ್ಪುನ ಸಮುದಾಯದಕಲೆಗ್ ಅಪಚಾರ ಆವೊಂದುಂಡು ಪನ್ದ್ ದೈವಾರಾಧಕೆರ್ ಪಿಸಿರ್ ಪಿದಯಿ ಪಾಡ್ದೆರ್.

ದೈವಾರಾಧನೆಗ್ ಇಂಚಿನನೇ ಜಾತಿ ಜನಾಂಗದಕುಲು ಮಲ್ಪೊಡು ಪನ್ಪಿನ ನಿಯಮ ಉಂಡು. ಆ ಕಟ್ಟ್ ಪಾಡ್‌ನ್ ತುಳುನಾಡ್‌ಡ್ ಇತೋರ್ತು ಮೀರಿನಕುಲು ಇಜ್ಜಿ. ಆಂಡ ಇತ್ತೆ ತಿಕಿ ತಿಕಿನಕುಲು ದೈವದ ಏಸ ಪಾಡೊಂದು ಪಿರಾಕ್‌ದ ಪರಪೋಕುಗು ಅಪಚಾರ ಮಲ್ತೊಂದುಲ್ಲೆರ್. ಸಾರ್ವಜನಿಕವಾದ್ ದೈವದ ಏಸ ಪಾಡೊಂದು ಅಣುಕು ಪ್ರದರ್ಶನ ಮಲ್ಪುನ ಸಮ ಇತ್ತ್. ದೈವಕೋಲ ಕಟ್ಟುನ ಜನಾಂಗದಕುಲು ಪರಿಶಿಷ್ಟ ವರ್ಗದಕುಲು ಆಯಿನೆರ್ದಾವರ ಆರೋಪಿಲೆನ ವಿರುದ್ದ ದಲಿತ ದೌರ್ಜನ್ಯ ಪ್ರಕರಣ, ಜನಾಂಗೀಯ ನಿಂದನೆ ಅಂಚೆನೆ ಹಿಂದೂ ಧಾರ್ಮಿಕ ಭಾವನೆಲೆಗ್ ಅಪಚಾರ ಮಲ್ದಿನ ಬಗೆಟ್ ಪ್ರಕರಣ ಪಾಡೊಡು ಪನ್ದ್ ಒಯಿಲ್‌ಡ್ ಕೊರ್ತೆರ್.