Last updated on February 8th, 2024 at 09:46 am
ಭಾರತ್ ಜೋಡೋ ನ್ಯಾಯ ಯಾತ್ರೆ(Bharat Jodo Nyay Yatra) ಪೊರ್ತುಡು ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ನಾಯಿಗ್ ಕೊರ್ನ ಬಿಸ್ಕೆಟ್‌ನೇ ದೆತ್ತ್‌ದ್ ಕಾರ್ಯಕರ್ತಗ್ ಕೊರ್ಯೆರ್ ಪನ್ಪಿನ ವಿಡಿಯೋ ಒಂಜಿ ವೈರಲ್ ಆತ್ಂಡ್. ವೈರಲ್ ಆತಿನ ವೀಡಿಯೋಡು ತೂಪಿಲೆಕ, ರಾಹುಲ್ ಗಾಂಧಿ ಮೆರೆನ ರೋಡ್ ಶೋದ ಪೊರ್ತುಡು ಆರೆನ ಒಟ್ಟುಗು ಒಂಜಿ ನಾಯಿಲಾ ಇತ್ತ್ಂಡ್, ಅವೆಕ್ ರಾಹುಲ್ ಗಾಂಧಿ ಬಿಸ್ಕೆಟ್ ಕೊರೊಂದಿತ್ತೆರ್, ಆಂಡ ಆ ನಾಯಿ ತಿನೊಂದಿಜ್ಜಂಡ್. ಅವ್ವೇ ಪೊರ್ತುಡು ಕಾರ್ಯಕರ್ತೆ/ಅಭಿಮಾನಿ ಒರಿ ರಾಹುಲ್ ಗಾಂಧಿಯೆರೆನ್ ಪಾತೆರ್ಪಯೆರ್, ಆಪಗ ರಾಹುಲ್ ನಾಯಿಗ್ ಪಾಡ್ದಿತ್ತಿನ ಬಿಸ್ಕೆಟ್‌ಡ್ ಒಂಜಿ ಬಿಸ್ಕೆಟ್‌ನ್ ಪೆಜ್ಜಿದ್ ಕಾರ್ಯಕರ್ತಗ್ ಕೊರ್ತೆರ್. ಬೊಕ್ಕ ಕಾರ್ಯಕರ್ತ/ಅಭಿಮಾನಿಡ ತೆಲಿತೊಂದೇ ಪಾತೆರ್ದೆರ್.
✖️(ದುಂಬುದ ಟ್ವಿಟರ್)ಡ್ ಬಿಜೆಪಿ ಐಟಿ ಸೆಲ್‌ದ ಅಮಿತ್ ಮಾಳವೀಯ ಈ ವಿಡಿಯೋನ್ ಪಟ್ಟೊಂದೆರ್. ಕೆಲ ದಿನಕು ದುಂಬು ಕಾಂಗ್ರೆಸ್ ಅಧ್ಯಕ್ಷೆ ಮಲ್ಲಿಕಾರ್ಜುನ ಖರ್ಗೆರ್ ಬೂತ್ ಏಜೆಂಟ್‌ನಕ್ಲೆನ್ ನಾಯಿಲೆಗ್ ಕಂಪೇರ್ ಮಲ್ತಿತ್ತೆರ್. ಪಕ್ಷೊದ ಅಧ್ಯಕ್ಷೆ ಅಂಚೆನೇ ಮಾಜಿ ಅಧ್ಯಕ್ಷೆ ತನ್ನ ಕಾರ್ಯಕರ್ತೆರೆನ್ ನಾಯಿಲೆ ಲೆಕ ನಡಪಾವೊಂಡ ಅಂಚಿನ ಪಕ್ಷ ನೂದೆಕ್ ನೂದ್ ಮಾಜಿದ್ ಪೋಪುಂಡು ಪಂದ್ ಮಾಳವೀಯ ಬರೆಯೊಂದೆರ್.
ಕಾರ್ಯಕರ್ತನ ಪಾತೆರ
ತುಳುಸಮಾಚಾರಗ್ ತಿಕ್ಕಿನ ಕಾರ್ಯಕರ್ತನ ಪಾತೆರೊದ ತುಂಡು ವೀಡಿಯೋಡು ಕಾರ್ಯಕರ್ತೆ ನಾಯಿನ್ ಪತೊಂದು “ಈ ನಾಯಿ ರಾಹುಲ್ ಸರ್‌ನೊಟ್ಟುಗು ಫೋಟೋ ಗೆತೊಂದುಂಡು, ತೂಲೆ ಅಯ್ಕ್ ಬಿಸ್ಕೆಟ್‌ಲಾ ಕೊರ್ತೆರ್” ಪನ್ಪಿನೆನ್ ತೂವೊಲಿ.
ರಾಹುಲ್ ಗಾಂಧಿ ಸ್ಪಷ್ಟನೆ
ಪತ್ರಿಕಾಗೋಷ್ಠಿಡ್ ಈ ಬಗೆಟ್ ಕೇಂಡಿನ ಕೇನ್ಪುಗು ಸದು ಕೊರ್ನ ರಾಹುಲ್ ಗಾಂಧಿ “ಯಾನ್ ನಾಯಿನ್ಲಾ, ನಾಯಿದ ದನಿನ್ಲಾ ಮುಟ್ಟ ಲೆತ್ತೆ, ಅಕುಲು ಬತ್ತೆರ್. ಆ ನಾಯಿ ಮಸ್ತ್ ಪೋಡಿದಿತ್ತ್ಂಡ್. ಯಾನ್ ಅವೆಕ್ ಬಿಸ್ಕೆಟ್ ಕೊರ್ನಗ ಬೊಕಲಾ ಪೋಡಿಂಡ್. ಅಂಚಾದ್ ಯಾನ್ ದನಿಟ ಬಿಸ್ಕೆಟ್ ಕೊರ್ದು, ಅಣ್ಣಾ ಈರ್ ಕೊರ್ಲೆ, ಈರೆನ ಕೈರ್ದ್ ತಿನು ಪಂಡೆ. ಆರ್ ಕೊರ್ನೆನ್ ನಾಯಿ ತಿಂದ್ಂಡ್” ಪಂದ್ ಪಂಡೆರ್.