Last updated on February 15th, 2024 at 09:59 pm
ಕುಡ್ಲ, ಫೆಬ್ರವರಿ 15: ಬೆಂಗ್ಳೂರ್-ಕುಡ್ಲ ಪೋವೊಂದಿತ್ತಿನ ರೈಲ್‌ರ್ದ್ ಪೊಂಜೊವು ಒರ್ತಿ ನೇತ್ರಾವತಿ ಸುದೆಕ್ ಲಾಗಿನ ನಡಕೆ ಬಂಟ್ವಾಳದಲ್ಪ ನಡತ್‌ದ್ಂಡ್. ನಯನಾ ಎಂ.ಜಿ (27 ) ನೇತ್ರಾವತಿ ಸುದೆಕ್ ಲಾಗಿದ್ ಪೆರಣ ಬುಡ್ತಿನ ಪೊಂಜೊವು ಪಂದ್ ತೆರಿದ್‌ಬೈದ್ಂಡ್.
ತುಮಕೂರುದ ಮಧುಗಿರಿ ನಿವಾಸಿ ನಯನಾ ಎಂ.ಜಿ ಬೆಂಗ್ಳೂರ್‌ರ್ದ್ ಕುಡ್ಲಗ್ ಪೋಪುನ ರೈಲ್‌ಡ್ ಪೋವೊಂದಿತ್ತೆರ್. ಅವ್ವಾ ವಿಚಾರೊದ ಬೆಸರ್‌ಡ್ ನಯನಾ ಬಂಟ್ವಾಳ‌ಡೆ ಆದ್ ಪೋಪಿನ ನೇತ್ರಾವತಿ ಸಂಕ ಬರೊಂದಿತ್ತಿ ಲೆಕನೆ ರೈಲ್‌ರ್ದ್ ಸೀದ ನೇತ್ರಾವತಿ ಸುದೆಕ್ ಲಾಗಿದೆರ್. ಅಪಗನೇ ಒಟ್ಟುಗಿತ್ತಿನಕುಲು ರೈಲ್ವೆ ಅಧಿಕಾರಿಲೆಗ್ ಒಲವು ಕೊರ್ತೆರ್.
ನಡಕೆಗ್ ಸಂಬಂಧಿತ್‌ದ್ ಬಂಟ್ವಾಳ ನಗರ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್. ಬಂಟ್ವಾಳ ನಗರ ಪೊಲೀಸೆರ್ ನೇತ್ರಾವತಿ ಸುದೆಕ್ ರೈಲ್‌ರ್ದ್ ಲಾಗಿನ ಪೊಂಜೊವುನು ನಾಡುನ ಬೇಲೆಗ್ ಜತ್ತ್‌ದೆರ್. ಪಾಕ ಪೊರ್ತು ಕರಿದ್, ಮುರ್ಕುತಜ್ಞೆ ಮಹಮ್ಮದ್ ಬೊಕ್ಕ ಕೂಟೊದಕುಲು ಸುದೆರ್ದ್ ನಯನಾ ಎಂ.ಜಿ ಮೆರೆನ ಪುನೊನು ಪಿದಯಿ ಗೈದೆರ್. ಆತ್ಮಹತ್ಯೆಗ್ ಪತ್ತ ನೆವನ ದಾದ ಪಂದ್ ತೆರಿದ್‌ಬೈದಿಜಿ. ಪ್ರಕರಣ ದಾಕಲ್ತೊಂದಿನ ಬಂಟ್ವಾಳ ಪೊಲೀಸೆರ್ ಜಡ್ತೆ ಸುರು ಮಲ್ದೆರ್.