Last updated on March 18th, 2024 at 04:03 pm
ಸುಳ್ಯ: ಸೌತ್ ಕೆನರಾ, ಕೊಡಗು ಜಿಲ್ಲೆಲೆನ ಗಡು ಭಾಗೊದ ಸುಬ್ರಹ್ಮಣ್ಯಗ್ ಮುಟ್ಟದ ಮಡಿಕೇರಿ ಠಾಣಾ ಸೀಮೆದ ಕೂಜಿಮಲೆ ಭಾಗೊಡು ಶನಿವಾರ ಬಯ್ಯಡ್ ಶಂಕಿತ ನಕ್ಸಲೆರೆ ಕೂಟ ಭೇಟಿ ಕೊರ್ತುಂಡು ಪನ್ಪಿ ಒಲವುದ ಪ್ರಕಾರ ಕಾರ್ಲರ್ದ್ ನಕ್ಸಲ್ ನಿಗ್ರಹ ದಳ (ಎಎನ್ಎಫ್) ಬತ್ತ್‌ದ್, ಕೂಂಬಿಂಗ್ ಸುರು ಮಲ್ದೆರ್.
ಕಾರ್ಲರ್ದ್ ಬೈದಿನ ಎಎನ್ಎಫ್ ಕೂಟ ಕೂಜಿಮಲೆ ಮುಟ್ಟದ ಮೂಜಿ ಜಾಗೆಲಾಯಿನ ಬಾಳುಗೋಡ್‌ದ ಉಪ್ಪುಕಳ, ಕೂಜಿಮಲೆ, ಕಡಮಕಲ್ಲ್ ಪ್ರದೇಶೊಲೆಗ್ ಪೋದು ಕೂಂಬಿಂಗ್ ಮನ್ಪೆರೆ ಬೋಡಾಪಿ ಅಟ್ಟನೆ ಸುರು ಮಲ್ದೆರ್. ಕೂಜಿಮಲೆರ್ದ್ ಎಎನ್ಎಫ್ ಕೂಟ ಕೂಂಬಿಂಗ್ ಸುರು ಮಲ್ದ್ಂಡ್.
ಶನಿವಾರ ಬಯ್ಯಡ್ ಕೂಜಿಮಲೆತ ಅಂಗಡಿಯೊಂಜೆಟ್ ಎಣ್ಮ ಜನ ಬತ್ತ್‌ದ್ ಕಾಸ್ ಕೊರ್ದು ಸಾಮಾನ್ ಗೆತೊಂದಿತ್ತ್‌ದ್, ನಕ್ಸಲೆರ್ ಪನ್ಪಿ ಸಂಶಯೊಡು ಪೊಲೀಸೆರ್, ಎಎನ್ಎಫ್ ಕೂಟ ಭೇಟಿ ಕೊರ್ದು ಪರಿಶೀಲನೆ ಮಲ್ದೆರ್. ಶಂಕಿತ ನಕ್ಸಲೆರೆ ಕೂಟೊಡು ಆಜಿ ಜನ ಆಂಜೊವುಲು ಅಂಚೆನೇ ಇರ್ವೆರ್ ಪೊಂಜೊವುಲು ಇತ್ತೆರ್ ಪಂದ್ ತೆರಿದ್‌ಬೈದ್ಂಡ್, ಮೊಕಲೆಡ ಶಸ್ತ್ರಾಸ್ತ್ರೊಲು ಇತ್ತ ಪನ್ಪಿ ಒಲವು ತಿಕ್ಕ್‌ದ್ಂಡ್.