Last updated on April 11th, 2024 at 01:04 pm
ಕುಡ್ಲ: ಪೇಂಟೆದ ಪಿದಯಿ ಉಪ್ಪುನ ಬೊಂಡದ ಫ್ಯಾಕ್ಟರಿಯೊಂಜೆರ್ದ್ ಕನತಿನ ಬೊಂಡ ಪರ್ದ್ ಒಂತೆ ಜನ ಉಸಾರ್ ತತ್ತ್‌ದೆರ್ ಪಂದ್ ಸಾಮಾಜಿಕ ಬಲೆತ್ತಾನೊಡು ಪರಡಿನ ವರದಿದ ಆಧಾರೊಡು ಕುಡ್ಲ ಜಿಲ್ಲಾ ಆರೋಗ್ಯಾಧಿಕಾರಿ ಡಾ| ತಿಮ್ಮಯ್ಯ ಮೇರ್ ಫ್ಯಾಕ್ಟರಿಗ್ ಬತ್ತ್‌ದ್ ಪರಿಶೀಲನೆ ಮಲ್ದೆರ್.
ಈ ಬಗೆಟ್ ಪ್ರತಿಕ್ರಿಯೆ ಕೊರ್ನ ಡಿಎಚ್ಒ ‘ಆರೋಗ್ಯ ಇಲಾಖೆ ಕೂಟೊರ್ದು ಬೊಂಡದ ಪ್ಯಾಕ್ಟರಿಗ್ ಭೇಟಿ ಕೊರ್ತ. ಸುಮಾರ್ 15 ಲೀಟರ್ ಬೊಂಡದ ನೀರ್‌ನ್ ಪರೀಕ್ಷೆಗ್ ಬೋಡಾದ್ ಪ್ರಯೋಗಾಲಯೊಗು ಕಡಪುಡ್ದ. ವರದಿ ಬತ್ತಿ ಬೊಕ್ಕ ಬೋಡಾಪಿ ಕ್ರಮ ಗೆತೊನುವ’ ಪಂದ್ ಪಂಡೆರ್.
ಉಸಾರ್ ತತ್ತಿನ ಮೂವೆರೆಗ್ ಕುಡ್ಲದ ಖಾಸಗಿ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು. ಉಂದೆಟ್ ಇರ್ವೆರ್ ಪೊಂಜೊವುಲು ಬೊಕ್ಕ 12 ವರ್ಸೊದ ಬಾಲೆ ಸೇರ್ದ್ಂಡ್. ಅಕಲೆನ ಮೋಷನ್ ಮಾದರಿನ್ ಪ್ರಯೋಗಾಲಯೊಗು ಕಡಪುಡ್ದೆರ್. ಸುಮಾರ್ 13 ಜನ ಔಟ್ ಪೇಷೆಂಟ್‌ಲೆಕ ಮರ್ದ್ ಗೆತೊಂದೆರ್ ಪಂದ್ ಡಿಎಚ್ಒ ತೆರಿಪಾಯೆರ್.
ಕಲು ಸುದ್ದಿಲೆಗ್ ಕೆಬಿ ಕೊರಡೆ
ಕುಡ್ಲಡ್ ಅಂಚೆನೇ ಸುತ್ತಮುತ್ತದ ಪ್ರದೇಶೊಲೆಡ್ ಕಾಲರಾ ಉಂಡು ಪನ್ಪಿ ಕಲು ಒಲವು ತಿರ್ಗೊಂದುಂಡು. ಈ ಸುದ್ದಿಲೆಗ್ ಸಾರ್ವಜನಿಕೆರ್ ಕೆಬಿ ಕೊರ್ಯೆರೆ ಬಲ್ಲಿ ಪಂದ್ ಆರೋಗ್ಯ ಸಚಿವೆ ದಿನೇಶ್ ಗುಂಡೂರಾವ್ ಪಂಡೆರ್.
ತುಂಬೆ ಬೊಕ್ಕ ಅಡ್ಯಾ‌ರ್ ಪ್ರದೇಶೊದ ನಿವಾಸಿಲೆಡ ಕಕ್ಕುನ-ಪಿದಯಿ ಪೋಪುನ ತೋಜಿದ್ ಬೈದಿನೆತ ಬಗೆಟ್ ಜಿಲ್ಲಾ ಆರೋಗ್ಯಾಧಿಕಾರಿಲು ಆಸ್ಪತ್ರೆಲೆಗ್ ಪೋದು ಪರಿಶೀಲನೆ ಮಲ್ದೆರ್. ಬೊಂಡದ ಫ್ಯಾಕ್ಟರಿದ ಐಸ್ ಕ್ರೀಮ್ ಬೊಕ್ಕ ಬೊಂಡ ಪರ್ನೆರ್ದ್ ಬೊಕ್ಕ ಜನೊಕ್ಲೆಗ್ ಉರ್ಚುನ ಕಕ್ಕುನ ಸುರು ಆತಿನ ತೆರಿದ್ ಬೈದ್ಂಡ್. ಸೋಮವಾರದಾನಿ ಫ್ಯಾಕ್ಟರಿದ ಬೊಂಡ ಪರ್ನೆರ್ದ್ ಬೊಕ್ಕ ಆರೋಗ್ಯೊಡು ಎಚ್ಚಿಕಮ್ಮಿ ಆತಿನ ಬಗೆಟ್ ಅಲ್ಪದಕಲೆನ ಒಯಿಲ್‌ದ ಆಧಾರೊಡು ಜಿಲ್ಲಾ ಆರೋಗ್ಯ ಅಧಿಕಾರಿ ಬೊಕ್ಕ ಆಹಾರ ಸುರಕ್ಷತಾ ಅಧಿಕಾರಿಲು ಫ್ಯಾಕ್ಟರಿಗ್ ಪೋದು ಬೊಂಡದ ಸ್ಯಾಂಪಲ್‌ನ್ ಪ್ರಯೋಗಾಲಯೊಗು ಕಡಪುಡ್ದೆರ್. ಇಡೀ ಫ್ಯಾಕ್ಟರಿನ್ ಬಂದ್ ಮಲ್ತ್‌ದ್ ಕ್ಲೀನ್ ಮಲ್ದೆರ್. ಖಾಸಗಿ ಆಸ್ಪತ್ರೆಲೆಗ್ ಪೋದು ಸಂತ್ರಸ್ತರೆಗ್ ಸಮ ಮರ್ದ್ ಕೊರ್ಪುನ ವ್ಯವಸ್ಥೆ ಮಲ್ದ್ಂಡ್. ಸಾರ್ವಜನಿಕೆರೆಡ ಆರೋಗ್ಯ ಕಾತೊನುನ ದಿಟ್ಟಿಡ್ ಬೋಡಾಪಿನ ಮಾತಾ ಕ್ರಮೊಕ್ಲೆನ್ ಗೆತೊನೆರೆ ಆರೋಗ್ಯಾಧಿಕಾರಿಲೆಗ್ ಸೂಚನೆ ಕೊರ್ತೆ. ಸಾರ್ವಜನಿಕೆರ್ ಕಾಲರಾದ ಕಲು ಒಲವುಗು ಕೆಬಿ ಕೊರೊರ್ಚಿ ಪಂದ್ ಕೇನೊಂದುಲ್ಲೆ ಪಂದ್ ಆರ್ ಪಂಡೆರ್.