Last updated on May 27th, 2024 at 07:37 am
ಕುಡ್ಲ: ಶುಕ್ರವಾರ ರಾತ್ರೆ ದೊರಿನ ಬಾರೀ ಬರ್ಸೊಗು ಕೊಟ್ಟಾರಚೌಕಿಡ್ ದಿಂಜಿದ್ ಪರತೊಂದಿತ್ತಿನ ರಾಜಕಾಲುವೆಗ್ ಆಟೋರಿಕ್ಷಾ ಬೂರ್ದು ಡ್ರೈವರ್ ತೀರ್ದಿನ ನಡಕೆರ್ದ್ ಬೊಕ್ಕ ಆ ಜಾಗೆಡ್ ತಾತ್ಕಾಲಿಕವಾದ್ ದುಂಬೆಚ್ಚರ್ಗೆದ ಕ್ರಮೊಕುಲೆನ್ ಗೆತೊಂದೆರ್.
ತಾತ್ಕಾಲಿಕ ದುಂಬೆಚ್ಚರ್ಗೆದ ಕ್ರಮವಾದ್, ಪೊಯ್ಯೆದ ಗೋಣಿ, ಬ್ಯಾರಿಕೇಡ್‌, ರಿಫ್ಲೆಕ್ಟರ್‌ ಟೇಪ್‌ ಪಾಡ್ದೆರ್. ಜಾಗೆಗ್ ತಹಶೀಲ್ದಾರ್‌, ಆಯುಕ್ತೆರ್ ಸೇರ್ದ್ ಅಧಿಕಾರಿಲು ಬತ್ತ್‌ದ್ ಪರಿಶೀಲನೆ ಮಲ್ದೆರ್. ನಡಕೆ ನಡತಿನ ತೋಡು ಸೇರ್ದ್ ಪೇಂಟೆಡ್ ಇಂಚ ಅಪಾಯಕಾರಿಯಾದುಪ್ಪುನ ಮಾತಾ ರಾಜಕಾಲುವೆಲೆನ ಬರಿತ ರೋಡ್‌ಲೆಡ್ ಸುರಕ್ಷಿತ ಸಂಚಾರೊಗು ಕ್ರಮ ಗೆತೊನೊಡು ಪನ್ಪಿ ಒತ್ತಾಯ ಎಚ್ಚ ಆತ್ಂಡ್.
ಪರಿಶೀಲನೆ ಮಲ್ತಿಬೊಕ್ಕ ಪರಿಹಾರ
ತೀರ್ದಿನ ರಿಕ್ಷಾ ಡ್ರೈವರ್ ದೀಪಕ್‌ ಆಚಾರ್ಯೆರೆನ ಕುಟುಂಬಸ್ಥೆರೆಗ್ ಪ್ರಾಕೃತಿಕ ವಿಕೋಪ ಪರಿಹಾರ ಸದ್ಯೊಗು ತಿಕ್ಕ್‌ದಿಜಿ. ಕೆಲ ಪ್ರಕರಣೊಲೆಡ್ ನಡಕೆ ನಡತಿನ 24 ಗಂಟೆದುಲಯಿ ಪರಿಹಾರಧನ ತಿಕ್ಕುಂಡು. ಆಂಡ ಮಾತ ನಡಕೆಲೆಡ್ ಅಪಗನೇ ಪರಿಹಾರ ತಿಕ್ಕುಜಿ. ಈ ನಡಕೆಗ್ ಸಂಬಂಧಿತ್‌ದ್ ಎಫ್ಐಆರ್‌, ಇನ್ಶೂರೆನ್ಸ್‌ ಇಂಚ ಬೇತೆ ಬೇತೆ ವಿಚಾರೊಲೆನ್ ಪರಿಶೀಲಿತ್‌ದ್ ಅವೆರ್ದ್ ಬೊಕ್ಕ ಪರಿಹಾರ ಕೊರ್ಪುನ ತೀರ್ಮಾನ ಗೆತೊನುವ ಪಂದ್ ಅಧಿಕಾರಿಲು ತೆರಿಪಾದೆರ್.