Last updated on May 26th, 2024 at 01:39 pm
ಒಡಿಪು: “ರಾಜ್ಯೊಡು ಕನ್ನಡ ಮಾತ್ರ ಅಪ್ಪೆಬಾಸೆ ಆದಿತ್ತ್‌ದ್ ಆಳ್ಮೆದ ಪ್ರತಿಯೊಂಜಿ ಹಂತೊಡುಲಾ ಕನ್ನಡೊನೇ ಗಲಕೆ ಆವೊಂದುಂಡು. ಅಂಚಾದ್ ಮಾತಾ ಅಂಗಡಿ, ಹೋಟೆಲ್ ಅಂಚೆನೇ ಕಂಪೆನಿಲು ಕನ್ನಡ ಪುದರ್ ಪಲವೆನೇ ಕಡ್ಡಾಯವಾದ್ ಗಲಸೊಡು” ಪನ್ದ್ ಪನ್ತಿನ ಒಡಿಪು ನಗರಸಭೆತ ಪೌರಾಯುಕ್ತೆ ರಾಯಪ್ಪೆರ್ ಪನ್ತೆರ್ ಪನ್ಪಿನ ನ್ಯೂಸ್ ಕಟ್ ಒಂಜಿ ತುಳುವೆರೆ ವಲಯೊಡು ವೈರಲ್ ಆವೊಂದುಂಡು. ಬೇತೆ ಬಾಸೆ ಗಲಸ್ಂಡಲಾ ಕನ್ನಡೊದ ಅಚ್ಚರ ಮಲ್ಲೆಟ್ ಇಪ್ಪೊಡು, ಜೂನ್ 30 ಪೋಪುನೇಟ ಅವಕಾಶ ಉಂಡು, ಅವೆಕ್ ತತ್ತ್ಂಡ ₹5000 ರ್ದ್ ₹10,000 ಮುಟ್ಟ ದಂಡ ಕಟ್ಟೊಡು. ಆತೇ ಅತ್ತಂದೆ, ಅಂಚಿನ ವೈವಾಟ್‌ದಕ್ಲೆನ ಲೈಸೆನ್ಸ್‌ನ್ಲಾ ಕ್ಯಾನ್ಸಲ್ ಮನ್ಪುವ ಪಂದ್ ಪ್ರಕಟಣೆಡ್ ಪನ್ತೆರ್.
ಕರ್ನಾಟಕೊದ ಸರಕಾರೊಲೆನ ನಾಮಾಸ್‌ರ್ದ್ ಮೂಡ್ಯೆ ಸೇರ್ದಿತ್ತಿ ತುಳು ಲಿಪಿ ಇತ್ತೆ ಜಕ್ಕ್‌ದ ತುಳುವೆರೆನ ಉಮೇದ್‌ರ್ದಾವರ ಕುಡೊರ ಮೆಯಿ ಕುಡ್ತ್ ಲಕ್ಕೊಂದುಪ್ಪುನ ಪೊರ್ತುಡು, ರಾಜ್ಯೊದ ಕನ್ನಡೊನೇ ಪಾತೆರುನ ಬೇತೆ ಜಿಲ್ಲೆಲೆಡ್ ಇಜ್ಜಂದಿನ ಈ ವಿವಾದಾತ್ಮಕ ಕಾನೂನು ತುಳುನಾಡ್‌ಡ್ ಮಾತ್ರ ದಾಯೆ ಪಂದ್ ತುಳುವೆರೆನ ಪ್ರಶ್ನೆ.
ಬೆಂಗ್ಳೂರ್‌ಡ್ ಕರಿನ ವರ್ಸೊದ ಅಕೇರಿಡ್ ರಾಜ್ಯ ಸರ್ಕಾರೊದ ಕನ್ನಡ ವಿಧೇಯಕ, 60% ಕನ್ನಡ ಬೋರ್ಡ್ ಈ ಮಾತ ಇಸಯೊಲು ನಡತಿನೇ ‘Retailers association of India’ ಸರ್ಕಾರೊದ ಈ ವಿಧೇಯಕೊದ ಎದುರು ಹೈ ಕೋರ್ಟ್‌ಡ್ ರಿಟ್ ಪೆಟಿಷನ್ ಪಾಡ್ದಿತ್ತ್ಂಡ್. ಈ ಕೇಸ್‌ದ ಜಡ್ಜೆರಾದಿತ್ತಿನ ಜಸ್ಟಿಸ್ ಎಮ್. ನಾಗಪ್ರಸನ್ನೆರ್ ಮಾರ್ಚ್ 18 ಪೋಪುನಾನಿ ಕೊರ್ತಿನ ಆದೇಶೊಡು, “ಸರ್ಕಾರೊದ ಈ ಆದೇಶ ಸಮರ್ಥನೆ ಮಲ್ತೊನುನಂಚಿನವತ್ತ್, 60% ಕನ್ನಡ ಇಜ್ಜಂದಿನ ಅಂಗಡಿಲೆನ್ ಸೀಲ್ ಮನ್ಪುವ ಪಂದ್ ಪನ್ತಿನ ಸುತ್ತೋಲೆನ್ ಇತ್ತೆನೇ ಉಂತಾವೊಡು” ಪನ್ದ್ ಆದೇಶ ಕೊರ್ದಿತ್ತೆರ್.
ಹೈಕೋರ್ಟ್ ಒವ್ವೇ ಒಂಜಿ ಬ್ಯುಸಿನೆಸ್ ಅತ್ತ್ಂಡ ವೈವಾಟ್‌ದಕ್ಲೆನ ಲೈಸೆನ್ಸ್ ಕ್ಯಾನ್ಸಲ್ ಮನ್ಪೆರಗ್ ಕಾಲಿ ಒಂಜಿ ಬೋರ್ಡ್ ನೆವನ ಆವೆರೆ ಬಲ್ಲಿ ಪಂದ್ ಪಂದಿತ್ತ್ಂಡಲಾ, ಒಡಿಪು ನಗರಸಭೆ ಈ ಇಸಯೊಡು ತನ್ಕುಲೆನನೇ ಕಾನೂನು ಕನವೊಂದುಪ್ಪುನವು ತುಳುವೆರೆಗ್ ಬೆಸರ್ ಕನದ್ಂಡ್. ತುಳು ಲಿಪಿತ ಗಲಕೆ ಎಚ್ಚ ಆವೊಂದುಪ್ಪುನ ಈ ಪೊರ್ತುಡು ಇಂಚಿನ ಕಾನೂನುಲು ಲಿಪಿ ಗಲಸುನ ಅಲೆಚನೆಡ್ ಇಪ್ಪುನಕಲೆಗ್ ಒಂಜಿ ತಲೆಪು ಆಪುಂಡು. ಆತ್ ಮಲ್ಲೆಟ್ ದಾಯೆ ಬೋಡು, ಓದುನಾತ್ ಮಲ್ಲೆ ಇತ್ತ್‌ದ್, ನಮಕ್ ಬೋಡಾಯಿನ ಲಿಪಿನ್ ಮಲ್ಲೆಟ್ ಪಾಡುನ ಅವಕಾಶ ಇಪ್ಪೊಡು ಪಂದ್ ತುಳುವೆರೆನ ವಾದ.
ಈ ಬಗೆಟ್ ಮುಲ್ಪದಕುಲೇ ಆಯಿನ ನಗರಸಭೆತ ಪದುಕೆರ್, ಜನಪ್ರತಿನಿಧಿಕುಲು ದಾದ ಪನ್ಪೆರ್ ಪಂದ್ ಕಾತ್‌ದ್ ತೂವೊಡಾತೆ. ತುಳುನಾಡ್‌ಡ್ ಇಂಚಿನ ಆದೇಶೊಲೆನ್ ಕೊರ್ದು ತುಳುವೆರ್ ಬೊಕ್ಕ ಕನ್ನಡಿಗೆರೆನ ನಡುಟು ಕಲಂಕುಲೆಕ್ಕ ಮಲ್ಪುನವು ಸಮಾದುಂಡಾ? ಬಹುಸಂಖ್ಯಾತ ತುಳುವೆರೆನ ಓಟುಡು ಗೆಂದುನ ಒಡಿಪು ನಗರಸಭೆತ ಸದಸ್ಯೆರ್ ಆವಡ್ ಒಡಿಪುದ ಶಾಸಕೆರ್ ಆವಡ್ ಇಂಚಿನೆಕ್ಕ್ ಸಮರ್ಥನೆ ಮಲ್ಪುವೆರೊ? ಒಡಿಪುಡು ಜಾತಿ, ಧರ್ಮ,ಭಾಷೆದ ಬೇದ ದಾಂತೆ ಶಾಂತಿಯುತವಾದ್ ಬೇರ ಮಲ್ತೊಂದಿಪ್ಪುನ ವೈವಾಟ್‌ದಕಲೆನ ಮಿತ್ತ್ ಇಂಚಿನ ಪುದೆ ಪಾಡರೆ ಬಲ್ಲಿ.