Last updated on June 30th, 2024 at 06:15 pm
ಕುಡ್ಲ ಜೂನ್ 30: ಕುಡ್ಲ ಪೇಂಟೆಡ್ ಕರೆಂಟ್ ಕುಂದೊಲೆಡ್ ಕರೆಂಟ್ ವೈರ್‌ರ್ದ್ ಎಚ್ಚಾದ್ ಇಂಟರ್ನೆಟ್ ಕೇಬಲ್‌ಲು ಇತ್ತ್‌ದ್, ಈ ಅನಧಿಕೃತ ಕೇಬಲ್‌ಲೆರ್ದ್ ಜೂವೊಗು ಸಂಚಿಕಾರ ಆವೊದುಂಡು. ಅಂಚಾದ್ ಅವೆನ್ ದೆಪ್ಪಾವುನ ಬಗೆಟ್ ಮಹಾನಗರ ಪಾಲಿಕೆ ಸಾಮಾನ್ಯ ಸಭೆಟ್ ಪಕ್ಷಬೇಧ ಮದತ್‌ದ್ ಪದುಕೆರ್ ಮಾತ ಆಗ್ರಹ ಮಲ್ತೆರ್. ಈ ಬಗೆಟ್ ಪಾಲಿಕೆ ಬೊಕ್ಕ ಮೆಸ್ಕಾಂ ಕಡೆರ್ದ್ ಒಟ್ಟುಗು ಸರ್ವೆ ಮಲ್ತ್‌ದ್ ದೆಪ್ಪಾವೆರ ಕ್ರಮ ಗೆತೊನುವ ಪಂದ್ ಆಯುಕ್ತೆರ್ ಪಾತೆರ ಕೊರ್ಯೆರ್.
ಪಾಲಿಕೆದ ಮಂಗಳಾಸಭಾಂಗಣೊಡು ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಗುರ್ಕಾರ್ಮೆಡ್ ಸಾಮಾನ್ಯ ಇನಯ(ಸಭೆ) ನಡತ್ಂಡ್. ವಿಪಕ್ಷ ನಾಯಕೆ ಪ್ರವೀಣ್‌ ಚಂದ್ರ ಆಳ್ವೆರೆ ಪ್ರಸ್ತಾಪೊಗು ಪದುಕೆ ಮಹಮ್ಮದ್ ಲತೀಫ್, ಅಬ್ದುಲ್ ರವೂಫ್, ಶಶಿಧರ ಹೆಗ್ಡೆ ದನಿಗೋಡ್ಯಾದ್, ಕರೆಂಟ್ ಕುಂದೊಲೆಡ್ ಅಕ್ಲೆಗ್ ಬೋಡಾಯಿ ಲೆಕ ಕೇಬಲ್ ಪಾಡೊಂದೆರ್. ಮಾತ ಕೇಬಲ್ಲೆನ್ ದೆಪ್ಪಾದ್ ಮಣ್ಣ್‌ದಡಿಟೆ ಪಾಡೆರೆ ಅವಕಾಶ ಮಲ್ತ್‌ಕೊರೊಡು ಪಂದ್ ಆಗ್ರಹ ಮಲ್ತೆರ್.
ಉಂದೆಕ್ ಸದು ಕೊರ್ನ ಮೆಸ್ಕಾಂ ಅಧಿಕಾರಿ, ಕರಿನ ರಡ್ಡ್ ವರ್ಸೊರ್ದಿಂಚಿ ಪೊಸ ಕೇಬಲ್ ಪಾಡ್ಯೆರೆ ಏರೆಗ್ಲಾ ಅನುವು ಕೊರ್ತುಜ. ಪಾಲಿಕೆರ್ದ್ NOC ಕೊರ್ನ್ಡ ಮಾತ್ರ ಅನುವು ಕೊರ್ಪುಂಡು. ಈ ಬಗೆಟ್ ನೋಟಿಸ್ ಕೊರ್ದೇ ಕರೆಂಟ್ ಕುಂದೊಲೆರ್ದ್ ಕೇಬಲ್ ವಮರ್ ದೆಪ್ಪೆರೆ ಕ್ರಮ ಗೆತೊನೊಂದುಂಡು ಪಂದ್ ಪಂಡೆರ್. ಅನಧಿಕೃತ ಕೇಬಲ್ಲೆನ್ ದೆಪ್ಪಾಯೆರ ಅಧಿಕಾರಿಲೆಗ್ ಮೇಯರ್ ಸೂಚನೆ ಕೊರ್ಯೆರ್.