Last updated on June 12th, 2024 at 01:15 pm
ಬಂಟ್ವಾಳ: ಹಾಸನ ಮೂಲೊದಾಯೆ ಒರಿ ಇಲ್ಲಗ್ ಪೊಗ್ಗುದು ಒಂಟಿ ಪೊಂಜೊವುಗು ಲೈಂಗಿಕ ಕಿರುಕುಳ ಕೊರ್ತಿನತ್ತಂದೆ ಕೆರ್ಪೆ ಪಂದ್ ಪೋಡಿಗೆ ಕಟ್ಟಾದಿನ ನಡಕೆ ಜೂನ್ 11 ತಾನಿ ಕಲ್ಲಡ್ಕಡ್ ನಡತ್‌ದ್ಂಡ್.
ನಡಕೆಗ್ ಸಂಬಂಧಿತ್‌ದ್ ಹಾಸನ ಮೂಲೊದ ಬೇಲೂರು ನಿವಾಸಿ ರಿಕ್ಷಾ ಡ್ರೈವರ್ ಪ್ರಮೋದ್ ಪನ್ಪಿನಾಯನ್ ಪೊಲೀಸೆರ್ ಕೈದ್ ಮಲ್ತ್‌ದ್ ನ್ಯಾಯಂತಡೆಕ್ ಹಾಜಿರಿ ಮಲ್ದೆರ್.
ಕಲ್ಲಡ್ಕ ಮುಟ್ಟದ ಬೊಂಡಾಲದ ಸಂತ್ರಸ್ತೆದಿ ಬಂಟ್ವಾಳ ನಗರ ಪೊಲೀಸ್ ಸ್ಟೇಷನ್‌ಗ್ ಒಯಿಲ್ ಕೊರ್ತೆರ್.
ಪೊಂಜೊವುನ ಸ್ವಂತ ಊರು ಹಾಸನ ತಾಲೂಕ್‌ದ ಬೇಲೂರು ಆದಿತ್ತ್‌ದ್, ಕಲ್ಲಡ್ಕದ ಅಮ್ಟೂರು ಪನ್ಪಿನಡೆ ಮದಿಮೆ ಮಲ್ತ್ ಕೊರ್ತೆರ್.
ಪೊಂಜೊವುನ ಊರ್ ಹಾಸನೊಡು ಪ್ರಮೋದ್ ರಿಕ್ಷಾ ಡ್ರೈವರ್ ಆದಿತ್ತೆ. ದುಂಬು ಅಪ್ಪೆ ಇಲ್ಲಡೆ ಉಂಬ್ಯನ ರಿಕ್ಷಾಡ್ ಬಾಡಾಯಿ ಮಲ್ಪೋತೊಂದು ನಗ ಸಂತ್ರಸ್ತೆದಿ ಪೊಂಜೊವುಗು ಉಂಬ್ಯನ ಗುರ್ತ ಆದಿತ್ತ್‌ದ್, ಮೊಬೈಲ್ ನಂಬ್ರಲಾ ಆಯೆ ಗೆತೊಂದೆ.
ಮೊಬೈಲ್‌ಡೆ ಉಂಬ್ಯಡ ಪಾತೆರಕತೆ ಬಾರೀ ಬುಲೆದ್ ಕರಿನ ಒಂತೆ ಸಮೆ ದುಂಬು ಕಂಡನ್ಯನ ಇಲ್ಲ್ ಕಲ್ಲಡ್ಕಗ್ ಬತ್ತಿತ್ತೆ. ಇಲ್ಲಗ್ ಬತ್ತಿನ ಪ್ರಮೋದ್ ಪೊಂಜೊವುಗು ಉಪದ್ರ ಕೊರ್ತಿನತ್ತಂದೆ, ಇಲ್ಲಡಿತ್ತಿನ ಪಾಕ ಸೊತ್ತುಲೆನ್ಲಾ ಪೊಡಿ ಮಲ್ತ್ ಪೋದಿತ್ತೆ. ಈ ಪೊರ್ತುಡು ಆಯಗ್ ಎಚ್ಚರ್ಗೆ ಕೊರ್ದು ಕಡಪುಡ್ದಿತ್ತ್ಂಡ್ ಪಂದ್ ತೆರಿದ್ಂಡ್.
ಇತ್ತೆ ಪಿರ ಹಾಸನರ್ದ್ ಬಂಟ್ವಾಳಗ್ ಬೈದಿನ ಆರೋಪಿ ಪ್ರಮೋದ್ ಕುಡ ಕಂಡನೆ ಇಜ್ಜಂದಿನ ಪೊರ್ತು ತೂದು ಪೊಂಜೊವುನ ಇಲ್ಲಗ್ ಪೊಗ್ಗುದೆ. ಪೊಂಜೊವುನು ಅರಾದ್ ಪತ್ತ್‌ದ್ ಲೈಂಗಿಕವಾದ್ ಮುಟ್ಟ ಆಯೆರ ತೂತೆ.
ಪೊಂಜೊವು ಜೋರ್ ಕಲ್ಕ್‌ನಗ ಇಲ್ಲದ ಮುಟ್ಟದ ದೇವಲ್ಯದುಲಯಿ ಇತ್ತಿನ ಕಂಡನೆ ಬತ್ತ್‌ದ್ ರಕ್ಷಣೆ ಮಲ್ತ್‌ದೆರ್ ಪಂದ್ ತೆರಿದ್ಂಡ್.
ಈ ಪೊರ್ತುಡು ಪೊಂದಜೊವುಗು ಪೆದಂಬು ನೆರ್ದ್, ಕಂಡನ್ಯನ್ ಬಾಲೆನ್ ಒಟ್ಟುಗು ಕೆರ್ಪೆ ಪಂಡ್‌ದ್ ಪೋಡಿಗೆ ಕಟ್ಟಾದೆ ಪಂದ್ ಒಯಿಲ್ ಕೊರ್ತೆರ್.
ಇಂಚ ಪೊಂಜೊವು ಕೊರ್ತಿನ ಒಯಿಲ್‌ದ ಆಧಾರೊಡು ಬಂಟ್ವಾಳ ಪೋಲೀಸೆರ್ ಆರೋಪಿನ್ ಕೈದ್ ಮಲ್ತ್‌ದ್ ನ್ಯಾಯಂತಡೆಕ್ ಹಾಜಿರಿ ಮಲ್ದೆರ್.