Last updated on June 11th, 2024 at 02:10 pm
ಉಳ್ಳಾಲ: ಮುಲ್ಪದ ಕಡಲ ಕರೆಕ್ ತಿರ್ಗೆರೆ ಬತ್ತಿತ್ತಿನ ಆಂದ್ರಪ್ರದೇಶ ಮೂಲೊದ ನಾಲ್ವೆರ್ ಪೊಂಜೊವುಲೆಡ್ ಒರ್ತಿ ಕಡಲ ಪಾಲಾದಿತ್ತ್‌ದ್, ಒರಿನ ಮೂವೆರೆನ್ ಮುಟ್ಟದಕುಲು ರಕ್ಷಣೆ ಮಲ್ದೆರ್.
ಆಂದ್ರಪ್ರದೇಶೊದ ಕೊಂಡಾಪುರದ ಸಿರಿಲಿಂಗಪಲ್ಲಿ ನಿವಾಸಿ ಪಿ.ಎಲ್ ಪ್ರಸನ್ನ ಪನ್ಪಿನಾರೆನ ಬೊಡೆದಿ ಪರಿಮೀ ರತ್ನ ಕುಮಾರಿ (57) ತೀರ್ದಿನಾರ್.
ಉಳ್ಳಾಲ ಬೀಚ್‌ಡ್ ತಿರ್ಗೊಂದುಪ್ಪುನಗ ನೇಲ್ಯ ಗಾತ್ರೊದ ಸಿರೆ ಒಂಜಿ ಬತ್ತ್‌ದ್ ನಾಲ್ವೆರ್ ಪೊಂಜೊವುಲೆನ್ಲಾ ಒಯ್ತೊಂದು ಪೋತುಂಡು. ಅಲ್ಪ ಇತ್ತಿನಕುಲು ಅಪಗನೇ ನಾಲ್ವೆರೆನ್ಲಾ ಕಡಲ್‌ರ್ದ್ ಪಿದಯಿ ಒಯ್ತ್‌ದ್ ಕಾತ್‌ದೆರ್. ಉಂದೆಟ್ ಪರಿಮೀ ರತ್ನ ಕುಮಾರಿ ಮತಿ ತತ್ತಿನೆರ್ದಾವರ ದೇರಳಕಟ್ಟೆ ಆಸ್ಪತ್ರೆಗ್ ಲೆತೊಂದು ಪೋದಿತ್ತ್‌ದ್, ಅಲ್ಪ ತೀರ್ದೆರ್.
ಹೈದರಾಬಾದ್‌ರ್ದ್ 5 ಜನ ಪೊಂಜೊವುಲೆ ಕೂಟ ಜೂ.6 ಕ್ ಮೈಸೂರ್‌ಗ್ ವಿಮಾನೊಡು ಬತ್ತಿತ್ತೆರ್. ಅಲ್ಪ ಪ್ರವಾಸ ಮುಗಿತ್‌ದ್ ಇನೋವಾ ಕಾರ್‌ಡ್ ಜೂ.7 ಕ್ ಕೊಡಗುಗ್ ಎತ್ತ್‌ದಿತ್ತ್ಂಡ್. ಅಲ್ಪರ್ದ್ ಸುಬ್ರಹ್ಮಣ್ಯ ಕ್ಷೇತ್ರ ಸಂದರ್ಶನ ಮಲ್ತ್‌ದ್, ಕೋಡೆ ಧರ್ಮಸ್ಥಳಗ್ ಪೋದು ಉಳ್ಳಾಲ ಕಡಲ ಕರೆಕ್ ಬತ್ತಿತ್ತೆರ್ ಪಂದ್ ತೆರಿದ್‌ಬೈದ್ಂಡ್.