Last updated on June 24th, 2024 at 10:54 am
ಬಂಟ್ವಾಳ: ಎಲ್ಯ ನೀರಾವರಿ ಇಲಾಖೆದ ಮುಕೇನ ಸುಮಾರ್ 135 ಕೋ.ರೂ. ಕರ್ಚಿಡ್ ಬಂಟ್ವಾಳದ ಜಕ್ರಿಬೊಟ್ಟುಡು ನೇತ್ರಾವತಿ ಸುದೆಕಡ್ಡ ಕಟ್ಟೊಂದಿತ್ತಿನ ಕಂಡಿ ಅಣೆಕಟ್ಟ-ಸಂಕ (ಬ್ರಿಡ್ಜ್ ಕಂ ಬ್ಯಾರೇಜ್‌) ದ ಬೇಲೆ ಪೂರ್ಣ ಆದಿತ್ತ್‌ದ್, ಎರಡು ಊರ್ ಕೂಡೆರೆ ಬೆಸಿಗೆ ಆವರೆ ಉಂಡು ಅಂಚೆನೇ ನೀರ್‌ದ ಎತ್ವಾರೊಗ್ಲಾ ಸದು ಆವರೆ ಉಂಡು.
ಬೇಲೆ ಪತ್ತ ಆದ್ ಪ್ರಾಯೋಗಿಕ ಗೇಟ್‌ ಟೆಸ್ಟ್ ಮಲ್ದಿನ ಇಲಾಖೆ, ಅವೆತ ಬೆರಿನೀರ್‌ದ ಡ್ರೋನ್‌ ಪೋಟೋಲೆನ್ ಗೆತ್ತ್‌ದ್ಂಡ್. ಯೋಜನೆ ಏಪ ಲೋಕಾರ್ದೆಪಣೆ ಆಪುಂಡು ಪನ್ಪಿನ ಒಲವು ತಿಕ್ಕ್‌ದಿಜಿ.
ಈ ಯೋಜನೆಗ್ ಬಂಟ್ವಾಳ ಶಾಸಕೆ ರಾಜೇಶ್‌ ನಾೖಕ್‌ ಉಳಿಪಾಡಿ ಗುತ್ತು ಮೆರೆನ ಪ್ರಸ್ತಾವನೆದಂಚ ಅನುದಾನ ಮಂಜೂರಾದಿತ್ತ್ಂಡ್. ಉಂದು ಬಂಟ್ವಾಳ ಪುರಸಭಾ ಸೀಮೆದ ಜಕ್ರಿಬೊಟ್ಟು ಅಂಚೆನೇ ನರಿಕೊಂಬು ಗ್ರಾಮೊಲೆನ್ ಮುಟ್ಟ ಮನ್ಪುಂಡು.
166 MCFT ನೀರು ಪತ್ತ್ ದೀಪುನ ಸಾಮರ್ಥ್ಯ
ಅಣೆಕಟ್ಟ 351.25 ಮೀ. ಉದ್ದ ಅಂಚೆನೇ 5.50 ಮೀ. ಎತ್ತರ ಇತ್ತ್‌ದ್, ಫುಲ್ ಗೇಟ್‌ ಪಾಡ್ಂಡ 166 MCFT ನೀರ್ ಉಂತುದು ಸುಮಾರ್ 5 ಕಿ.ಮೀ. ಮುಟ್ಟ ಬೆರಿನೀರ್ ಉಂತುಂಡು. ಸಂಕದ ಅಗೆಲ 7.50 ಮೀ. ಇತ್ತ್‌ದ್, 21 ಕಂಡಿಲು ಉಲ್ಲ. 12 ಮೀ. ಅಗೆಲದ ವರ್ಟಿಕಲ್‌ ಲಿಫ್ಟ್‌ ಗೇಟ್‌‌ಲ್ ಇತ್ತ್‌ದ್, ನಡುಟು ರಡ್ಡ್ ಸ್ಕವರ್ ಸ್ಲೂಯಿಸ್ ಗೇಟ್‌‌ಲ್ ಉಲ್ಲ.
ಎಮರ್ಜೆನ್ಸಿ/ಪ್ರವಾಹೊದ ಪೊರ್ತುಡು ನೀರ್‌ನ್
ತಿರ್ತ್ ಬುಡ್ಯೆರ ಬೋಡಾದ್ ಸ್ಕವರ್ ಸ್ಲೂಯಿಸ್ ಗೇಟ್‌‌ಲೆನ್ ಗಲಸ್‌ದಿತ್ತ್‌ದ್, ಉಂದು ಲಿಫ್ಟ್‌ ಗೇಟ್‌ಲೆರ್ದ್ ಮಸ್ತ್ ತಿರ್ತ್ ಇಪ್ಪುಂಡು. ಅಂಚಾದ್ ಅಡಿಟ್ ಪೊಯ್ಯೆ, ಕೆಸರ್ ಒಂದ್ಂಡ ಅವೆನ್ಲಾ
ಪಿದಯಿ ಪಾಡ್ರೆ ಸಕಾಯ ಆಪುಂಡು -ಶಿವಪ್ರಸನ್ನ,
ಇಲಾಖೆದ ಅಸಿಸ್ಟೆಂಟ್ ಎಂಜಿನಿಯರ್‌