Last updated on July 5th, 2024 at 01:30 pm
ತುಳುನಾಡ ಒಡಿಪುದ ಜವನೆರೆ ಕೂಪೆಯೊಂಜಿ ದೂರದ ಮೈಸೂರುಡು ಫಿಲಂ ಪ್ರೊಡಕ್ಷನ್ ಒಂಜಿ ನಡಪಾವೊಂದುಂಡು. ಅಕ್ಲೆನ ತಂಡ ಕೆಲವೊಂಜಿ ಕಿರುಚಿತ್ರೊಲೆನ್ ಮಾತ ಮಲ್ದೆರ್. ಇತ್ತೆ ತುಳುನಾಡ ಜನಜೀವನ, ಆಚಾರ-ವಿಚಾರ,ಆಚರಣೆಲು ಅಂಚೆನೆ ತುಳುವೆರೆನ ಸ್ವಾಭಿಮಾನ ಜೀವನದ ಕಥೆಟ್ ಒಂಜಿ ಬಹುಭಾಸೆ ದ ಪಿಕ್ಚರ್ ದೆಪ್ಪರೆ ಪಿದಾಡ್ದೆರ್.
ಈ ಪಿಚ್ಚರ್ಡ್ ತುಳುನಾಡ ದೈವೊಲೆನ ಮೊಗಮೂರ್ತಿ ಆವಡ್, ತುಳು ಆಚರಣೆಲೆಗ್ ಆವಡ್ ಅಪಮಾನ ಮನ್ಪಂದೆ ತುಳುವೆರೆನ ಗತ್ತ್ ಗೌರವೊನು ಜನಕ್ಲೆಗ್ ತೆರಿಪಾವುನ ಪುನೆವು ಆವೊಂದುಂಡು ಪನ್ದ್ ನಿರ್ಮಾಪಕೆರಾಯಿನ ಸಂಜಯ್ ದಯಾನಂದ್ ತೆರಿಪಾಯೆರ್.
ಇಂಚಿಪ್ಪೊಗು ತುಳು ಸಂಸ್ಕೃತಿಗ್ ಆವೊಂದಿಪ್ಪುನ ಅಪಚಾರೊಲೆನ್ ಸಮರ್ಥನೆ ಮಂತೊಂದು ಸಾದಿ ತತ್ತೊಂದಿಪ್ಪುನ ಯುವ ಸಮುದಾಯದ ಕೆಲವೆರೆಗ್ ಬುದ್ದಿ ಪನ್ಪುನ ರೀತಿಡ್ ಈ ಪಿಕ್ಚರ್ ತಯಾರಾವೊಂದುಂಡು. ಅವೆತ ಬಗೆಟ್ ತುಳು ವಿದ್ವಾಂಸೆರ್, ತೆರಿಯಿನಕುಲು ಅತ್ತಂದೆ ಅಕಾಡೆಮಿದಕ್ಲೆಗಲ ತೆರಿಪಾವುನ ಪುನೆಪುಗು ಚಿತ್ರತಂಡ ಪಿದಾಡ್ದೆರ್ ಪನ್ದ್ ಆರ್ ತೆರಿಪಾಯೆರ್.
ಹೀರೋ ಆದ್ ತೆಕ್ಕಟೆದ ಯುವಕಲಾವಿದೆ ಗಣೇಶ್, ಅಂಚೆನೆ ಕನ್ನಡ-ತಮಿಳು ಚಿತ್ರರಂಗದ ಪೆರಿಯ ಕಲಾವಿದೆರ್, ತುಳು ನಾಟಕ ಕಲಾವಿದೆರ್, ಪೊಸ ಜವನೆರಾಯಿನ ಹರ್ಷ, ನಿತಿನ್, ಕೀರ್ತಿ, ಮಾರುತಿ, ಧ್ರುವ,ಕಾರ್ತಿಕ್,ಅಭಿನಂದನ್ ಬೊಕ್ಕ ಮಾಡೆಲಿಂಗ್ ಕಲಾವಿದೆದಿಯಾಯಿನ ವಿಶಾಖಾ ಅಮೃತ ಮುಖ್ಯ ಪಾತ್ರೊಡು ಬರೊಂದುಲ್ಲೆರ್.ಅಂಚನೆ ಒಂಜಿ ತುಳು ವಿದ್ವಾಂಸೆರೆನ ಮಾರ್ಗದರ್ಶನೊಡು ಚಿತ್ರತಂಡ ಇಂಚಿಪ್ಪೋಗ್ ಮೈಸೂರ್ದ ಅಕ್ಲೆನ ಸ್ಟುಡಿಯೋಡ್ ಮುಹೂರ್ತ ಮಂತ್‌ದ್ ಜತ್ತ್ ಪಿದಾಡ್ದೆರ್.
ಛಾಯಾಗ್ರಾಹಕೆರಾದ್ ಬ್ರಹ್ಮಾವರದ ಗಣೇಶ್, ತುಳು ಮೂಲದ ಮುಂಬೈದ ಧೀರಜ್, ಸಂಗೀತ ವಿಭಾಗೊಡು ವಿಘ್ನೇಶ್ ರಾವ್ ಗೋಡುದ್ ಎಡ್ಡೆ ಪುನೆಪುಗು ಪಿದಡಿನ ಚಿತ್ರತಂಡ ಉಂದೆ ಬರ್ಪಿನ ಜುಲೈ ತಿಂಗೊಲು ಅಕೇರಿಗ್ ಶೂಟಿಂಗ್ ಸ್ಟಾರ್ಟ್ ಮಂತೊಂದುಂಡು.
ಸೆಪ್ಟೆಂಬರ್ ಡ್ ಶೂಟಿಂಗ್ ಅಗಪಾದ್ ನವೆಂಬರ್-ಡಿಸೆಂಬರ್‌ಡ್ ತುಳು, ಕನ್ನಡ, ತಮಿಳು, ಮಲಯಾಳಂ, ಮರಾಠಿ, ತೆಲುಗು, ಹಿಂದಿ ಇಂಚ 7 ಭಾಷೆಲೆಡ್ ಬುಡುಗಡೆ ಮನ್ಪರೆ “ಮಾಂಕಾಲ” ಚಿತ್ರತಂಡದಕುಲು ಪಿದಡ್ದೆರ್.