Last updated on June 3rd, 2025 at 07:04 am
ಕುಡ್ಲ, ಜೂನ್ 03: ಕುಡ್ಲ ಜಿಲ್ಲೆಗ್ ಪೊಸತಾದ್ ಅಧಿಕಾರ ಗೆತೊಂದಿನ ಎಸ್ಪಿ ಬೊಕ್ಕ ಕುಡ್ಲ ಪೊಲೀಸ್ ಕಮಿಷನರ್ ಇತ್ತೆ ಜಿಲ್ಲೆಡ್ ಇಪ್ಪುನ ಅಪರಾಧ ಕೃತ್ಯ ಸೇರ್ದ್ ಬೇತೆ ಬೇತೆ ಸಂಘಟನೆಲೆಡ್ ಇಪ್ಪುನಕ್ಲೆನ ಪಟ್ಟಿ ಮಲ್ತ್ದ್ ಅಕಲೆನ್ ಗಡಿಪಾರ್ ಮಲ್ಪೆರೆ ಆಟ್ಟನೆ ಮಲ್ದೆರ್. ಇತ್ತೆ ಪೊಲೀಸೆರ್ ಬುಡುಗಡೆ ಮಲ್ದಿನ ಲಿಸ್ಟ್ ಇಡೀ ಜಿಲ್ಲೆಡ್ ಸುದ್ದಿ ಆತ್ಂಡ್.
ಪೊಸತಾಜ್ ಅಧಿಕಾರ ಗೆತೊಂದಿನ ಬೆರಿಟೇ ಇರ್ವೆರ್ ಐಪಿಎಸ್ ಅಧಿಕಾರಿಲು, ಜಿಲ್ಲೆದ ಕಾನೂನು ಸುವ್ಯವಸ್ಥೆನ್ ಸಮತಾದಿಗ್ ಕನಯೆರ ಪುನೆಯೊಂದುಲ್ಲೆರ್. ಜಿಲ್ಲೆಡ್ ಬೇತೆ ಬೇತೆ ಸಂಘಟನೆಲೆಡ್ ಇಪ್ಪುನ 36 ಜನೊತ ಪಟ್ಟಿನ್ ಪೋಲಿಸೆರ್ ರೆಡಿ ಮಲ್ತ್ದ್ ಅವೆನ್ ಮಾಧ್ಯಮೊಲೆಗ್ ಬುಡುಗಡೆ ಮಲ್ತ್ದೆರ್. ರೌಡಿ ಪಿರನಿಲೆ ಇತ್ತಿನಕುಲು, ಸೌಜನ್ಯಾ ಪರ ಪೊರ್ಮ್ಬಾಟಗಾರೆ ಮಹೇಶ್ ಶೆಟ್ಟಿ ತಿಮರೋಡಿ, ಹಿಂದುತ್ವ ಪೊರ್ಮ್ಬಾಟಗಾರೆ ಅರುಣ್ ಪುತ್ತಿಲ ಸೇರ್ದ್ ಬಂಟ್ವಾಳ, ಪುತ್ತೂರು ಸೀಮೆದ 36 ಜನೊನು ಜಿಲ್ಲೆರ್ ಗಡೀಪಾರ್ ಮಲ್ಪೆರ ಪಿದಡ್ದೆರ್.
ಬಂಟ್ವಾಳ ನಗರ, ಬಂಟ್ವಾಳ ಗ್ರಾಮಾಂತರ, ಬೊಲ್ತೇರ್, ಪುತ್ತೂರು ನಗರ, ಪುತ್ತೂರು ಗ್ರಾಮಾಂತರ, ಸುಳ್ಯ ಬೆಳ್ಳಾರೆ ವಿಟ್ಲ ಸ್ಟೇಶನ್ ಸೀಮೆದ ಪರ ಪ್ರಕರಣೊಲೆಡ್ ಇಪ್ಪುನ ಹಿಂದು ಬೊಕ್ಕ ಮುಸ್ಲಿಂ ಸಂಘಟನೆ ಕಾರ್ಯಕರ್ತೆರ್, ಬಿಜೆಪಿಡ್ ಇತ್ತಿನಕ್ಲೆನ ಪಟ್ಟಿ ರೆಡಿ ಮಲ್ತಿತ್ತ್ದ್ ಗಡಿಪಾರ್ ಮಲ್ಪೆರೆ ಕಾನೂನು ಪ್ರಕ್ರಿಯೆ ಸುರು ಆತ್ಂಡ್. ಈ 36 ಜನೊತ ಪಟ್ಟಿಡ್, 15 ಮುಸ್ಲಿಮೆರ್ ಉಲ್ಲೆರ್.
ವಿಶ್ವ ಹಿಂದೂ ಪರಿಷತ್ ಮುಖಂಡೆ ಭರತ್ ಕುಮ್ಡೇಲು, ಹಿಂದೂ ಮುಖಂಡೆ ಅರುಣ್ ಕುಮಾರ್ ಪುತ್ತಿಲ ಸೇರ್ದ್ ಪಾಕ ಜನತ ಪುದರ್ ಈ ಪಟ್ಟಿಡ್ ಉಂಡು. ಗಡಿಪಾರ್ಗ್ ಪೋಲೀಸೆರ್ ಮರಲ್ದಿನ ಪಟ್ಟಿನ್ ಪೋಲೀಸ್ ವರಿಷ್ಠಾಧಿಕಾರಿ ಡಾ.ಅರುಣ್ ಬುಡುಗಡೆ ಮಲ್ದೆರ್. ಸಹಾಯಕ ಆಯುಕ್ತೆರೆ ಮುಕೆನ ಪಟ್ಟಿಡ್ ಇಪ್ಪುನ ಮಾತೆರೆಗ್ಲಾ ನೋಟೀಸ್ ಕೊರ್ತೆರ್.