Last updated on June 3rd, 2025 at 09:04 am
ಕುಡ್ಲ, ಜೂ. 2: ಪ್ರಚೋದನಕಾರಿ ಭಾಷಣ ವಿಚಾರೊಡು ಆರ್.ಎಸ್.ಎಸ್ ಮುಖಂಡೆ ಕಲ್ಲಡ್ಕ ಪ್ರಭಾಕರ್ ಭಟ್ರೆನ ಮಿತ್ತ್ ಪೋಲಿಸ್ ಇಲಾಖೆ ಎಫ್ಐಆರ್ ದಾಕಲ್ತೊಂದು ನನದ ಕಾರ್ಯಾಚರಣೆಗ್ ಮೆಲ್ಲ ಅಟ್ಟನೆ ಮಲ್ತೊಂದಿತ್ತಿಲೆಕನೆ ಈಮೆಯಿಟೆ ಸಂಘಟನೆ ಈ ಬಗೆಟ್ ಹೈಕೋರ್ಟ್ಗ್ ಅಪೀಲ್ ಸಂದಾಯಿನೆರ್ದಾವರ ಕಲ್ಲಡ್ಕ ಪ್ರಭಾಕರ್ ಭಟ್ರೆಗ್ ಹೈಕೋರ್ಟ್ರ್ದ್ ಮಲ್ಲ ರಿಲೀಫ್ ತಿಕ್ಕ್ದ್ಂಡ್ ಪನ್ದ್ ತೆರಿದ್ ಬೈದ್ಂಡ್. ಅಂಚೆನೇ ಮುರಾನಿ ಬಜ್ಪೆಡ್ ನಡತಿನ ಬಜ್ಪೆ ಚಲೋ ಕಾರ್ಯಕ್ರಮೊಡು ಪ್ರಚೋದನಕಾರಿ ಭಾಷಣ ಮಲ್ದೆರ್ ಪನ್ಪಿ ಆರೋಪಡ್ ಎಫ್ಐಆರ್ ದಾಕಲಾದ್ ಕೈದಾಪಿನ ಅಂದಾಜಿಡ್ ಇತ್ತಿನ ಶ್ರೀಕಾಂತ್ ಶೆಟ್ರೆಗ್ಲಾ ಹೈಕೋರ್ಟ್ರ್ದ್ ಮಲ್ಲ ರಿಲೀಫ್ ತಿಕ್ಕ್ದ್ಂಡ್ ಪನ್ದ್ ತೆರಿದ್ ಬೈದ್ಂಡ್.
ಕಲ್ಲಡ್ಕ ಪ್ರಭಾಕರ ಭಟ್ ಬೊಕ್ಕ ವಾಗ್ಮಿ ಶ್ರೀಕಾಂತ್ ಶೆಟ್ರೆನ ಪರವಾದ್ ಹೈಕೋರ್ಟ್ ಡ್ ವಾದ ಮಂಡನೆ ಮಲ್ತಿನ ಪೆರಿಯ ವಕೀಲೆ ಅರುಣ್ ಶಾಮ್ ಮೇರ್ ಕಲ್ಲಡ್ಕ ಪ್ರಭಾಕರ್ ಭಟ್ ಬೊಕ್ಕ ಶ್ರೀಕಾಂತ್ ಶೆಟ್ಟಿ ನ ಮಿತ್ತ್ ಪಾಡ್ದಿನ ಕೇಸ್ಲೆನ ಬಗೆಟ್ ಮಲ್ತಿ ವಾದೊನು ಕೇಂಡಿನ ನ್ಯಾಯವಾದಿ ಕೃಷ್ಣ ಕುಮಾರ್ ಮೆರೆನ ನ್ಯಾಯಪೀಠ ಇರ್ವೆರೆ ಪ್ರಕರಣೊಗ್ಲಾ ನನದ ವಿಚಾರಣೆ ಆಪಿನೇಟ ಪೊಲೀಸ್ ಇಲಾಖೆ ಮೊಕುಲಿರ್ವೆರೆನ್ ಅರೆಸ್ಟ್ ಮಲ್ಪಿನಾವಡ್, ಒವ್ವೇ ಒತ್ತಡ ಅಂಚೆನೇ ಬಲವಂತೊದ ಕ್ರಮ ಗೆತೊನರೆ ಬಲ್ಲಿ ಪನ್ದ್ ಆದೇಶ ಕೊರ್ದು ಜೂನ್ 10ತ ಅಂಗಾರೆಗ್ ವಿಚಾರಣೆನ್ ದುಂಬು ಪಾಡ್ದ್ಂಡ್ ಪನ್ದ್ ತೆರಿದ್ ಬೈದ್ಂಡ್.