Last updated on September 27th, 2024 at 07:53 pm
ಕುಡ್ಲ:ತೋಟ ಬೆಂಗ್ರೆ ಪ್ರದೇಶೊಡು ಕರಿನ ವಾರ 21ತಾನಿ ನಡತಿತ್ತಿನ ಮೇಸ್ತ್ರಿ ಬಸವರಾಜ ವಡ್ಡರ್ ಅಲಿಯಾಸ್ ಮುದುಕಪ್ಪ ಪನ್ಪಿನಾರೆನ್ ಕೆರ್ತಿನ ಪ್ರಕರಣೊದ ಪ್ರಮುಖ ಆರೋಪಿನ್ ಪೊಲೀಸೆರ್ ಕೈದ್ ಮಲ್ದೆರ್. ಮೊಬೈಲ್ ಪಿರ ಕೊರಂದಿನೆಕ್ ಮೇಸ್ತ್ರಿ ಬಸವರಾಜ ವಡ್ಡರ್ ಅಲಿಯಾಸ್ ಮುದುಕಪ್ಪ ಪನ್ಪಿನಾರೆನ್ ಕೆರ್ತೆರ್ ಪಂದ್ ಜಡ್ತೆಡ್ ತೆರಿದ್ ಬೈದ್ಂಡ್ ಪಂದ್ ಪೊಲೀಸೆರ್ ತೆರಿಪಾದೆರ್.
ಕೈದಾತಿನ ಆರೋಪಿ ತೋಟ ಬೆಂಗ್ರೆ ನಿವಾಸಿ ಧರ್ಮರಾಜ್ ಸುವರ್ಣ ಪಂದ್ ಗುರ್ತ ಪತ್ತಿತ್ತ್‌ದ್, ಕೇರಳದ ಕೊಳಿಕ್ಕೋಡ್‌ ಜಿಲ್ಲೆದ ಚೊಂಪಾಳ ಸ್ಟೇಶನ್‌ದ ಸೀಮೆಡ್ ಕೈದ್ ಮಲ್ದೆರ್. ಆರೋಪಿ ತೋಟ ಬೆಂಗ್ರೆಡ್ ಮೀನ್ ಪತ್ತುನ ಬೇಲೆ ಮಲ್ತೊಂದಿತ್ತೆ ಪಂದ್ ನಗರ ಪೊಲೀಸ್ ಕಮಿಷನರ್‌ ಅನುಪಮ್‌ ಅಗರ್ವಾಲ್‌ ತೆರಿಪಾದೆರ್.
ಆರೋಪಿ ಧರ್ಮರಾಜ್ ಸುವರ್ಣ ಬೊಊ ಕೊಲೆಯಾತಿನ ಬಸವರಾಜ್ ವಡ್ಡರ್ ಒರ್ಯಗೊರಿ ಗುರ್ತ ಇತ್ತಿನಕುಲು. ಧರ್ಮರಾಜ್ ಇಂಚಿಪೊಗು ಪೊಸ ಮೊಬೈಲ್ ದೆತೊಂದಿತ್ತೆರ್. ಅವೆನ್ ಬಸವರಾಜ್ ಪತೊಂದು ಪೋದಿತ್ತೆರ್. ಮೊಬೈಲ್‌ನ್ ಪಿರ ಕೊರಂದಿನೆಕ್ ಪಿಸ್‌ರ್‌ಡ್ ಧರ್ಮರಾಜ್ ಸೋಂಟೆಡ್ ತರೆಕ್ ಆಕ್‌ದ್ ಬಸವರಾಜ್‌‌ನ್ ಕೆರ್ತೆ’ ಪಂದ್ ಆರ್ ಒಲವು ಕೊರ್ತೆರ್.
ಬಸವರಾಜ ವಡ್ಡರ್‌‌ನ್ ಕೆರ್ತಿನ ಬಗೆಟ್ ಸಂಬಂಧಿಕೆ ಹನುಮಂತ ದುರುಗಪ್ಪ ವಡ್ಡರ್ ಒಯಿಲ್ ಬರೆಪಾದಿತ್ತ್‌ದ್ ಪಣಂಬೂರ್ ಸ್ಟೇಷನ್‌ಡ್ ಪ್ರಕರಣ ದಾಕಲಾದಿತ್ತ್ಂಡ್. ನಗರ ಉತ್ತರ ವಿಭಾಗೊದ ಸಹಾಯಕ ಪೊಲೀಸ್ ಆಯುಕ್ತೆ ಶ್ರೀಕಾಂತ.ಕೆ. ಮೆರೆನ ಮಾರ್ಗದರ್ಶನೊಡು ಪಣಂಬೂರು ಸ್ಟೇಶನ್‌ದ ಇನ್‌ಸ್ಪೆಕ್ಟರ್‌ ಮೊಹಮ್ಮದ್ ಸಲೀಂ ಅಬ್ಬಾಸ್ ಮುತಾಲಿಕೆಡ್ ಆರೋಪಿನ್ ಕೈದ್ ಮಲ್ದೆರ್. ಸ್ಟೇಷನ್‌ದ ಕಾನೂನು ಸುವ್ಯವಸ್ಥೆ ವಿಭಾಗೊದ ಎಸ್.ಐ ಶ್ರೀಕಲಾ ಕೆ.ಟಿ, ಜ್ಞಾನಶೇಖರ ಬೊಕ್ಕ ಎ.ಎಸ್.ಐ.ನಕುಲು ಕೃಷ್ಣ, ಬಿ.ಕೆ. ನಯನಾ ಬೊಕ್ಕ ಹೆಡ್‌ ಕಾನ್‌ಸ್ಟೆಬಲ್‌ ಸತೀಶ್ ಎಂ. ಆರ್, ಸಯ್ಯದ್ ಇಮ್ತಿಯಾಜ್, ಪ್ರೇಮಾನಂದ, ನವೀನ್ ಚಂದ್ರ. ಜೇಮ್ಸ್ ಪಿ.ಜೆ., ಕಾನ್‌ಸ್ಟೆಬಲ್‌ನಕುಲಾಯಿನ ಶಶಿಕುಮಾರ್, ರಾಕೇಶ್, ಮಾಣಿಕ್, ಸೋಮ್ಲಾ ನಾಯ್ಕ ಬೊಕ್ಕ ಡ್ರೈವರ್ ಅಂಬಣ್ಣ ಮೊಕುಲು ಆರೋಪಿನ್ ಪತ್ತುನ ಬೇಲೆಡ್ ಕೈಗೋಡ್ಯಾದಿತ್ತೆರ್.