Last updated on September 29th, 2024 at 06:43 pm
ಪಡ್ಡೆದ್ರ: ಅಜ್ಜಿನ ಇಲ್ಲಗ್ ಪೋಪೆ ಪಂದ್ ಪಿದಡ್ದ್ ನಾಪತ್ತೆಯಾದಿತ್ತಿನ ಪೊಂಜೊವು ಒರ್ತಿ ಇತ್ತೆ ಸುಮಾರು 10 ವರ್ಸ ಕರಿದ್ ಬೆಂಗಳೂರ್‌ಡ್ ತಿಕ್ಕ್‌ದೆರ್.
ಪಲಿಮಾರ್‌ಡ್ ಇತ್ತಿನ ಶ್ರುತಿ ಶೆಟ್ಟಿ ಮೇರ್ ತನ್ನ ಅಜ್ಜಿನ ಇಲ್ಲಗ್ ಪೋತಿನಾರ್ ನಾಪತ್ತೆಯಾತೆರ್ ಪಂದ್ ಆರೆನ ಕಂಡನಿ ಶಂಕರ ಶೆಟ್ಟಿ ಮೇರ್ 2014ಟ್ ಪಡ್ಡೆದ್ರ ಸ್ಟೇಷನ್‌ಡ್ ಒಯಿಲ್ ಬರೆಪಾದಿತ್ತೆರ್. 2016ಟ್ ಮೂಡ್ಯೆ ಸೇರ್ನ ಪ್ರಕರಣೊನು ಪಡ್ಡೆದ್ರ ಸ್ಟೇಶನ್ ಎಎಸ್‌ಐ ರಾಜೇಶ್ ಬೊಕ್ಕ ಹೆಡ್‌ಕಾನ್‌ಸ್ಟೆಬಲ್ ದೇವರಾಜ್ ಇತ್ತೆ ಸದು ನಾಡ್ದ್ ಪತ್ತ್‌ದೆರ್.
ಪೊಂಜೊವು ಬೆಂಗಳೂರ್‌ಡ್ ಇಪ್ಪುನೆತ ಬಗೆಟ್ ಒಲವು ಒಟ್ಟು ಮಲ್ತ್‌ದ್ ಅಲ್ಪದ ವರ್ತೂರು ಪೊಲೀಸ್ ಸ್ಟೇಶನ್‌ದ ಸಿಬ್ಬಂದಿಲೆನ ಸಕಾಯೊಡು ಶ್ರುತಿ ಶೆಟ್ಟಿ ಮೆರೆನ್ ಪಡ್ಡೆದ್ರ ಪೊಲೀಸೆರ್ ನಾಡ್ದ್ ಪತ್ತ್‌ದೆರ್. ಬೆಂಗಳೂರ್‌ರ್ದ್ ಪಿರ ಬತ್ತಿನ ಪೊಲೀಸೆರ್ ಕಂಡನೆ ಶಂಕರ್ ಶೆಟ್ಟಿ ಮೆರೆನ್ ಲೆತ್ತ್‌ದ್ ಶ್ರುತಿ ಶೆಟ್ಟಿನ ಫೋಟೋ ತೋಜಾದೆರ್. ಈ ಪೊರ್ತುಡು ಶಂಕರ ಶೆಟ್ಟಿ ಆ ಪೊಂಜೊವು 10 ವರ್ಸೊಗು ದುಂಬು ತೋಜಂದೆ ಆದಿತ್ತಿನ ತನ್ನ ಬೊಡೆದಿ ಪಂದ್ ಗುರ್ತ ಪತ್ತ್‌ದೆರ್.ಶ್ರುತಿ ಶೆಟ್ಟಿ ಬೆಂಗಳೂರ್‌ಡೇ ಇಪ್ಪುವೆ ಪಂಡ್‌ದ್ ಪಂದಿತ್ತ್‌ದ್, ಉಂದೆಕಾ ಶಂಕರ ಶೆಟ್ಟಿಲಾ ಒತ್ತೊಂದಿನೆರ್ದಾವರ, ಇರ್ವೆರೆ ಪಾತೆರೊಲೆನ್ ದಾಕಲ್ತೊಂದು ಪ್ರಕರಣೊಗು ಮುಗಿತಲದ ಚುಕ್ಕಿ ದೀತೆರ್.