Last updated on October 26th, 2024 at 05:07 pm
ಚಂಙಾಯಿದಾಯನೊಟ್ಟುಗು ಸೇರ್ದ್ ಕಂಡನಗ್ ವಿಷ ಪಾಡ್ದ್ ಕಡೆಕ್ ದಮ್ಮು ಕಟ್ಟಾದ್ ಕೆರ್ತಿನ ಆರೋಪೊಡು ಪೊಂಜೊವು ಅಂಚೆನೆ ಅಲೆನ ಚಂಙಾಯಿನ್ ಪೋಲೀಸೆರ್ ಪತ್ತಿಯೆರ್.
ಕಾರ್ಲ ತಾಲೂಕುದ ಮರ್ಣೆ ಗ್ರಾಮದ ಅಜೆಕಾರ್ ದೆಪ್ಪುತ್ತೆದ ಬಾಲಕೃಷ್ಣ ಪೂಜಾರಿ(44) ತೀರಿನಾರ್. ಅರೆನ ಬೊಡೆದಿ ಪ್ರತಿಮಾ ಅಂಚೆನೆ ಅಲೆನ ಚಂಙಾಯಿ ದಿಲೀಪ್ ಹೆಗ್ಡೆನ್ ಪೋಲೀಸೆರ್ ಇತ್ತೆ ವಶೊಕು ದೆತೊನ್ದೆರ್.
ಪ್ರತಿಮಾ ಮೆರೆಗ್ ಸಾಮಾಜಿಕ ಮಾಧ್ಯಮೊಡು ದಿಲೀಪ್ ಪನ್ಪಿನಾಯನ ಗುರ್ತ ಆದ್ ಮೋಕೆ ಪುಟ್ಟುದಿತ್ತ್ಂಡ್. ರಡ್ಡ್ ತಿಂಗೊಲ್ದ ದುಂಬು ಪ್ರತಿಮಾ ಬೊಕ್ಕ ದಿಲೀಪ್ ಮೊಕಲೆನ ಪ್ರೀತಿದ ಬಗೆಟ್ ಬಾಲಕೃಷ್ಣೆರ್ ಅಜೆಕಾರ್ ಪೋಲೀಸೆರೆಗ್ ಒಲವು ಕೊರ್ದಿತ್ತೆರ್, ಅವೆತಂಚೆನೆ ದಿಲೀಪ್ ಬೊಕ್ಕ ಪ್ರತಿಮಾ ಮೊಕಲೆನ್ ಪೋಲೀಸೆರ್ ಲೆತ್ತ್ ವಿಚಾರಣೆ ಮಲ್ತ್ ಮುಚ್ಚಲಿಕೆ ಬರೆಪಾದಿತ್ತೆರ್.
ಬಾಲಕೃಷ್ಣ ಪೂಜಾರಿಗ್ 25 ದಿನೊರ್ದಿಂಚಿ ಜ್ವರ ಬೊಕ್ಕ ಕಕ್ಕುನ ತೊಡಂಗ್ದಿತ್ತ್ಂಡ್. ಅರೆನ್ ಕಾರ್ಲದ ಆಸ್ಪತ್ರೆಗ್ ಕೊನೊನಗ ಅಲ್ಪದ ಡಾಕ್ಟರ್ ನಕುಲು ಅರೆಗ್ ಜಾಂಡೀಸ್ ಆತ್ಂಡ್ ಪನ್ದ್ ಪನ್ದಿತ್ತೆರ್. ತಾಪುರ್ತೋಪ್ ಅರೆಗ್ ಮಣಿಪಾಲಡ್, ವೆನ್ಲಾಕ್ ಡ್, ಬೆಂಗಳೂರುದ ನಿಮ್ಹಾನ್ಸ್ ಅಂಚೆನೆ ವಿಕ್ಟೋರಿಯಾ ಆಸ್ಪತ್ರೆಡ್ ಮರ್ದ್ ಮಲ್ತೆರ್. ಮರ್ದ್ ಪಲಿಪಂದಿನೆರ್ದಾವರ ಅರೆನ್ ಅಕ್ಟೋಬರ್ 19ಗು ಇಲ್ಲಗ್ ಪಿರ ಕನತೆರ್. 20ದಾನಿ ಪುಲ್ಯಕಾಂಡೆ ಬಾಲಕೃಷ್ಣೆರ್ ತೀರಿಯೆರ್.
ಬಾಲಕೃಷ್ಣೆರ್ ಒರಾನೆ ಉಸಾರ್ ತತ್ತಿನ ಅಂಚೆನೆ ತೀರಿನ ಬಗೆಟ್ ದಾದನಾ ಸಂಶಯ ಬತ್ತ್ ಪ್ರತಿಮಾ ಮೆರೆನ ಪಲಯೆ ಸಂದೀಪ್ ಒಕ್ಕುದು ಒಕ್ಕುದು ಕೇನ್ನಗ ಸತ್ಯ ಪಿದಯಿ ಬೈದ್ಂಡ್ ಪನ್ದ್ ಪೋಲೀಸೆರ್ ತೆರಿಪಾದೆರ್.
ಪ್ರತಿಮಾ ಬೊಕ್ಕ ದಿಲೀಪ್ ತನ್ಕುಲೆನ ಚಂಙಾಯಿಗ್ ಅಡ್ಡಿ ಆದಿತ್ತಿನ ಬಾಲಕೃಷ್ಣೆರೆನ್ ಮುಗಿಪರೆ ಗೆರೆದಿತ್ತೆರ್. ಪ್ರತಿಮಾ ಪನ್ತಿಲೆಕ್ಕ ದಿಲೀಪ್ ಒವ್ವಾ ವಿಷ ಕನತ್ ಕೊರ್ದು ಅವೆನ್ ಬಾಲಕೃಷ್ಣ ಅರೆಗ್ ಒನಸ್ ಗ್ ಬಿರಾದ್ ಕೊರ್ರೆ ಪನ್ದಿತ್ತೆರ್. ಅವೆರ್ದ್ ಬೊಕ್ಕ ಬಾಲಕೃಷ್ಣೆರೆಗ್ ಉಸಾರ್ ತತ್ತಿತ್ತ್ಂಡ್. ಅಕ್ಟೋಬರ್ 20 ದಾನಿ ದಿಲೀಪ್ ಬೊಕ್ಕ ಪ್ರತಿಮಾ ಸೇರ್ದ್ ಬಾಲಕೃಷ್ಣೆರೆನ ಮೋನೆಗ್ ಬೆಡ್ ಶೀಟ್ ಊಂದುದು ದಂಬುಕಟ್ಟಾದ್ ಕೆರ್ತೆರ್. ಅಕುಲು ಉಂದೆನ್ ಒತ್ತೊಂದೆರ್ ಪನ್ದ್ ಪೋಲೀಸೆರ್ ತೆರಿಪಾದೆರ್.
ಕೋವಿಡ್ ದ ಪೊರ್ತುಗು ಮುಂಬೈರ್ದ್ ಊರುಗು ಶಿಫ್ಟ್ ಆದಿತ್ತಿನ ಬಾಲಕೃಷ್ಣ ದಂಪತಿಲು ನಿಟ್ಟೆಡ್ ಕ್ಯಾಂಟೀನ್ ನಡಪಾವೊಂದಿತ್ತೆರ್. ಬಾಡಯಿದ ಇಲ್ಲಡ್ ಇತ್ತಿನ ಈ ಕುಟುಮ ಕರಿನ ವರ್ಸ ನವೆಂಬರ್ 1ಕ್ಕ್ ಪೊಸ ಇಲ್ಲ್ ಕಟ್ಟಾದಿತ್ತೆರ್.