Last updated on November 6th, 2024 at 03:24 pm
ಬೆಂಗಳೂರು: ಬೆಂಗಳೂರ್‌ ಕಂಬುಲಗ್ ಇದಮುಟ್ಟ ದಿನ ನಿಗಂಟ್ ಆತಿಜಿ. ಆಂಡ ಪಿಲಿಕುಳಡ್ ನವೆಂಬರ್‌ 17ಕ್ ಕಂಬುವ ನಡಪುಂಡು ಪಂದ್ ಸರಕಾರ ಹೈಕೋರ್ಟ್‌ಗ್ ಒಲವು ಕೊರ್ತುಂಡು.
ಬೆಂಗಳೂರು ಕಂಬುವ ಸಮಿತಿಗ್ ಕಂಬುಲ ನಡಪಾಯೆರ ಅನುವು ಕೊರಂದಿಲೆಕ ರಾಜ್ಯ ಸರಕಾರೊಗು ನಿರ್ದೇಶನ ಕೊರೊಡು ಪಂದ್ ಕೇಂದ್ ಪೀಪಲ್‌ ಫಾರ್‌ ದಿ ಎಥಿಕಲ್‌ ಟ್ರೀಟ್‌ಮೆಂಟ್‌ ಆಫ್ ಅನಿಮಲ್‌ (ಪೆಟಾ) ಸ್ವಯಂ ಸೇವಾ ಸಂಸ್ಥೆ ಸಂದಾದಿನ ಸಾರ್ವಜನಿಕ ಹಿತಾಸಕ್ತಿ ಅರ್ಜಿನ್ ಮುಖ್ಯ ನ್ಯಾಯಮೂರ್ತಿ ಎನ್‌.ವಿ. ಅಂಜಾರಿಯಾ ಬೊಕ್ಕ ನ್ಯಾ| ಕೆ.ವಿ. ಅರವಿಂದ್‌ ಮೊಕುಲು ಇತ್ತಿನ ವಿಭಾಗೀಯ ನ್ಯಾಯಪೀಠ ಅಕಗಾರೆ ವಿಚಾರಣೆ ಮಲ್ತ್ಂಡ್.
ಬೆಂಗಳೂರು ಕಂಬುಲ ಸಮಿತಿದ ಪರ ವಕೀಲೆ ಎಂ. ವಿನೋದ್‌ ಕುಮಾರ್‌ ವಾದ ಮಲ್ತ್‌ದ್ ಅರ್ಜಿಗ್ ಸಂಬಂಧಿತಿನ ತನ್ಕುಲೆ ಆಕ್ಷೇಪಣೆಲೆನ್ ನ್ಯಾಯಂತಡೆಕ್ ಸಂದಾದ್ಂಡ್ ಪಂದ್ ನ್ಯಾಯಪೀಠೊಗು ಒಲವು ಕೊರ್ಯೆರ್. ಅಡ್ವೋಕೇಟ್‌ ಜನರಲ್‌ ಕೆ. ಶಶಿಕಿರಣ್‌ ಶೆಟ್ಟಿ ವಾದ ಮಂಡನೆ ಮಲ್ತ್‌ದ್, ಬೆಂಗಳೂರ್‌ಡ್ ಕಂಬುಲ ಮನ್ಪೆರ ಇದಮುಟ್ಟ ದಿನ ನಿಗಂಟ್ ಆತಿಜಿ. ಆಂಡ ಕುಡ್ಲ ಜಿಲ್ಲೆದ ಪಿಲಿಕುಳಡ್ ಈ ತಿಂಗೊಲು 17ಕ್ ಕಂಬುಲ ನಡಪುಂಡು ಪಂದ್ ನ್ಯಾಯಂತಡೆಕ್ ತೆರಿಪಾಯೆರ್.
ಆಂಡ ಅರ್ಜಿದಾರೆರೆ ಪರ ಪೆರಿಯ ವಕೀಲೆ ಧ್ಯಾನ್‌ ಚಿನ್ನಪ್ಪ, ಎಂಕ್ಲೆಗ್ ದ.ಕ. ಜಿಲ್ಲೆಡ್ ಅತ್ತ್ಂಡ ಪಿಲಿಕುಳಡ್ ಕಂಬುಲ ಮನ್ಪೆರ ಆಕ್ಷೇಪ ಇಜ್ಜಿ. ಆಂಡ ಪಿಲಿಕುಳಡ್ ಮೃಗಾಲಯೊದ ಬರಿಟ್ ಕಂಬುಲ ಅಟ್ಟನೆ ಆತ್ಂಡ್. ಅ್ಂದೆಕ್ ಎಂಕ್ಲೆನ ಆಕ್ಷೇಪ ಉಂಡು. ಆತೇ ಅತ್ತಂದೆ, ಸ್ವತಃ ಮೃಗಾಲಯೊದ ನಿರ್ದೇಶಕೆರ್ ಜಿಲ್ಲಾಧಿಕಾರಿಲೆಗ್ ಓಲೆ ಬರೆದ್ ಕಂಬುಲೊದ ಪೊರ್ತುಡು ಉಂಡಾಪಿವ ಕಲ್ಕಾಟೊಲೆರ್ದ್ ಬೇತೆ ಪ್ರಾಣಿಲೆಗ್ ಕರಕರಿ ಆಪುಂಡು ಪಂದ್ ಪನ್ತೆರ್. ಎಂಕ್ಲೆನಲಾ ಅವ್ವೇ ವಾದ ಪಂದ್ ಪನ್ಡೆರ್.