Last updated on November 26th, 2024 at 02:41 pm
ಹಾಸನ: ಮದಿಮೆ ಆಪುಜಿ ಪಂಡಿನೆಕ್ ಮೋಕೆ ಮಲ್ತಿನ ಪೊಣ್ಣಗೇ ಬೀಸತ್ತಿ ಪಾಡ್ದಿನ ನಡಕೆ ಹಾಸನದ ಆಲೂರುಡು ನಡತ್‌ದ್ಂಡ್.
ಆಲೂರು‌ದ ಕಾರಗೋಡು ಗ್ರಾಮೊದ ಮೋಹಿತ್ ಬೊಕ್ಕ ಅವ್ವೇ ಗ್ರಾಮೊದ ಜವನ್ದಿ ಒರ್ತಿ ಒರಿಯನೊರಿ ರಡ್ಡ್ ವರ್ಸೊರ್ದಿಂಚಿ ಮೋಕೆ ಮಲ್ತೊಂದಿತ್ತೆರ್. ಕೆಲ ದಿನೊರ್ದಿಂಚಿ ಪೊಣ್ಣು ಮೋಹಿತ್‌ರ್ದ್ ದೂರ ಆದಿತ್ತಲ್. ಆಂಡಲಾ ಆಲೆಡ ಮದಿಮೆ ಆಲ ಮದಿಮೆ ಆಲ ಪನ್ದ್ ಜವನೆ ಬೆರಿ ಬೂರ್ದಿತ್ತೆ ಪನ್ದ್ ತೆರಿದ್ ಬೈದ್ಂಡ್.
ಜವನನ ಕರಕರಿರ್ದ್ ಬಚ್ಚಿದ್ ಪೋಯಿನ ಜವನ್ದಿ, ಈ ಬಗೆಟ್ ಇಲ್ಲದಕುಲೆಗ್ ಒಲವು ಕೊರ್ತಲ್. ಬೊಕ್ಕ ರಡ್ಡ್ ಕುಟುಮೊದಕುಲ್ಲಾ ರಾಜಿಗ್ ದುಂಬಾದಿತ್ತೆರ್. ಈ ಬಗೆಟ್ ರಡ್ಡ್ ಪಾಲ್‌ದಕುಲ್ಲಾ ಒರ್ಯನ ಉಪದ್ರೊಗು ಕುಡೊರಿ ಬರಂದಿಲೆಕ ಪಂಚಾದಿಗೆ ಮಲ್ದಿತ್ತೆರ್. ಬೊಕ್ಕ ಗ್ರಾಮಸ್ಥೆರೆ ಒಟ್ಟುಗು ಬತ್ತ್‌ದ್ ನೋಟರಿ ಮನ್ಪೆರೆ ರಡ್ಡ್ ಪಾಲ್‌ದಕುಲ್ಲಾ ಬತ್ತಿತ್ತೆರ್. ಈ ಪೊರ್ತುಡು ಕುಡ್ಚೊಂದು ಬತ್ತಿನ ಜವನೆ ಒರರ್ದ್ಒರನೆ ಪೊಣ್ಣನ ಮಿತ್ತ್ ಮಾರಕಾಸ್ತ್ರೊಲೆಡ್ ದಾಳಿ ಮಲ್ತ್‌ದ್ ಪದ್ರಾಡಾತೆ.
ದಾಳಿರ್ದ್ ಪೊಣ್ಣನ ತರೆ ಅಂಚೆನೇ ಕೈಕ್ಲೆಗ್ ಗಾತಿದ ಗಡಿಕುಲಾತ. ಆಲೆಗ್ ಹಾಸನದ ಖಾಸಗಿ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು. ಜಾಗೆಗ್ ಆಲೂರು ಪೊಲೀಸೆರ್ ಬತ್ತ್‌ದ್ ಪರಿಶೀಲನೆ ಮಲ್ದೆರ್.