Last updated on November 11th, 2024 at 05:17 pm
ಕುಕ್ಕೆ : ರಾಜ್ಯೊಗು ಮಲ್ಲ ಆದಾಯ ಕೊರ್ಪುನ ದೇಲಂತಡೆ ಕುಕ್ಕೆ ಸುಬ್ರಹ್ಮಣ್ಯೊಗು ಸಂಪರ್ಕ ಮನ್ಪುನ ಪ್ರಮುಖ ಪೆರ್ಸಾದಿ ( ಕುಮಾರಧಾರ- ಕೈಕಂಬ) ಡ್ ಮಾರಿಗುರಿಕುಲು ಉಂಡಾತ.
ಇತ್ತೆ ಪೊಸ ನಮೂನೆದ ಬ್ಯಾನರ್ ಒಂಜಿ ತೋಜಿದ್ ಬತ್ತಿತ್ತ್‌ದ್ ಆ ಮುಕೇನ ಕುಡ ಈ ಪೆರ್ಸಾದಿದ ಗುರಿಕುಲು ಸುದ್ದಿಯಾತ
“ಏರೋ ಮಾಂತ್ರಿಕೆರ್ ಕೈಕಂಬರ್ದ್ – ಕುಕ್ಕೆ ಸುಬ್ರಹ್ಮಣ್ಯ ಮುಟ್ಟದ ಸಾದಿಡ್ ಕೊಪ್ಪರಿಗೆ ಉಂಡು ಪನ್ದ್ ಪನ್ತಿನೆರ್ದಾವರ ಲಕ್ಕೊಂದಿನ ರಾಜ್ಯ ಸರ್ಕಾರ ಈ ಸಾದಿಡ್ ಕೊಪ್ಪರಿಗೆನ್ ನಾಡ್ಯೆದ ಅಲ್ಪಲ್ಪ ಸಾದಿದ ನಡುಟೇ ಮಲ್ಲ ಗುರಿಕ್ಲೆನಾ ತೋಡ್‌ದ್ ಅಂಚೆನೇ ಬುಡ್ತೆರ್ , ಮೆಲ್ಲ ಪೋಲೆ” ಪನ್ಪಿನ ಒಕ್ಕಣೆ ಬರೆದ್ ಸಾದಿದ ಬಗೆಟ್ ಅಧಿಕಾರಿಲೆನ ನಾಮಾಸ್ ಬೊಕ್ಕ ಪೋಪಿನಕ್ಲೆಗ್ ಎಚ್ಚರ್ಗೆದ ಸೊಲ್ಲಂಜೊನು ಬ್ಯಾನರ್‌ಡ್ ತೋಜಾದೆರ್.
ಕೈಕಂಬ ಮುಟ್ಟದ ಸಾದಿ ಬರಿಟ್ ಈ ಬ್ಯಾನರ್ ತೋಜಿದ್ ಬತ್ತಿತ್ತ್‌ದ್ ಮುಲ್ಪದಕುಲೇ ಆಕ್ರೋಶ ತೋಜಾದ್ ಪಾಡ್ದೆರ್ ಪನ್ದ್ ಪನೊಂದುಲ್ಲೆರ್. ಇಂಚಿಪ್ಪೊಗು ಮುಲ್ಪದ ಗಾಡಿ ಸವಾರೆರ್ ರೋಡ್‌ಡೇ ಟೇಪ್ ಪತೊಂದು ಅಲತ್‌ದ್ ಮಾತೆರ್ನ ಗೇನ ಇಂಚಿ ಕನಪುನ ಪುನೆಪು ಬತ್ತಿತ್ತೆರ್. ಕುಮಾರಧಾರ ಸಂಕದಲ್ಪ ಸುಮಾರ್ 12 ಫೀಟ್ ಅಗೆಲದ, ಮೂಜಿ ಫೀಟ್ ಗಂತ್‌ದ ಗುರಿ ತಿಕ್ಕ್‌ದ್ಂಡ್ ಪನ್ದ್ ಗುರಿಕ್ಲೆನ ಬಗೆಟ್ ಅಧಿಕಾರಿಲೆನ ಗುಮನೊಗು ಕನತಿತ್ತೆರ್. ಅ್ಂದೆರ್ದಾವರ ಲಕ್ಕೊಂಡಿನ ಅಧಿಕಾರಿಲು ಗುರಿಕ್ ಕ್ರಷರ್ ಜಲ್ಲಿ ಪಾಡ್ದ್ ಮುಚ್ಚಿದಿತ್ತೆರ್. ಇತ್ತೆ ಪಿರ ಗುಂಡಿಲು ಗಾಡಿಡ್ ಪೋಪಿನಕ್ಲೆಗ್ ಕರಕರಿ ಮಲ್ತೊಂದುಲ್ಲ.
ರಾಜ್ಯೊದ ಬೇತೆ ಬೇತೆ ಕೋಂಟುಲೆರ್ದ್ ಕುಕ್ಕೆ ಸುಬ್ರಹ್ಮಣ್ಯೊಗು ಬರ್ಪಿನ ಭಕ್ತೆರ್, ಸಾರ್ವಜನಿಕೆರ್ ಈ ಪೆರ್ಸಾದಿಡೇ ಪೋವೊಡು. ಎಂಚಿನ ಚಾತುರ್ಪುದ ಡ್ರೈವರ್ ಆಂಡಲಾ ಈ ಗುಂಡಿಲೆನ್ ತಪ್ಪಾಯೆರ ಆವಂದಿನಂಚಿನ ಪರಿಸ್ಥಿತಿ ಉಂಡಾತ್ಂಡ್. ಬೇತೆ ಬೇತೆ ಇಲಾಖೆಲೆನ ಅಧಿಕಾರಿಲುಲಾ ಅ್ಕದೇ ಸಾದಿಡೆ ಪೋವೊಂದಿತ್ತೆರ್ನ್ಡಲಾ ಈ ಗುಂಡಿಲೆನಂಚಿ ಗುಮನ ಕೊರಂದಿನ ಮಲ್ಲ ವಿಪರ್ಯಾಸ.
ಕಲುನಡಕೆಲು ನಡಪುನ ದುಂಬೇ ಅಧಿಕಾರಿಲು ಸಂಬಂಧಿತಿನ ಇಲಾಖೆದಕುಲು ಆಯಿನಾತ್ ಬೇಗ ಈ ಗುರಿಕ್ಲೆನ್ ಮುಚ್ಚಿದ್ ಶ್ರೀ ಕ್ಷೇತ್ರೋಗು ಬರ್ಪಿನ ಭಕ್ತೆರೆಗ್, ವಾಹನ ಸವಾರೆರೆಗ್ ಅನುಕೂಲ ಮಲ್ತ್ ಕೊರೊಡು ಪನ್ದ್ ಮುಲ್ಪದಕುಲು ಕಾತೊಂದುಲ್ಲೆರ್.
ಕುಡ ಕಾಲಿ ತೇಪೆ ಪಾಡ್ದ್ ಜನೊಕ್ಲೆನ್ ಮಂಗೆ ಮಲ್ತ್ಂಡ ದುಂಬುದ ದಿನೊಟು ಕೈಕಂಬರ್ದ್ ಕುಕ್ಕೆ ಮುಟ್ಟ 100ರ್ದ್‌ಲಾ ಎಚ್ಚ ಬ್ಯಾನರ್ ಪಾಡುನ ಎಚ್ಚರ್ಗೆನ್ ಮುಲ್ಪದಕುಲು ಕೊರ್ತೆರ್.