Last updated on December 11th, 2024 at 08:18 am
ಉಳ್ಳಾಲ: ವಾಟ್ಸ್‌‌ಆ್ಯಪ್‌ ಬೊಕ್ಕ ಟೆಲಿಗ್ರಾಂ ಲಿಂಕ್‌ ಮುಕೇನ ಬೇರಳಲೆದ ಆಸೆ ಪುಟ್ಟಾದ್ ಆನ್‌ಲೈನ್‌‌ಡ್ ಕೊಣಾಜೆ ನಿವಾಸಿಡ ಕಾಸ್ ಪೀಂಕಾದ್ ದಗೆ ಮಲ್ದಿನ ಪ್ರಕರಣೊಗು ಸಂಬಂಧಿತ್‌ದ್ ಬೆಂಗಳೂರು ಬೊಕ್ಕ ಜಮ್ಮು ಕಾಶ್ಮೀರ ಮೂಲೊದ ಇರ್ವೆರ್ ಆರೋಪಿಲೆನ್ ಕೈದ್ ಮಲ್ತ್‌ಂಡ್.
ಬೆಂಗಳೂರುದ ಜಲಸಂದ್ರ ನಿವಾಸಿ ಅಮೀರ್‌ ಸುಹೇಲ್‌ ಬೊಕ್ಕ ಕಾಶ್ಮೀರ ನಿವಾಸಿ ಸುಹೈಲ್‌ ಅಹ್ಮದ್‌ ವಾನಿ ಕೈದಾತಿನಕುಲು. ಆರೋಪಿಲು 2024ತ ಜು. 21ತಾನಿ ಪಾರ್ಟ್‌ ಟೈಮ್‌ ಜಾಬ್‌‌ದ ಬಗೆಟ್ ವಾಟ್ಸಪ್‌ ಬೊಕ್ಕ ಟೆಲಿಗ್ರಾಂ ಲಿಂಕ್‌ ಕಡಪುಡ್ದಿತ್ತೆರ್. ಬೇಲೆ ದಾದ ಪನ್ದ್ ಕೇನ್ನಗ ಅಪಗನೇ ವೀಡಿಯೋ ಕಡಪುಡ್ದ್ ಅವೆತ ಸ್ಕ್ರೀನ್‌ ಶಾಟ್‌ ಕಡಪುಡ್ರೆ ಪನ್ಡ್‌ದ್ ಆರೆಗ್ 130 ರೂ. ಕೊರ್ದು, ಕುಡ ಪಾಡ್ದಿನ ವೀಡಿಯೋ ತಪ್ಪಾತ್ಂಡ್ ಪನ್ದ್ ಪನ್ಡ್‌ದ್ ಕುಡೊಂಜಿ ಲಿಂಕ್‌ ಕಡಪುಡ್ದಿತ್ತೆರ್.
ಆ ಲಿಂಕ್‌ ಓಪನ್‌ ಮಲ್ತಿನೇ 1 ಸಾವಿರ ರೂ. ಕಾಸ್ ಪಾಡೆರೆ ಪನ್ಡ್‌ದ್ ಬೊಕ್ಕ ಒಂತೆ ಒಂತೆನೇ ಅಕೌಂಟ್‌ರ್ದ್ ಬೇತೆ ಬೇತೆ ಅಕೌಂಟ್‌ಲೆಗ್ ಕಡಪುಡ್ದ್ ಒಟ್ಟು 28,18,065 ರೂ. ನಾಮ ಪಾಡ್ದಿತ್ತೆರ್. ಈ ಬಗೆಟ್ ಕೊಣಾಜೆ ಪೊಲೀಸ್‌ ಸ್ಟೇಷನ್‌ಡ್ ಪ್ರಕರಣ ದಾಕಲಾದಿತ್ತ್ಂಡ್. ಪ್ರಕರಣೊಗೂ ಸಂಬಂಧಿತ್‌ದ್ ಬೆಂಗಳೂರು, ಮೈಸೂರು ಮೂಲೊದ ಐವೆರ್ ಆರೋಪಿಲೃನ್ ಉಂದೆಕ್ ದುಂಬೇ ಕೈದ್ ಮಲ್ತ್‌ದ್ ನ್ಯಾಯಂತಡೆಕ್ ಹಾಜಿರಿ ಮಲ್ತಿತ್ತೆರ್.
ಅಕುಲು ವಿಚಾರಣೆದ ಪೊರ್ತುಡು ಈ ಇರ್ವೆರೆನ ಒಲವು ಕೊರ್ದಿತ್ತೆರ್. ಇರ್ವೆರ್ ಆರೋಪಿಲು ಪಾಕ ಬ್ಯಾಂಕ್‌ಲೆಡ್ ಬೇತೆ ಬೇತೆಕ್ಲೆನ ಪುದರ್‌ಡ್ ಬ್ಯಾಂಕ್‌ ಅಕೌಂಟ್‌ಲೆನ್ ಮಲ್ದಿನ ವಿಚಾರಣೆಡ್ ತೆರಿದ್ ಬತ್ತಿತ್ತ್ಂಡ್. ಅತ್ತಂದೆ ಬೇತೆಕ್ಲೆನ ಅಕೌಂಟ್‌ಗ್ ದಿನೊಕು 3 ಸಾರರ್ದ್ 4 ಸಾರ ರೂ. ಕಾಸ್ ಕೊರ್ದು ಬೇತೆ ಬೇತೆ ಕಡೆಟ್ ಅಕೌಂಟ್‌ ಮಲ್ದಿನ ತೆರಿದ್ ಬೈದ್ಂಡ್. ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.