Last updated on December 25th, 2024 at 03:19 pm
ಜಮ್ಮು ಕಾಶ್ಮೀರ ಡಿಸೆಂಬರ್ 25: ಜಮ್ಮು ಕಾಶ್ಮೀರೊದ ಪೂಂಚ್ ಜಿಲ್ಲೆಡ್ ದಂಡ್‌ದ ಗಾಡಿ ಅಪಘಾತೊಡು ಐವೆರ್ ಸೈನಿಕೆರ್ ಹುತಾತ್ಮೆರಾದಿತ್ತ್‌ದ್, ಅವೆಟ್ ಕುಂದಾಪುರೊದ ಕೋಟೇಶ್ವರದ ಯೋಧೆ ಅನೂಪ್ ಪೂಜಾರಿ ಹುತಾತ್ಮೆರಾತೆರ್.
ಜಮ್ಮು ಬೊಕ್ಕ ಕಾಶ್ಮೀರೊದ ಪೂಂಚ್ ಜಿಲ್ಲೆಡ್ ದಂಡ್‌ದ ಗಾಡಿ ಗಂತ್‌ದ ಗುಂಡಿಗ್ ಪೊರೆಲ್ದ್ ಬೂರ್ದಿತ್ತ್‌ದ್ , ನಡಕೆಡ್ ಐವೆರ್ ಸೈನಿಕೆರ್ ತೀರ್ದೆರ್ ಬೊಕ್ಕ 5 ಜನೊಕು ಗಡಿಕುಲಾತ. ಅಪಘಾತೊದ ಪೊರ್ತುಡು 18 ಯೋಧೆರ್ ಗಾಡಿಡ್ ಇತ್ತೆರ್ ಪನ್ದ್ ಪೊಲೀಸ್ ಮೂಲೊಲು ದೃಢ ಮಲ್ತ್‌ದ. ದಂಡ್‌ದ ಗಾಡಿ ಬನೋಯ್‌ಗ್ ಪೋವೊಂದುಪ್ಪುನಗ ಘರೋವಾ ಪ್ರದೇಶೊಡು ಈ ಅಪಘಾತ ನಡತ್‌ದ್ಂಡ್.
ನಿಲಂ ಪ್ರಧಾನ ಕಛೇರಿರ್ದ್ ಎಲ್‌ಒಸಿ ಮುಕೇನ ಬನೋಯ್ ಘರೋವಾ ಪೋಸ್ಟ್‌ಗ್ ಪೋವೊಂದಿತ್ತಿನ 11 ಮರಾಠಾ ಲೈಟ್ ಇನ್‌ಫೆಂಟ್ರಿದ ಗಾಡಿ ಸುಮಾರ್ 150 ಫೀಟ್ ಗಂತ್‌ದ ಗುಂಡಿಗ್ ಬೂರ್ದಿತ್ತ್‌ದ್, ಡ್ರೈವರ್ ಸೇರ್ದ್ 5 ಸೈನಿಕೆರೆಗ್ ಗಾತಿದ ಗಡಿಕುಲಾತ.
ಈ ನಡಕೆಡ್ ಕರ್ನಾಟಕೊದ ಮೂವೆರ್ ಯೋಧೆರ್ ಹುತಾತ್ಮೆರಾತೆರ್. ಬೆಳಗಾವಿ ಸಾಂಬ್ರಾ ಗ್ರಾಮೊದ ಯೋಧೆ ಸುಬೇದಾರ್ ದಯಾನಂದ ತಿರಕಣ್ಣವರ (45), ಕುಂದಾಪುರ ಕೋಟೇಶ್ವರ ಬಿಜಾಡಿದ ಅನೂಪ್ (33), ಮಹಾಲಿಂಗಪುರದ 25 ವರ್ಸ ಪ್ರಾಯೊದ ಮಹೇಶ್ ಮರಿಗೊಂಡ ತೀರ್ದಿನ ಬೀರೆರ್.
ಅನೂಪ್ ಇಲ್ಲದಕುಲೆಗ್ ಸೇನಾಧಿಕಾರಿಲೆರ್ದ್ ಒಲವು ತಿಕ್ಕ್‌ದ್ಂಡ್. ಕರಿನ 13 ವರ್ಸೊರ್ದಿಂಚಿ ಅನೂಪ್ ದಂಡ್‌ಡಿತ್ತ್‌ದ್ 2 ವರ್ಸೊಗು ಪಿರವು ಮದಿಮೆ ಆದಿತ್ತ್ಂಡ್. ದಂಪತಿಗ್ 1 ವರ್ಸೊದ ಬಾಲೆ ಉಂಡು. ಜಿಲ್ಲಾಡಳಿತ, ಜಿಲ್ಲಾ ಪೊಲೀಸೆರೆಗ್ಲಾ ಸೇನೆರ್ದ್ ಒಲವು ಕಡಪುಡ್ದೆರ್.