Last updated on January 8th, 2025 at 03:20 pm
ಗುಜರಾತ್: ಸೋಶಿಯಲ್‌ ಮೀಡಿಯಾ ಗಲಕೆ ಲೆಕ್ಕೊರ್ದು ಎಚ್ಚ ಆಂಡ ಅವು ಎಡ್ಡೆ ಅತ್ತ್ ಪನ್ಪಿನೆಕ್ ಉದಾರ್ಮೆ ಆಪಿನಂಚಿನ ನಡಕೆ ಒಂಜಿ ಗುಜರಾತ್‌ಡ್ ನಡತ್‌ದ್ಂಡ್.
ಗುಜರಾತ್‌ನ ಧನ್ಸೂರಾ ಗ್ರಾಮೊದ 5ನೇ ಕ್ಲಾಸ್‌ದ ವಿದ್ಯಾರ್ಥಿನಿ, 10 ವರ್ಸ ಪ್ರಾಯೊದ ಪೊಣ್ಣು ಅಪ್ರಾಪ್ತ ಪ್ರಾಯೊದ ಆಣನ ಒಟ್ಟುಗು ಬಲ್ತ್ ಪೋತಿನ ನಡಕೆ ನಡತಿನ ವರದಿಯಾತ್ಂಡ್.
ದಾದ ಈ ನಡಕೆ?: 10 ವರ್ಸ ಪ್ರಾಯೊದ ಪೊಣ್ಣು ಕರಿನ ಕೆಲ ಸಮೆರ್ದಿಂಚಿ ತನ್ನ ಅಪ್ಪೆನ ಮೊಬೈಲ್‌ಡ್ ಇನ್ಸ್ಟಾಗ್ರಾಮ್‌ ಅಕೌಂಟ್ ಗಲಸ್‌ದ್ 16 ವರ್ಸ ಪ್ರಾಯೊದ ಆಣನೊಟ್ಟುಗು ಚಾಟಿಂಗ್‌ ಮನ್ಪೆರ ಪತ್ತ್‌ದಲ್. ಇರ್ವೆರೆ ನಡುತ ಮೆಸೇಜ್‌ ಇರ್ವೆರೆನ್ ಮುಟ್ಟ ಮುಟ್ಟ ಕನತ್‌ದ್ಂಡ್.
ಇರ್ವೆರ್ ಒರಿಯನೊರಿ ಮೋಕೆ ಮನ್ಪೆರಪತ್ತ್‌ದಿತ್ತ್‌ದ್, ಅಂಚೆನೇ ಡಿಸೆಂಬರ್‌ 31ತಾನಿ ಪೊಣ್ಣು ಇಲ್ಲಲ್ದ್ ಪಿದಯಿ ಪೋತಲ್. ಇಂಚಿ ಪೊಣ್ಣನ ಇಲ್ಲದಕುಲು ಪೊಲೀಸ್‌ ಸ್ಟೇಷನ್‌ಡ್ ನಾಪತ್ತೆ ಪ್ರಕರಣೊನು ದಾಕಲ್ತ್‌ದೆರ್. ತನ್ಕುಲೆ ಮಗಲೆನ್ ಕಿಡ್ನ್ಯಾಪ್‌ ಮಲ್ತಿಪ್ಪೆರ್ ಪನ್ಪಿನ ಸಂಶಯೊಡು ದೂರು ದಾಕಲ್ತ್‌ದೆರ್.
ಒಯಿಲ್ ಬರೆಪಾಯಿನ ಒಂತೆ ಗಂಟೆದುಲಯಿ ಇರ್ವೆರ್ ಅಪ್ರಾಪ್ತೆರೆನ್ ಪೊಲೀಸೆರ್ ನಾಡ್ದ್ ಪತ್ತ್‌ದೆರ್. ಅವೆರ್ದ್ ಬೊಕ್ಕ ಇರ್ವೆರೆನ ವಿಚಾರಣೆ ಮಲ್ದೆರ್.
ಎಂಕುಲಿರ್ವೆರ್ ಇನ್ಸ್ಟಾಗ್ರಾಮ್ಡ್ ಗುರ್ತ ಆತಿನಕುಲು. ಇರ್ವೆರ್ಲಾ ಮೋಕೆ ಮಲ್ತೊಂದುಲ್ಲ. ಎಂಕ್ಲೆನ ಮೂವೆರ್ ಪಾಸಾಡಿಲೆ ಸಕಾಯ ಗೆತೊಂದು ಬಲ್ತ್ ಪೋಯೆರ ನಿರ್ಧಾರ ಮಲ್ತಿತ್ತ್‌ದ್, ಐಕ್ ಬೋಡಾದ್ ಇಲ್ಲ್ ಬುಡ್ದ್ ಬತ್ತ್‌ದ ಪನ್ದ್ ಪೊಲೀಸೆರೆಡ ಇರ್ವೆರ್ ಅಪ್ರಾಪ್ತೆರ್ ಪನ್ತೆರ್.
ಸದ್ಯೊಗು ಇರ್ವೆರೆನ್ಲಾ ಬಾಲಾಪರಾಧಿಗೃಹೊಗು ಕಡಪುಡ್ದೆರ್ ಪನ್ದ್ ವರದಿಯಾತ್ಂಡ್.