Last updated on January 25th, 2025 at 09:47 am
ಉಬಾರ್: ಅಪ್ರಾಪ್ತೆನೊಟ್ಟುಗು ದೈಹಿಕ ಸಂಪರ್ಕ ಮಲ್ತ್‌ದ್ ಆಲೆನ್ ಬಂಜಿನಾಲ್ ಮಲ್ತಿಪ ಆಲೆನ ನೇಲ್ಯಮ್ಮೆರೆ ಮಗನ ಮಿತ್ತ್ ಪೋಕ್ಸೋ ಕಾಯ್ದೆದಡಿಟ್ ಉಬಾರ್ ಪೊಲೀಸ್ ಸ್ಟೇಶನ್‌ಡ್ ಕೇಸ್ ದಾಕಲಾತ್ಂಡ್.
ಕೌಕ್ರಾಡಿ ಗ್ರಾಮೊದ ಕಾಪುದಬಾಕಿಲ್ ಪರಕೆ ನಿವಾಸಿ ಪ್ರವೀಣೆ ಆರೋಪಿ. ಸಂತ್ರಸ್ತೆದಿ ಪೊಣ್ಣು (17ವ.) ಕೊಕ್ಕಡ ಪ್ರೌಢಶಾಲೆಡ್ 10ನೇ ಕ್ಲಾಸ್ ಅರ್ಧೊಡು ಉಂತಾದ್ ಇಲ್ಲಡೆ ಇತ್ತ್‌ದ್, ಅಲ್ಪನೆ ಬರಿತ ಪರಕೆ ಪನ್ಪಿನಲ್ತ ನೇಲಾಯಮ್ಮೆರೆ ಮಗೆ ಪ್ರವೀಣ್, ಮಾಮುನ ಜೋಕುಲಾಯಿನ ರಕ್ಷಿತ್, ರತೀಶ್ ಪನ್ಪಿನಕುಲು ಮಾತ್ರ ಇತ್ತ್‌ದ್, ಅಕಲೆಗ್ ಅಟಿಲ್ ಮಲ್ತ್ ಕೊರ್ಯೆರ ಏಪಾಂಡಲ ಒರ ಪೋದು ಬರೊಂದಿತ್ತಲ್. ಸಂತ್ರಸ್ತೆದಿನ ಅಪ್ಪೆಅಮ್ಮೆ ಕೂಲಿ ಬೇಲೆಗ್ ಪೋವೊಂದಿತ್ತ್‌ದ್ ಒವ್ವೇ ಮೂಲಭೂತ ಸೌಕರ್ಯದಾಂತಿನ ಇಲ್ಲಡ್ ಒರ್ತಿಯೇ ಇಪ್ಪೆರೆ ಪೋಡಿದ್ ಕರಿನ 6 ತಿಂಗೊಲುರ್ದ್ ನೇಲ್ಯಮ್ಮೆರೆ ಇಲ್ಲಡೇ ಇಪ್ಪೆದಲ್. 2024ತ ನವೆಂಬರ್ ತಿಂಗೊಲ್ದ ಮೂಜನೇ ವಾರೊದ ಒಂಜಿ ದಿನ ರಾತ್ರೆ ಸಂತ್ರಸ್ತೆದಿ ಜೆತ್ತಿತ್ತಿನಡೆ ಆಲೆನ ನೇಲ್ಯಮ್ಮೆರೆ ಮಗೆ ಪ್ರವೀಣ್ ಬತ್ತ್‌ದ್ ಬಲತ್ಕಾರವಾದ್ ದೈಹಿಕ ಸಂಪರ್ಕ ಮಲ್ತಿನತ್ತಂದೆ, ಅವೆರ್ದ್ ಬೊಕ್ಕಲಾ ಆಲೆನ ಇಚ್ಚೆಗ್ ವಿರುದ್ದವಾದ್ 2-3 ಸರ್ತಿ ಬೇತೆ ಬೇತೆ ದಿನೊಟು ದೈಹಿಕ ಸಂಪರ್ಕ ಮಲ್ತಿತ್ತ್‌ದ್ ಈ ವಿಚಾರೊನು ಏರೆಡಲಾ ಪನ್ಡ್‌ನ್ಡ ನಿನನ್ ಬದ್‌ಕೆರೆ ಬುಡ್ಪುಜಿ ಪನ್ಧ್ ಬೆದರಿಕೆ ಪಾಡ್ದೆ ಪನ್ದ್ ಆರೋಪ ಮಲ್ದೆರ್. ಜ.22ತಾನಿ ಸಂತ್ರಸ್ತೆದಿನ ಇಲ್ಲಗ್ ಮುಟ್ಟದ ಆಶಾ ಕಾರ್ಯಕರ್ತೆದಿ ಬೊಕ್ಕ ಆರೋಗ್ಯ ಸಹಾಯಕಿ ಬತ್ತಿನಪಗ ಪೊಣ್ಣನ ನಡಕೆನ್ ತೂದು ಆಲೆನ್ ವಿಚಾರಿಪುನಗ ನಡಕೆದ ಬಗೆಟ್ ತೆರಿಪಾದಲ್. ಜ.23ತಾನಿ ಮುಟ್ಟದ ಅಂಗನವಾಡಿ ಶಿಕ್ಷಕಿ ಬೊಕ್ಕ ಆಶಾ ಕಾರ್ಯಕರ್ತೆದಿ ಪೊಣ್ಣನ್ ಕೊಕ್ಕಡ ಸಮುದಾಯ ಆರೋಗ್ಯ ಕೇಂದ್ರೊಗು ಲೆತೊಂದು ಪೋದು ಬೈದ್ಯೆರೆಡ ಪರೀಕ್ಷಿಪುನಗ ಆಲ್ 2 ತಿಂಗೊಲ್ದ ಬಂಜಿನಾಲಾ ಪನ್ದ್ ಬೈದ್ಯೆರ್ ತೆರಿಪಾದೆರ್. ಪೊಣ್ಣು ಆಲೆನ ನೇಲ್ಯಮ್ಮೆರೆ ಇಲ್ಲಗ್ ಪೋದಿತ್ತಿನ ಪೊರ್ತುಡು ದೊಡ್ಡಪ್ಪನ ಮಗೆ ಪ್ರವೀಣೆ ಪೊಣಾಣನ್ ಪೋಡಿಕಟ್ಟಾದ್ ಬಲಾತ್ಕಾರವಾದ್ ಆಲೆನೊಟ್ಟುಗು ದೈಹಿಕ ಸಂಪರ್ಕ ಮಲ್ತ್‌ದ್ ಬಂಜಿ ಬರ್ಪಾದೆ, ಆಯನ ಮಿತಾತ್ ಕಾನೂನು ಕ್ರಮ ಗೆತೊನೊಡು ಪನ್ದ್ ಬರೆಪಾದಿನ ಒಯಿಲ್‌ದ ಪ್ರಕಾಲ ಉಬಾರ್ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.